«Միստեր ռոբոտ» հեռուստասերիալում հաքերի մարմնավորելուց հետո (2015-2019) Ռամի Մալեքը կարիերայի կտրուկ աճ է ունեցել, որը հակասում է «հաջողություն մեկ գիշերում» տերմինին (Մալեքը մոտ տասնամյակ խաղացել է ֆիլմերում, նախքան սերիալի մեկնարկը)։
2018 թվականի «Բոհեմյան ռապսոդիա» ֆիլմում Ֆրեդի Մերկուրիին մարմնավորելը դերասանին «Օսկար» մրցանակի է արժանացրել։ Միանշանակ ոչ ոք չի կարող փոխարինել Queen-ի լեգենդար ֆրոնտմենին, բայց Ռամին ավելի քան փայլուն կերպով իր կախարդանքով գրավել է միլիոնավոր մարդկանց սրտերն այդ կենսագրական ֆիլմում։
Ռամի Մալեքը նկարահանվել է նաև «James Bond»-ի «No Time To Die» մասում՝ մարմնավորելով չարագործի՝ մարդասպան Լյուցիֆեր Սաֆինի կերպարը՝ որպես անարխիստ, ահաբեկիչների առաջնորդ, ինքնակոչ գիտնական։
Այսօր՝ դերասանի 41-ամյակի առթիվ, եկեք պարզենք, թե ով է Մալեքն իրականում։
Երբ կարդում ես Մալեքի կենսագրությունը, թվում է, թե նա ստեղծվել է Ֆրեդի Մերկուրիի դերի համար։ Ռամին ծնվել է Լոս Անջելեսում՝ Կահիրեից գաղթականների ընտանիքում, մանուկ հասակում ծնողների հետ խոսում էր արաբերեն, իսկ կինոյում աշխատելու առաջին տարիներին մարմնավորում էր բացառապես արաբ տղաների։ Հիշեցնենք, որ Ֆարրուխ Բուլսարան (իսկական անունը՝ Ֆրեդի Մերկուրի) ծնվել է Զանզիբարում՝ պարսերի ընտանիքում, դպրոցն ավարտել է Հնդկաստանում և սկսել է երաժշտություն սովորել ընտանիքով Լոնդոն տեղափոխվելուց հետո։
Ռամի Մալեքն ասում է, որ իր կերպարին հասկանալն ու փորձառություններն են օգնել իրեն խաղալ Մերկուրիի դերը. Մերկուրիի ծնողները դեմ էին նրա կարիերային. Մալեքի հարազատները՝ նույնպես։ Ճիշտ այնպես, ինչպես Մերկուրիի ծնողներն էին փորձում օտար ափերում պահպանել իրենց ինքնությունը, Մալեք ընտանիքը, տեղափոխվելով ԱՄՆ, նույնպես փորձում էր պահպանել դա։
«Մանկության տարիներին հայրս ինձ ու եղբորս արթնացնում էր կեսգիշերին և մինչև առավոտ խոսում արաբերեն, որպեսզի մենք չմոռանանք մեր մայրենի լեզուն»,- հարցազրույցներից մեկում ասել է Մալեքը։
Հաջողության ճանապարհը
Ռամի Մալեքն արժանի է իր «Օսկար»-ին. նրա ճանապարհը դեպի Հոլիվուդ հեշտ չէր: Ռամիի հայրն Ամերիկա տեղափոխվելուց առաջ աշխատել է Կահիրեում՝ որպես գիդ, մայրը հաշվապահ էր, իսկ որդուն պատկերացնում էին իրավաբանի պաշտոնում։ Բայց Ռամին երազում էր Հոլիվուդի մասին և նպատակին հասնելու ճանապարհին ոչնչից չէր վախենում․ կես դրույքով աշխատում էր որպես մատուցող և առաքիչ։
Մալեքը կինոյում իր դեբյուտը կատարել է 23 տարեկանում՝ «Gilmore Girls»-ում (Գիլմոր աղջիկները), իսկ ավելի ուշ խաղացել է փարավոնի մի փոքրիկ դեր «Գիշերը թանգարանում» ֆիլմի երեք մասերում, սակայն չի սիրում խոսել այս դերի մասին։
Դերասանը մեկ անգամ չէ, որ դժգոհել է այն փաստից, որ իր կարիերայի առաջին տարիներին պայքարել է կլիշեների դեմ, թե իբրև պետք է միայն եգիպտացիների դերեր խաղա, քանի որ եգիպտացի է։ Թեև, չնայած դրան, 2012 թվականին «Մթնշաղ» սագայի երկրորդ մասում, նա, այնուամենայնիվ, համաձայնել է խաղալ եգիպտական արնախում Բենջամինի դերը:
Դերասանն իր կարիերայի զարգացման համար պարտական է Թոմ Հենքսին և Սթիվեն Սփիլբերգին. 2010-ին նրանք հրավիրեցին այդ ժամանակ անհայտ դերասանի խաղալու The Pacific (Խաղաղ օվկիանոս) ռազմական մինի սերիալում։ Դա Մալեքի առաջին լուրջ նախագիծն էր. պատմություն զինվորների մասին, որոնք կռվում են Խաղաղ օվկիանոսում Երկրորդ համաշխարհային պատերազմի ժամանակ:
«Կարծում էի, որ սա իմ կարիերայի գագաթնակետն է», - հետագայում ասել է Ռամի Մալեքը։ Այն ժամանակ նա նույնիսկ չէր էլ կարող երազել «Բոհեմական ռապսոդիայի» մասին։
«Միստեր ռոբոտ»
Ռամի Մալեքը համաշխարհային համբավ է ձեռք բերել «Միստեր ռոբոտ» սերիալում, որտեղ մարմնավորում էր հեղափոխական հաքերի։ «Միստեր ռոբոտի» համար դերասանն արժանացել է 2 «Emmy» և «առանձնահատուկ խարիզմայով արտիստ» մրցանակներին։ Սերիալը թողարկվել է 2015 թվականին և երկարացվել 4 սեզոնով։
Խաղալով Ֆրեդի Մերկուրիին
Մալեքը պատրաստվում էր Մերկուրիի դերին «Միստեր ռոբոտ» ֆիլմի վերջին սեզոններում նկարահանվելու ժամանակ։ Աշխատանքը հոգնեցուցիչ էր. հարյուրավոր ժամեր տևած վոկալի դասեր և պարապմունք պարուսույցների և մասնագետների հետ, որոնք սովորեցնում էին դերասանին շարժվել «Մերկուրիի նման»՝ նյարդային, անսահման էքսցենտրիկ և անսահման ինքնավստահ:
«Բոհեմական ռապսոդիա»-ի դիմահարդար Յան Սյուելը հարցազրույցներից մեկում խոստովանել է, որ Ռամին այս դերի համար պատրաստ էր ամեն ինչի։ Օրինակ՝ պատրաստ էր կրել վարպետ Քրիս Լայոնսի պատրաստած պրոթեզները։ Դերասանի ամենօրյա կերպարանափոխությունը տևել է երկու ժամ՝ դիմահարդարում, քթի ձևի փոփոխություն, կեղծամ։ Աշխատանքի համար պատասխանատու էր Ալեքս Ռուսը (Fantastic Beasts, Kingsman, Lara Croft, Tomb Raider): Ռուսը պատրաստել է նաև այն բեղերը, որոնք Ռամին կրում է ֆիլմի վերջին հատվածում։
Կինոակադեմիկոսները գնահատեցին ջանքերը. փետրվարի 25-ի գիշերը Մալեքը ստացավ իր առաջին «Օսկար»-ը՝ շնորհակալություն հայտնելով իր ընտանիքին և ընկերուհուն՝ «Բոհեմական ռապսոդիա» ֆիլմում իր գործընկեր Լյուսի Բոյնթոնին աջակցության համար։
Ոճը
Ռամի Մալեքին անչափ սազում է սպիտակը: Կարմիր գորգերի համար նա հաճախ է ընտրում Dior Homme ձյունաճերմակ սմոքինգները: Հոլիվուդյան հայտնի ոճաբան Իլարիա Ուրբանտին չի վախենում փորձերից և հաճախ է առաջարկում դերասանին կրել հագեցած երանգներով հագուստ՝ բորդո, պողպատե կամ մուգ կապույտ։
Ռամի Մալեքն ունի երկվորյակ եղբայր՝ Սամի Մալեք անունով։
Մալեքի երկվորյակ եղբայրը՝ Սամին, սովորում էր Կալիֆորնիայի համալսարանում, մինչդեռ Ռամին որոշեց հաճախել Ինդիանայի Էվանսվիլի համալսարանը: Մի անգամ երբ Սամին հասկացավ, որ պետք է մենախոսություն կատարի հունական ողբերգությունից և ժամանակ չուներ այն սովորելու, նրան փոխարինեց Ռամին, ով արդեն ուսումնասիրել էր առարկան իր դրամատիկական ծրագրի համար: Ռամին հայտնվել էր Սամիի կերպարանքով՝ արտասանելու տողերը:
