Ոճն ավելին է, քան ձեր սանրվածքը, նորաձև վերարկուն կամ թանկարժեք կոշիկները։
Ոճն այն է, թե ինչպես ենք արտահայտում մեր ներքին էությունը: Սա ներառում է մեր բոլոր մտքերը, հույզերը, հետաքրքրություններն ու արժեքները: Արտաքինն արտացոլումն է այն ամենն, ինչ կա ներսում:
2021-ի ակտուալ ոճերի, ոճաբանի աշխատանքի, նորաձևության վրա համավարակի ազդեցության մասին Vnews-ը զրուցել է ոճաբան Մարիամ Մելիք- Բախշյանի հետ։
Մարիամ, ի՞նչ է ոճը և ո՞րն է ոճաբանի աշխատանքը
Ոճն անձի ինքնազգացողության, ինքնության ընկալումն է: Այն արտաքինին, ապրելակերպին ու նախասիրություններին համապատասխան համադրությունների ստեղծումն է: Ոճային լինելու գաղտնիքներից է նաև կազմվածքի համամասնությունները պահպանելը, գույների ներդաշնակ և տարբեր տեքստուրաների ճիշտ համադրությունը:
Ո՞վ է ոճաբանը
Եթե խոսում ենք անձնական ոճաբանից, ապա այստեղ աշխատանքի էությունը հաճախորդի անձնական ոճի ստեղծումն է՝ համադրելով արտաքին տեսքի առանձնահատկությունները, ապրելակերպի պահանջները, ներքին տրամադրությունը, ցանկություններն ու նախասիրությունները՝ առաջարկելով ժամանակակից ոճային լուծումներ:
Երկու տարբեր մարդկանց ոճերը հիմնովին տարբեր են կախված ապրելակերպից. գործունյա և երեխա խնամող կնոջ համար տարբեր նպատակներ և լուծումներ են պետք:
Կյանքի տարբեր փուլերում ապրելակերպը փոփոխվում է և յուրաքանչյուր փուլի համար համապատասխան ոճ է պետք՝ կյանքի տվյալ փուլի ցանկություններն ու պահանջները բավարարելու համար:
Ընդունված է ասել, որ արտաքինն այդքան էլ կարևոր չէ
«Դուք երբեք երկրորդ հնարավորություն չեք ունենա առաջին տպավորություն թողնելու համար»:
Շատ հայտնի ասացվածքը լավագույն պատասխանն է այս հարցին: Արտաքինի ու ներքինի ներդաշնակությունն է կարևոր: Մեզ ընկալում են ելնելով նախևառաջ մեր տեսքի, հագուկապի, կոկիկության և ընդհանուր խնամվածության, այնուհետև միայն մարդկային որակներով և կրթվածությամբ:
Արտաքինն ամենաարագ ու ճիշտ ձևով արտացոլում է մարդու էությունը: Ցանկացած աութֆիտ ուղերձ է:
Շատերին թվում է անձնական ոճ ունենալն ու նորաձև լինելը ենթադրում է անհարմարավետություն, սակայն ոճային և հարմարավետ կերպարները միանշանակ համադրելի են, մանավանդ 2021-ին:
Արդյո՞ք կզարգանա անձի ճաշակը՝ նորաձևության տներին և լյուքս բրենդի հավաքածուներին հետևելով
Նորաձևության տների ու լյուքս բրենդերի նպատակը միայն հագուստի վաճառքն ու նորաձևության տենդենցները չեն, նրանք հասարակական, սոցիալական, քաղաքական և համամարդկային խնդիրների ու գաղափարներին են անդրադառնում իրենց ստեղծած հագուստի և շոուի միջոցով: Բնականաբար, նորաձևության բնագավառում ճաշակի զարգացման համար պարտադիր է հետևել նորաձևության տների հավաքածուներին, ոգեշնչվել և ցանկության դեպքում կիրառել նրանց առաջարկած լուծումները թեկուզ ավելի հասանելի գնային սեգմենտի առաջարկած իրերով։
Իսկ ինչպե՞ս զարգացնել ճաշակն ու փոխել զգեստապահարանը
Անդադար ուսումնասիրելով և սովորելով, ինչպես կսովորեն օրինակ օտար լեզուն՝ քայլ առ քայլ: Անհրաժեշտ է ճանաչել սեփական մարմինը, կազմվածքի ձևը, ձեր տեսակին համապատասխան գունային գամման` սեփական յուրահատկությունները հաշվի առնելով։ Ովքեր այդ ճանապարհին են խորհուրդ կտամ ընթերցել Աննուշկա Ռիզի “Խելացի զգեստապահարան” գիրքը, որտեղ քայլ առ քայլ նկարագրված է այդ պրոցեսը։
Ինչպիսի՞ փոփոխություններ են նկատվում նորաձևության ասպարեզում համավարակից հետո
Վերջին մի քանի տարիներին նորաձևությունը ռադիկալ փոփոխությունների է ենթարկվել թե՛ սպառողի և թե՛ բրենդերի տեսանկյունից: Սպառողի պահանջը փոխվել է ապրելակերպի փոփոխության ֆոնին, իսկ բրենդերը փորձում են համապատասխան իրեր ստեղծել այդ պահանջմունքները բավարարելու համար: Օր՝ նույնիսկ Dior-ը, ով հայտնի է իր couture շքեղ զգեստներով և new look ոճի հանդերձանքով, սկսել է ներկայացնել ավելի հարմարավետ և առօրյա հագուստներ:
Ոճեր
Նորաձևության զարգացումներին հետևելով կարելի է եզրակացնել, որ ներքոնշյալ ոճային ուղղվածություններն առավել ակտուալ են՝
Վերադարձվել է 50, 60, 70, 80, 90-ականների շունչը՝ հագուստի, աքսեսուարների տեսքով
Մինիմալիստական ռոմանտիզմ
Ռոմանտիզմը հիանալիորեն համադրվում է տարբեր ոճերի հետ: Այն հիմա ավելի ունիվերսալ ու մինիմալիստական է դարձել: Ռոմանտիկ ոճի մինիմալիստական տարբերակը ժամանակակից նորաձևության մեջ չափազանց գրավիչ և էլեգանտ է: Այն չի պահանջում լրացուցիչ ջանքեր սեփական կերպարի ավելորդ ծանրաբեռնման համար, այն ինքնաբավ է:
Մեկ այլ գերիշխող ուղղություն – կոպիտ, ոչ հարթ ու քիչ մշակված բնական կտորներից ստեղծված իրերը, հաճախ էթնիկ էլեմենտների օգտագործմամբ:
Ներքնազգեստ հիշեցնող ոճ
Համավարակից հետո նորաձևության տները փորձում են բազմաֆունկցիոնալ լուծումներ գտնել: Հագուստը, որը հնարավոր է կրել տանը հարմարավետ հողաթափերով և սանրվածքով, կարելի է կրել նույնիսկ միջոցառման ժամանակ՝ ավելի ակցենտային և ներկայանալի բարձրակրունկներով՝ այսպիսով հեշտացնելով սպառողի գործը:
Մինիմալիզմ
Նորաձևության մեջ մինիմալիզմը բնութագրվում է որպես ոճ, որտեղ օգտագործվում է պարզ ձևվածք, աքսեսուարների նվազագույն քանակ, այն էլ չափազանց նուրբ, հանգիստ երանգավորում, և ամենակարևորը՝ բարձր որակի իրեր։
Մինիմալիզմն այս տարի նաև մեր պահանջներն է արտացոլում. ունենալ-գնել ոչ ավելին, քան մեզ պետք է: Բացի նորաձևության ուղղություն լինելուց, այն նաև գաղափարախոսություն է:
Sport Casual/Chic/altleisure
Հարմարավետության և ճոխության համադրումն է: Երբ սպորտային հագուստը կրում ես առօրյայում և համադրում համարձակ լուքերում: Եվրոպական և սկանդինավյան street style-ում հաճախակի կհանդիպենք նման ոճը՝ համեմված տպավորիչ լուծումներով:
-Խոսենք համավարակի՝ նորաձևության ոլորտի վրա ազդեցության և փոփոխությունների մասին
Եթե նախկինում մեծ խանութներն ու բուտիկների հիմնական վաճառքը տեղի էր ունենում օֆլայն ,ապա հիմա ռիթեյլը մեծամասամբ օնլայն է դարձել: Հարմարավետ կայքերը, օնլայն սպասարկման մշակույթը, առաքման ծառայությունները դարձել են առաջնային և շուկայում մրցունակ լինելու կարևոր նախապայմաններից մեկը:
-Ինչպե՞ս է փոխվել սպառողի վերաբերմունքը նորաձևությանը
Համավարակի ընթացքում փոխվել են սպառողի ապրելակերպը, ֆինանսական վիճակը և սպառողը նախապատվություն է տալիս առաջնային անհրաժեշտության ծախսերին՝ ակցենտայինի փոխարեն գնելով հարմարավետ, բազային և բազմաֆունկցիոնալ հագուստ:
«Գիտակցված սպառում» ասվածը նույնիսկ թրենդ է դարձել, որոշակի բրենդեր սկսել են շրջակա միջավայրի պաշտպանությանը ուղղված քայլեր կատարել, զբաղվել հնացած և չօգտագործվող իրերի վերամշակմամբ՝ այսպիսով ամեն կերպ երկարացնելով իրերի կյանքը։
Նավթից հետո նորաձևությունը շրջակա միջավայրին 2-րդ ամենաշատ վնաս հասցնող ոլորտն է:
–Մարիամ, իսկ ինչպիսի՞նն է լինելու նորաձևությունն ապագայում
Թերևս սա ամենաֆուտուրիստականն է, բայց տեխնոլոգիան մեծ դեր է ունենալու նորաձևության ապագայում։
Այն արդեն իսկ դառնում է դիջիթլ: Տեխնոլոգիաների օգտագործումը նորաձևության մեջ, գրաֆիկական լուծումներն ու 3d մոդելավորման իրերը թրենդային են մանավանդ համավարակից հետո: