NBA-ի արևելյան կոնֆերենցիայի փլեյ-ինի խաղում «Բրուքլին Նեթսը» մրցել է «Քլիվլենդ Կավալիերսի» հետ։
Հանդիպումն անցկացվել է Նյու Յորքում՝ «Բարքլեյս Սենթր» մարզապալատում և ավարտվել տանտերերի հաղթանակով՝ 115:108 հաշվով։
«Բրուքլինի» կազմում ամենաարդյունավետ բասկետբոլիստը վաստակած 34 միավորով Կայրի Իրվինգն էր: Կևին Դյուրանտը դաբլ-դաբլ է գրանցել՝ 25 միավոր վաստակելով և կատարելով 11 արդյունավետ փոխանցում։
«Քլիվլենդ Կավալիերսի» կազմում ամենաարդյունավետը 34 միավոր վաստակած Դարիուս Գարլենդն էր:
Այսպիսով՝ «Բրուքլինը» դուրս է եկել NBA-ի փլեյ-օֆֆ, որտեղ կմրցի «Բոստոն Սելթիկսի» հետ:
NBA-ի արևելյան կոնֆերենցիայի փլեյ-օֆֆ դուրս գալու համար 2-րդ խաղում «Քլիվլենդը» կմրցի «Ատլանտա Հոքս» - «Շառլոտ Հորնեթս» դիմակայության հաղթողի հետ:
Արևմտյան կոնֆերենցիայի փլեյ-ինում «Մինեսոտա Թիմբերվուլվզն» ընդունել է «Լոս Անջելես Կլիպերսին»։
Հանդիպումն անցկացվել է Մինեապոլիսում՝ «Թարգեթ Սենթեր» մարզապալատում և ավարտվել 109:104 հաշվով՝ հօգուտ տանտերերի։
«Մինեսոտայի» հաղթանակում զգալի ներդրում է ունեցել թեթև հարձակվող Էնթոնի Էդվարդսը (30 միավոր, 5 անդրադարձ և 2 փոխանցում) և Դ՛Անջելո Ռասելը (29 միավոր, 5 անդրադարձ և նույնքան արդյունավետ փոխանցում):
«Կլիպերսի» պաշտպան Փոլ Ջորջը վաստակել է 34 միավոր, տիրել 7 անդրադարձի և կատարել 5 արդյունավետ փոխանցում:
«Մինեսոտան» փլեյ-օֆֆում կմրցի «Մեմֆիս Գրիզլիզի» հետ: