«Մեծ ցավով եմ տեղեկացել Նինո Չերրուտիի մահվան մասին։ Չնայած մենք տարիների ընթացքում կորցրել ենք կապը, ես նրան միշտ համարել եմ իմ կյանքի իրական և դրական ազդեցություններից մեկը: Նինոն է ձևավորել իմ ճաշակը և սովորեցրել ինձ ամբողջական տեսլականի կարևորությունը ինչպես դիզայների, այնպես էլ ձեռնարկատիրոջ համար: Սինյոր Նինոն սուր աչք ուներ, նա իսկապես հետաքրքրասեր ու համարձակ էր։ Նրան շատ կկարոտեն», - Չերրուտիի մահվան մասին ասել է Ջորջիո Արմանին:
91 տարեկան հասակում մահացել է իտալացի մոդելավորող և Cerruti 1881 բարձր նորաձևության տան հիմնադիր Նինո Չերրուտին: Նա 20-րդ դարի տղամարդկանց հագուստի ամենաազդեցիկ դիզայներներից էր։ Լինելով նորարար, արդյունաբերող և դիզայներ՝ նա հեղափոխություն է կատարել տղամարդկանց հագուստի ձևափոխման հարցում՝ 1970-ականներին ներկայացնելով առաջին դեկոնստրուկտիվ բաճկոնը: Նինո Չերրուտին հաջողության է հասել ինչպես իր համանուն ապրանքանիշում, այնպես էլ Lanificio Fratelli Cerruti-ի ընտանեկան բիզնեսում:
Կիսվում ենք Նինոյի մտքերով և որոշ փաստերով՝
-
«Ես հագուստ եմ արտադրել միայն մեկ անձի համար՝ ինքս ինձ», - ասել է նա մի անգամ:
-
Նինոն իր առաջին բուտիկը բացել է Փարիզում 1967 թվականին։ Ըստ France Presse-ի՝ տղամարդկանց և կանանց համար միանման նմուշներ արտադրելու նրա որոշումը հեղափոխական ազդեցություն է ունեցել նորաձևության ոլորտում:
-
1980-ականներին նա սերտորեն համագործակցել է հոլիվուդյան աստղերի՝ Ջեք Նիկոլսոնի, Մայքլ Դուգլասի, Շերոն Սթոունի, Ջուլիա Ռոբերթսի և Թոմ Հենքսի հետ։
-
Ես ցանկանում էի, որպեսզի տղամարդիկ վերջապես կարողանան կրել հարմարավետ հագուստ` առանց թափթփված տեսք ունենալու: Սա կոչվում է «անզգույշ նրբագեղություն» և ոչ մի կապ չունի «cafonal» նեոլոգիզմի հետ (իտալական «cafone»-ից՝ «անբարեխիղճ», «անճաշակ հագնված»), որը մենք օգտագործում ենք Իտալիայում վերջին շրջանում լայն տարածում գտած գռեհիկ և աչքի ընկնող հագուստ կրելու համար:
-
Նրբագեղությունն անբաժան է մարդուց։ Պարզապես պետք է իմանալ, թե ինչպես վարվել դրա հետ: Կա միայն մի քանի դիզայներ, որոնց վրա ես կարողանում եմ կենտրոնանալ գործվածքներս ստեղծելիս: Նրանցից մեկը Ջորջիո Արմանին է, որի հետ աշխատել եմ 10 տարի։ Ինձ դուր են գալիս նաև Saint Laurent-ը և Louis Vuitton-ը, քանի որ նրանք գիտեն, թե ինչպես ստեղծել հագուստ իրական կյանքի համար: Եվ նաև Celine, Lanvin, Bottega Veneta և Dior: