Այսօր El Confidencial-ը հրապարակել է Մադրիդի «Ռեալի» նախագահ Ֆլորենտինո Պերեսի վիրավորական խոսքերը թիմի լեգենդներ Ռաուլի և Իկեր Կասիլյասի մասին, որոնք նա ասել է 2006 թվականին:
Ավելի վաղ ներկայացրել էինք իսպանացու խոսքերից հատված, որում նա Ռաուլին ու Կասիլյասին անվանում է «Ռեալի» ամենակեղծավոր ֆուտբոլիստներ:
«Ռաուլը վատ մարդ է: Նա կարծում է, որ Մադրիդի «Ռեալը» նրան է պատկանում և ակումբի բոլոր հաջողություններն իրեն է վերագրում: Նա շատ բաներում է մեղավոր: Մեղավոր է նաև Խինեսը (Խինես Կարվախալը՝ «Ռաուլի» գործակալ-խմբ.): Ռաուլն առաջին մարդն է, ում պատճառով ակումբը հայտնվեց այս իրավիճակում: Ես նրա պատճառով հեռացա, բացասական մարդ է: Նա ամեն ինչ այնպես է անում, որ հետո մարդիկ ասեն. «Մադրիդն» է վատը, այլ ոչ թե Ռաուլը»: Ես ոչինչ չեմ կարող դրա դեմ անել, ժամանակ չունեմ, այդ ամենը շտկել: Նա քանդում է ակումբը:
Ռաուլը մարդ է, որը խնդիրներ ունի ընտանիքում: Չգիտեմ նա ամուսնալուծվում է, թե ոչ,, բայց ինձ թվում է՝ նա վատ է վերաբվերվում կանանց: Նա մշտապես տխուր դեմքով է քայլում, չնայած նրան, որ ակումբը նրան տարեկան 2 միլիարդ պեսետ է վճարում: Մենք ոչինչ չենք վաստակում, և որպեսզի վճարենք նրա պայմանագիրը, ստիպված ենք գովազդային նոր համաձայնություններ փնտրել:
Բեքհեմը շատ լավ ու խելացի տղա է: Նա տարեկան 30 մլն եվրո է վաստակում: Այդքան է ստանում նաև Ռոնալդոն: Զիդանը ստանում է 25 մլն: Կա նաև Ռաուլը, որը ոչինչ չի բերում ակումբին, նրա անունով խաղաշապիկները չեն վաճառվում: Նույնիսկ մամուլին նա հետաքրքիր չէ:
Կասիլյասը խեղճ տղա է: Նա այնքան ցածրահասակ է, որ երևի այդ պատճառով վատ է տեսնում, թե ինչ է կատարվում խաղադաշտում: Նրա տրամադրությունից միշտ կարելի է հասկանալ, թե ինչպես են դասավորվում ընկերուհու հետ հարաբերությունները: Նա կարծես փոքրիկ տիկնիկ լինի, փոքրիկ երեխա»,- ասել է Պերեսը:
Հավելենք, որ ձայնագրության հրապարակումից հետո Պերեսն հայտարարել է, որ իր խոսքերը հանվել են ենթատեքստից:
