Մութ ասպետի մասին նոր մասի նկարահանումները սկսվել էին 2020 թվականի հունվարին, սակայն մարտին դրանք դադարեցվել էին համաճարակի պատճառով։ Արդյունքում նկարահանումներն ավարտվել էին թողարկումից մեկ տարի առաջ, սակայն Warner Bros.-ը չեղարկել էր ֆիլմի վարձույթը Ռուսաստանում։
Նախօրեին հայտնի է դարձել, որ Ռուսաստանում մի շարք կինոթատրոններ՝ Կինոթատրոնների սեփականատերերի ասոցիացիայի ներկայացուցիչներ, նախատեսում են ցուցադրել նոր «Բեթմենը»՝ Ռոբերտ Փեթինսոնի գլխավոր դերակատարմամբ, նախապես կնքված արտոնագրային պայմանագրերի հիման վրա, հայտնում է Cinemaplex-ը։
Կինոթատրոնների ներկայացուցիչները պնդում են, որ օրենքի պահանջները չեն խախտվի. հաշվետվությունները կուղարկվեն Միասնական ավտոմատացված տեղեկատվական համակարգ (ЕАИС), իսկ վարձավճարի գանձման և հետագա վճարման պարտավորությունը «կատարվում է՝ հաշվի առնելով նոր իրողությունները»։ «Яндекс.Афиша»-ի տվյալների համաձայն՝ ֆիլմն արդեն ցուցադրվում է «Бульвар» և «Киносфера IMAX» կինոթատրոններում։
Ռուսական կինոթատրոնները պայմանագիր էին կնքել Universal Pictures Russia-ի հետ 2022 թվականի փետրվարին «Բեթմեն»-ը ցուցադրելու վերաբերյալ։ Կինոթատրոնների ներկայացուցիչները նշել են, որ իրենք իրենց միջոցներով ցուցադրել են անոնսային տեսահոլովակներ և տարածել գովազդը։ Ավելին, ՌԴ մշակույթի նախարարությունը ֆիլմի վարձույթի վկայական է տվել։
Հիշեցնենք, որ «Բեթմեն»-ի թողարկումը նախատեսված էր մարտի 2-ին, սակայն Warner Bros. կինոստուդիան պրեմիերայից մեկ օր առաջ չեղարկել է ֆիլմի վարձույթը Ռուսաստանում։ Միաժամանակ կինոթատրոններին պաշտոնական փաստաթղթեր չեն տրամադրվել։