Մեկնարկում է VBET ՀՊԼ-ի 12-րդ տուրը: Ձեր ուշադրությանն ենք ներկայացնում կայանալիք 5 հանդիպումներին վերաբերող ամենահետաքրքիր ու ամենաուշագրավ փաստերը:
«ՈՒՐԱՐՏՈՒ» – «ԱՐԱՐԱՏ»
30 հոկտեմբերի, ժ. 19:30, Երևան, «Ուրարտու-1» մարզադաշտ
74 խաղ, «Ուրարտուն» հաղթել է 37 անգամ, «Արարատը»՝ 17, գրանցվել է 20 ոչ-ոքի, խփած և բաց թողած գոլերի հարաբերակցությունը՝ 111-73
1-ին շրջան. 15.08.2021 «Արարատ» 2-0 «Ուրարտու»
Գոլերը՝ 1-0՝ Դոնիմանի Յակուբա Սիլուե 72՛, 2-0՝ Իգոր Ստանոևիչ 88՛:
«Ուրարտու»՝ 6-րդ տեղ (14 միավոր), «Արարատ»՝ 2-րդ տեղ (22 միավոր):
Հետաքրքիր 5 փաստ՝ հանդիպմանն ընդառաջ
- Առաջնության վերջին 3 հանդիպումները հաջող էին «Ուրարտուի» համար, որը 5 միավոր վաստակեց՝ մնալով անպարտելի («Վան»՝ 1-1, «Նորավանք»՝ 1-0, «Սևան»՝ 0-0): Վերջին երկու հանդիպումներում Արսեն Բեգլարյանի պաշտպանած դարպասն անառիկ է մնացել:
- «Արարատին» վերջապես հաջողվեց ընդհատել պաշտոնական մրցումներում առանց հաղթանակների 4 խաղերի շարքը, որի ժամանակ ընդամենը մեկ միավոր էր վաստակել: Վերջին հաղթանակն արարատցիները տոնել էին սեպտեմբերի 21-ին ԲԿՄԱ-ի նկատմամբ՝ 2-0:
- Հետաքրքիր է, որ Ռոբերտ Արզումանյանը հենց մրցակիցների միջև ապրիլի 7-ին կայացած խաղից է սկսել ղեկավարել «Ուրարտուի» ֆուտբոլիստների գործողությունները: Նա նորամուտը հաղթանակով նշեց: Հանդիպման ելքը վճռել էր Ջոնել Դեսիրեի խփած միակ գոլը: Մրցաշրջանն էլ հաջող էր երիտասարդ մարզչի համար, որի սաները դարձան առաջնության բրոնզե մեդալակիրներ:
- Մրցակիցների միջև կայացած առաջնության առաջին շրջանի խաղում հաղթելով «Ուրարտուին», «Արարատն» ընդհատեց այդ թիմից կրած 2 պարտությունների շարքը: Մինչ այդ, վերջին հաղթանակն «Ուրարտուի» նկատմամբ «Արարատը» տոնել էր նախորդ առաջնության առաջին շրջանի խաղում՝ փետրվարի 21-ին Չարենցավանում հաղթելով Մորի Կոնեի դուբլի շնորհիվ:
- «Վանի» հետ խաղում «Արարատին» հաղթանակ պարգևած Սերժ Դեբլեի գոլը 8-րդն էր իվուարցի ֆուտբոլիստի համար: ՀՀ առաջնությունների ամենաարդյունավետ լեգեոնականների ցանկում Դեբլեն 23 գնդակով 12-րդ տեղում է: Եթե 32-ամյա Դեբլեին հաջողվի գրավել «Ուրարտուի» դարպասը, ապա կգերազանցի «Ուլիսի» նախկին լեգեոնական Գեորգի Կրասովսկու արդյունավետության տարիքային ռեկորդը, որն այդ տարիքում 2011թ. առաջնությունում 8 գոլ էր խփել:
Դիմակայության լավագույն ռմբարկուները՝
«Ուրարտու»՝ Սամվել Մելքոնյան, Արսեն Բալաբեկյան՝ 5–ական գոլ:
«Արարատ»՝ Վահե Յաղմուրյան՝ 5 գոլ:
«Ուրարտուի» կազմում հանդիպմանը չի մասնակցի նախորդ խաղում խաղադաշտից հեռացված Լիվիո Միլթսը:
