Երևանցի մրցավար Նարեկ Շիրինյանը հրավիրվել է սպասարկելու հուլիսի 9-17-ը Թբիլիսիում անցկացվելիք մինչև 18 տարեկան պատանիների վոլեյբոլի Եվրոպայի առաջնության եզրափակիչ փուլի հանդիպումները։
Վրաստանի մայրաքաղաքում առաջին անգամ անցկացվելիք այդ ստուգատեսին մասնակցելու է 12 երկրի հավաքական։ Ասպարեզ են դուրս գալու Բելգիայի, Բուլղարիայի, Գերմանիայի, Իտալիայի, Լեհաստանի, Հունաստանի, Չեխիայի, Սերբիայի, Սլովենիայի, Վրաստանի, Ֆինլանդիայի և Ֆրանսիայի թիմերը։
Շիրինյանը միջազգային այդ կարգի մրցումներում աշխատելու բավական լուրջ փորձ ունի։ Այս տարի նա արդեն սպասարկել է ապրիլի 22-24-ը Նիդեռլանդներում կայացած 17-18 տարեկան աղջիկների Եվրոպայի առաջնության ընտրական երկրորդ փուլի D ենթախմբի հանդիպումները և արժանացել բարձր գնահատականների։