«Բարսելոնան» պատրաստվում է ամռանը հարձակվողով համալրվել:
Կատալոնական ակումբի համար առաջնահերթ տարբերակ է մնում Դորտմունդի «Բորուսիայի» հարձակվող Էրլինգ Հալանդին հրավիրելը, սակայն նրա տրանսֆերի դիմաց պահանջվող գումարն (շուրջ 150 մլն եվրո) Իսպանիայի փոխչեմպիոնը չափազանց մեծ է գնահատում:
Ուստի «Բարսելոնայի» ղեկավարությունը դիտարկում է հարձակման գիծն ուժեղացնելու այլ տարբերակներ ևս: Հնարավոր ելքերից մեկը «Ռեալ Սոսյեդադի» հարձակվող Ալեքսանդր Իսակի հետ պայմանագիր ստորագրելն է: Այդ մասին հաղորդում է Marca-ն:
«Կապտանռնագույնները» վաղուց են հետևում երիտասարդ շվեդի խաղին ու նրա տրանսֆերը կարող էին գնել դեռևս նախորդ տարվա փետրվարին, սակայն ընտրությունն ի վերջո կանգ էր առել Մարտին Բրեթվեյթի վրա:
21-ամյա Իսակը, որը նախկինում խաղացել է Դորտմունդի «Բորուսիայում», Լա Լիգայի ընթացիկ առաջնությունում մասնակցել է 32 հանդիպման, խփել 14 գոլ ու «Ռեալ Սոսյեդադի» լավագույն ռմբարկուն է: Նրա տրանսֆերը կարող է գնահատվել 25-30 մլն եվրո: Շվեդիայի ազգային հավաքականում մասնակցած 20 մրցավեճում դարձել է 6 գոլի հեղինակ:
Ընդ որում, շվեդ գոլահարի տեղափոխությունը չի բացառվի նույնիսկ այն դեպքում, եթե «Բարսելոնան» պայմանագիր ստորագրի Սերխիո Ագուերոյի («Մանչեսթեր Սիթի») կամ Մեմֆիս Դեպայի («Լիոն») հետ, սակայն դրա հետ մեկտեղ, հնարավոր է, Բրեթվեյթը հեռանա «Կամպ Նոու» ստադիոնից:
Նույն Marca-ն ավելի վաղ հաղորդել էր, որ Դեպայը «Բարսելոնայի» հետ համաձայնեցրել է անհատական պայմանագրի կետերը, և տեղափոխությունը չի իրականացվի միայն այն դեպքում, եթե Ռոնալդ Կումանը հեռացվի թիմի գլխավոր մարզչի պաշտոնից: Իսկ Beteve.cat-ը վստահեցրել էր, որ Ագուերոն ու կատալոնական ակումբը վերջնական պայմանավորվածության են հասել գործարքի շուրջ, և կողմերը 2 տարվա համաձայնագիր կստորագրեն:
«Բարսելոնան» ու «Չելսին» կարող են կիսապաշտպանների փոխանակում իրականացնել