86 կգ քաշային Ռաֆայել Հովհաննիսյանը շարունակում է Երևանում ընթացող բռնցքամարտի Եվրոպայի առաջնության մեդալների համար պայքարը։
Մեր մարզիկը 1/8 եզրափակիչում վստահ առավելության հասավ բուլղարացի Կրիստիան Դիմիտրով-Ստեֆանովի նկատմամբ։ Հովհաննիսյանն ակտիվ էր ամբողջ մենամարտի ընթացքում և ինքն էր պայմաններ թելադրում մրցակցին։ Միայն վերջում բուլղարացին իրավիճակը փրկելու փորձ կատարեց, որը, սակայն, չպսակվեց հաջողությամբ։
Հովհաննիսյանն անցավ քառորդ եզրափակիչ, որում մայիսի 27-ի երեկոյան կմրցի անցյալ տարվա աշխարհի առաջնության բրոնզե մրցանակակիր բելգիացի Վիկտոր Շելստրատի հետ։
Առաջնությանը մասնակցող Հայաստանի 13 բռնցքամարտիկներից երեքն արդեն ավարտել են պայքարը։ Այսօր Վախթանգ Հարությունյանը (75 կգ) 1/8 եզրափակիչում միավորներով զիջեց Գերմանիան ներկայացնող Բոակի Կևին Շչումանին։ Նախօրեին Ջանիկ Սահակյանը (54 կգ) և Նարեկ Զախարյանը (71 կգ) նույն փուլում պարտվել էին համապատասխանաբար Ուկրաինան ներկայացնող Ելմիր Նաբիևին և սլովակ Միխալ Թաքակսին։
Քառորդ եզրափակիչ է դուրս եկել նաև Համբարձում Հակոբյանը (80 կգ), որը երեկ հաղթել էր մոլդովացի Դմիտրի Կոսցյուկին։ Այսօր՝ երեկոյան, Կարեն Տոնականյանը (60 կգ) 1/8 եզրափակիչում մրցելու է հունգարացի Ռոլանդ Վերեշի հետ։
Առաջնության մենամարտերը կարող եք դիտել «Վիվառո սպորտ պլուս» և «Վիվառո Արենա» հեռուստաալիքներով:
