Շարունակում ենք Ձեր ուշադրությանը ներկայացնել ֆիլմեր, որոնք ցանկալի է դիտել ծանր և բարդ հոգեբանական շրջանում։ Ֆիլմեր, որոնք հույս են տալիս, մոտիվացնու են և ներշնչում միայն դրականն ու բարին, անգամ եթե խոսում են կյանքի անկայուն շրջանների մասին։
Շոն Փենի ռեժիսորական աշխատանքը, վերջին տարիների ամենահաջողակ շվեդական ֆիլմերից մեկն ու մեր դարի լավագույն ֆրանսիական դրամաներից ամենաչարաճճին ու երաժշտականը, որը պատմում է գիշերօթիկ դպրոցի սաների մասին, ովքեր ապրում են իրենց կյանքի կարևորագույն՝ կազմավորման շրջանը։
En man som heter Ove / «Ուվեի երկրորդ կյանքը», 2015
Ավանդաբար կարծրատիպ–կարծիք է ձևավորվել, որ շվեդների ազգային արսենալի մեջ են մտնում սառը շփումը, մեկուսացումը, անվստահությունն օտարների նկատմամբ։ Սցենարիստ և ռեժիսոր Հաննես Հոլմի «Ուվեի երկրորդ կյանքը» շվեդական դրամեդին (դրամա + քոմեդի) հենց այդ առանձնահատկությունների մասին է. այն պատմում է միջին վիճակագրական թոշակառու Ուվեի մասին, ով հավերժ փնթփնթում է, բողոքում հարևաններից և կատաղության մեջ ընկնում նետված աղբի առկայության փաստից: Ուվեն ապրում է իր վերջին օրերը՝ երազելով սիրելի կնոջ մոտ՝ անդրշիրիմյան աշխարհ տեղափոխվելու մասին։ Այնուամենայնիվ, մի քանի իրադարձություններ ստիպում են ծերունուն վերանայել իր տեսակետները, արժևորել կյանքն ու անգամ գտնել ու բացել կեցության երկրորդ շունչը:
Les Choristes / «Խմբերգիչները», 2004
Հետպատերազմյան Ֆրանսիա, 1949 թվական: Կլեմենտ Մաթյուն, անհաջող կոմպոզիտոր է , հումանիստ և պարզապես բարեսիրտ անձնավորություն, ով աշխատանք է ստանում տղաների գիշերօթիկ դպրոցում, աշխատելու է բարդ պատանիների համար: Տեսնելով հաստատության բարքերը՝ սառը պատժախցերում և պարտադրված հանձնարարություններով, Մաթյուն որոշում է կազմակերպել իր սեփական կրթական պրակտիկան՝ ստեղծելով պարտադիր արտադասարանական գործունեություն երգչախումբ։ Այդ կերպ փոխելով բազմաթիվ բարդ դեռահասների արժեհամակարգն ու նպատակները, էնտուզիաստով և լավատեսությամբ լի ուսուցիչն արձանագրում է զգալի առաջընթաց, չնայած բազմաթիվ խոչընդոտների։
Into the Wild / «Վայրի պայմաններում», 2007
Շոն Փենի ռեժիսորական ֆիլմի գլխավոր հերոսը 22 ամյա ուսանող Քրիստոֆերն է (Էմիլ Խիրշ), որը ծնվել է հարուստ ընտանիքում, ուստի միշտ ունեցել է ամեն ինչ, ինչ անհրաժեշտ էր անհոգ կեցության համար։ Բայց անկախանալով և հասունանալով՝ Քրիստոֆերը հասկացավ, որ ուզում է ապրել այնպես, ինչպես ուզում է՝ բացարձակ այլ կերպ: Ազդվելով ամերիկացի էսսեիստ և փիլիսոփա Ռալ Ուալդո Էմերսոնի աշխատություններից՝ երիտասարդը հրաժարվում է նյութական արժեքներից՝ իր ամբողջ ունեցվածքը՝ 24,000 դոլարի խնայողությունները նվիրաբերելով բարեգործության։ Այնուհետև ուղևորվում է Արկտիկական շրջանի մերձակայք՝ քաղաքակրթությունից հեռու հասարակ կյանքի մարտահրավերներին դիմակայելու համար: Այսպիսով, նա հայտնվում է Ալյասկայում, որտեղ և որոշում է մնալ: