Առաջնության 35-րդ տուրի մեկնարկային խաղում Սերժ Դեբլեի խփած «ոսկե» գոլի շնորհիվ հաղթելով «Արարատին», «Փյունիկը» մրցաշարի ավարտից մեկ տուր առաջ նվաճեց Հայաստանի չեմպիոնի տիտղոսը: Դա փյունիկցիների հոբելյանական՝ 15-րդ չեմպիոնությունն էր 6-ամյա ընդմիջումից հետո: Ստացվում է, որ Հայաստանի առաջնությունների ուղիղ կեսում ուժեղագույնն է ճանաչվել «Փյունիկը»: Փյունիկցիներն ամենաթանկ նվերը մատուցեցին իրենց երկրպագուներին ակումբի հիմնադրման 30-ամյակի առթիվ:
Վերջին անգամ «Փյունիկը» չեմպիոն էր հռչակվել 2014/15թթ. մրցաշրջանում Սարգիս Հովսեփյանի գլխավորությամբ: Հետաքրքիր է, որ այդ առաջնությունում ոսկե մեդալների արժանացած ֆուտբոլիստներից ոչ մեկը ներկայումս «Փյունիկում» չէ: Գործող ֆուտբոլիստներից Վարազդատ Հարոյանը, Կամո Հովհաննիսյանն ու Զավեն Բադոյանը հանդես են գալիս արտերկրում, Տարոն Ոսկանյանն «Ալաշկերտում» է, Արթուր Քարտաշյանը՝ «Նոայում», Վասպուրակ Մինասյանը՝ «Վանում», Ռոբերտ և Ռազմիկ Հակոբյաններն ու Դավիթ Մանոյանը հանդես են գալիս «Արարատում», Անատոլի Այվազովը «Ուրարտուի» դարպասապահն է:
Ամենատիտղոսակիրը Գևորգ Ղազարյանն է
«Փյունիկի» ներկայիս կազմի ֆուտբոլիստներից ամենատիտղոսակիրը թիմի ավագ Գևորգ Ղազարյանն է, որը դարձավ Հայաստանի վեցակի չեմպիոն: Նախկինում նա «Փյունիկի» կազմում ոսկե մեդալի էր արժանացել 2005, 2006, 2008-2010թթ.: Նրա մեդալների հավաքածուում կարող էր չեմպիոնի 7 ոսկե մեդալ լինել, եթե երիտասարդական հավաքականի շահերից ելնելով 2007թ. առաջնության 2-րդ հատվածում նա չտեղափոխվեր «Բանանց», որի կազմում արծաթե մեդալի էր արժանացել: Ղազարյանը հայկական ֆուտբոլում 10-րդ տիտղոսը նվաճեց: Նա Հայաստանի կրկնակի գավաթակիր և սուպերգավաթակիր է:
Գևորգ Ղազարյանը շուրջ 10 տարի բացակայել էր «Փյունիկից»՝ հանդես գալով արտերկրի տարբեր ակումբներում: Եվ ահա անցյալ տարվա ամռանը նա վերադարձավ հարազատ կոլեկտիվ՝ ստանձնելով թիմի ավագի պարտականությունները: Հենց առաջին իսկ խաղում փորձառու ֆուտբոլիստը գրավեց ԲԿՄԱ-ի դարպասը՝ խփելով ՀՀ առաջնություններում հոբելյանական՝ 50-րդ գնդակը: Ցավոք, վնասվածքի պատճառով Գևորգը ստիպված էր բաց թողնել առաջնության աշնանային հատվածի մեծ մասն ու մրցաշարի ավարտական հանդիպումները:
Ֆուտբոլային կարիերայում 500-ից ավելի խաղ անցկացրած Ղազարյանի համար ընթացիկ մրցաշրջանն ավարտվեց 6-րդ ոսկե մեդալի նվաճմամբ: Այդ ցուցանիշով նա հավասարվեց նախկին փյունիկցիներ Արթուր Մկրտչյանին, Վարդան Մինասյանին, Լևոն Փաչաջյանին, Աղվան Մկրտչյանին և Նորայր Սահակյանին: Յուրօրինակ ռեկորդակիրը «Փյունիկի» բազմամյա նախկին ավագ Սարգիս Հովսեփյանն է, որը 10 անգամ չեմպիոն է հռչակվել: Ռաֆայել Նազարյանն ու Վալերի Ալեքսանյանը ՀՀ յոթակի չեմպիոններ են:
35-ամյա Գրիգոր Մելիքսեթյանը համալրեց Հայաստանի քառակի չեմպիոնների ցանկը: Նախկինում նա 2007-2009թթ. ոսկե մեդալի էր արժանացել հենց «Փյունիկում»:
Ուրոշ Նենադովիչն ու Արտակ Դաշյանը դարձան եռակի չեմպիոններ: Նրանք միասին մեծագույն հաջողության բերկրանքը վայելել էին «Ալաշկերտում» 2016/17, 2017/18թթ. մրցաշրջաններում:
Դավիթ Յուրչենկոն, Տիագո Գալվաոն և Հովհաննես Հարությունյանը 2-րդ ոսկե մեդալը կստանան: Առաջին երկուսը նախորդ մրցաշրջանում չեմպիոն էին դարձել «Ալաշկերտում», իսկ Հարությունյանը 2019/20թթ. առաջնության հաղթող «Արարատ-Արմենիայի» կազմում էր: «Փյունիկի» մյուս ֆուտբոլիստներն առաջին անգամ չեմպիոն հռչակվեցին:
Եղիշե Մելիքյանի մարզչական կարիերայի առաջին տիտղոսը հայկական ֆուտբոլում
«Փյունիկն» իսկական մարզական սխրանք գործեց: Առաջնության աշնանային հատվածի ավարտին փյունիկցիները 8 միավորով զիջում էին աղյուսակը գլխավորող «Արարատ-Արմենիային», որի ցուցադրած խաղը հիացմունքի էր արժանանում: Ոմանց կարծիքով առաջնությունում չեմպիոնության հարցը կարելի էր վճռված համարել:
Սակայն ձմռան տրանսֆերային պատուհանի ժամանակ «Փյունիկը» զգալիորեն ուժեղացրեց կազմը, որի շնորհիվ առաջնության գարնանային հատվածում պարզապես գերազանց ելույթներ ունեցավ՝ 16 հանդիպումներում վաստակելով 42 միավոր: Միայն 3 թիմի՝ «Վանին», «Արարատ-Արմենիային» և «Ուրարտուին» հաջողվեց «Փյունիկի» հետ մրցավեճում մեկական միավոր վաստակել:
«Փյունիկի» հաջողությունում մեծ է թիմի գլխավոր մարզիչ Եղիշե Մելիքյանի ներդրումը: Ուկրաինայում մարզչական գործունեության զգալի փորձ կուտակած Մելիքյանը հայկական ֆուտբոլում իր բեղմնավոր աշխատանքը սկսեց նախորդ մրցաշրջանում՝ գլխավորելով «Ալաշկերտը»: Առաջնության աշնանային հատվածի ավարտից հետո Մելիքյանն ընդունեց «Փյունիկի» ղեկավարության առաջարկը՝ ստանձնելով թիմի գլխավոր մարզչի պաշտոնը: Նրա նորամուտը «Փյունիկում» կայացել է «Արարատ-Արմենիայի» հետ անցյալ տարվա փետրվարի 21-ին անցկացված առաջնության խաղում, որում 2-1 հաշվով հաղթել էին Դավիդ Կամպանյայի սաները:
Եղիշե Մելիքյանը մարզչական կարիերայում հայկական ֆուտբոլում առաջին տիտղոսը նվաճեց: Նա դարձավ չեմպիոն թիմ պատրաստած 18-րդ մարզիչը: Ռեկորդակիրը Վարդան Մինասյանն է, որի գլխավորած թիմերը 6 անգամ են չեմպիոն հռչակվել («Փյունիկ»՝ 4, «Արարատ-Արմենիա»՝ 2): Խորեն Հովհաննիսյանից, Վարդան Մինասյանից, Սևադա Արզումանյանից, Սարգիս Հովսեփյանից ու Աբրահամ Խաշմանյանից հետո Մելիքյանը 6-րդն է, որ չեմպիոնի տիտղոսին արժանացել է թե որպես ֆուտբոլիստ, թե որպես գլխավոր մարզիչ:
Հիշեցնենք, որ Մելիքյանը 2000թ. չեմպիոնի տիտղոսին է արժանացել Արարատի «Արաքսում», որի կազմում նախորդ առաջնությունում բրոնզե մեդալ էր ստացել: «Բանանցում» էլ 2007թ. դարձել էր Հայաստանի գավաթակիր ու արծաթե մեդալակիր, մինչ այդ էլ 2002թ. բրոնզե մեդալ էր ստացել:
Տիտղոսների արժանացած ընդամենը 13 թիմ
«Փյունիկը» Հայաստանի ամենատիտղոսակիր թիմն է: Հերթական տիտղոսը թիմի պատմության մեջ 32-րդն է: Փյունիկցիները 8 անգամ նվաճել են Հայաստանի գավաթը, 9 անգամ էլ արժանացել են Սուպերգավաթին:
1992թ. կազմավորված նորաստեղծ թիմը, որն այն ժամանակ կրում էր ՀՄԸՄ անվանումը, խաղացող-մարզիչ Խորեն Հովհաննիսյանի գլխավորությամբ «Շիրակի» հետ միասին հռչակվեց հանրապետության առաջին չեմպիոն: Նրա օրոք ևս երկու անգամ (1995/96, 1996/97թթ.) «Փյունիկը» չեմպիոն հռչակվեց:
Երկամյա ընդմիջումից հետո 2001թ. կրկին կազմավորվելով, «Փյունիկն» իր վերադարձը հայկական ֆուտբոլ նշանավորեց 4-րդ չեմպիոնությամբ: Հաջորդ 9 մրցաշրջաններում ևս «Փյունիկը» գերիշխում էր ՀՀ առաջնություններում՝ ոչ մեկին չզիջելով ոսկե մեդալները: Դա յուրօրինակ ռեկորդ է: Եվ ինչպես արդեն նշել ենք, վերջին չեմպիոնությունը «Փյունիկը» տոնել էր 2014/15թթ. առաջնությունում: Հաջորդ 6 մրցաշրջաններում միայն երկու թիմի՝ «Ալաշկերտին» (2015/16-2017/18, 2020/21թթ.) և «Արարատ-Արմենիային» էր (2018/19-2019/20թթ.) հաջողվել նվաճել չեմպիոնական գավաթը:
Մինչ օրս հայկական ֆուտբոլում խաղարկվող 3 մրցանակներին տիրել են ընդամենը 13 թիմեր: «Փյունիկի» առավելությունը տիտղոսակիր մյուս թիմերի նկատմամբ այնքան մեծ է, որ ապագայում դժվար թե որևէ ակումբի հաջողվի նույնիսկ կրկնելու փյունիկցիների ներկայիս արդյունքը:
VNews.am-ը ներկայացնում է հայկական ֆուտբոլում տիտղոսներ նվաճած թիմերի ցուցանիշները:
Թիմեր |
Չ |
Գ |
Ս |
ԸՆԴ |
1. «Փյունիկ» |
15 |
8 |
9 |
32 |
2. «Շիրակ» |
4 |
2 |
5 |
11 |
3. «Ալաշկերտ» |
4 |
1 |
3 |
8 |
4. «Արարատ» |
1 |
6 |
1 |
8 |
5. «Միկա» |
- |
6 |
2 |
8 |
6. «Արաքս» |
2 |
2 |
1 |
5 |
7. «Ուրարտու» |
1 |
3 |
1 |
5 |
8. «Արարատ-Արմենիա» |
2 |
- |
1 |
3 |
9. «Նոա» |
- |
1 |
1 |
2 |
10. «Երևան» |
1 |
- |
- |
1 |
11. «Ուլիս» |
1 |
- |
- |
1 |
12. «Գանձասար-Կապան» |
- |
1 |
- |
1 |
13. «Նորավանք» |
- |
1 |
- |
1 |