Մադրիդի «Ռեալի» տնօրեն Էմիլիո Բուտրագենյոն «Վալենսիայի» դեմ խաղից հետո քննադատել է գլխավոր մրցավարին աջակցող տեսակրկնությունների համակարգի աշխատանքը:
Հիշեցնենք, որ «Ռեալը» «Մեստալյայում» զիջել է 1-4 հաշվով:
«Խաղի սկիզբը լավն էր: Մենք ավելի լավ մեկնարկեցինք: Սա վերաբերում է առաջին երեսուն րոպեներին:
Հետո պատահական դրվագի արդյունքում մրցակիցը հավասարեցրեց հաշիվը: Երկրորդ գոլի դրվագում էլ միջամտեց VAR-ը: Ես հասկանում եմ, որ համակարգը հենց միջամտելու համար է: Մրցավարները, թերևս, պետք է դիտեին ամբողջ գրոհի դրվագը՝ Ասենսիոյի նկատմամբ կանոնների խախտումը տեսնելու համար:
Երկրորդ կեսում նորից 11-մետրանոց նշանակվեց: Ես զարմացած էի, քանի որ կարծում էի, որ կանոնների խախտում կնշանակվի, սակայն մեր օգտին: Իսկ հետո ամեն ինչ ավելի վատացավ, երբ մեր դարպասին նշանակվեց 3-րդ 11-մետրանոցը»,- Marca-ն մեջբերում է Բուտրագենյոյի խոսքը: