Մյունխենի «Բավարիան» շարունակում է տարբերակներ դիտարկել՝ թիմի առաջատար Ռոբերտ Լևանդովսկիին փոխարինելու համար. լեհ հարձակվողը մտադիր է տեղափոխվել կատալոնական «Բարսելոնա»:
Իսպանական AS-ի հաղորդմամբ՝ «Բավարիայի» տրանսֆերային թիրախում է «Մանչեսթեր Յունայթեդի» և Պորտուգալիայի հավաքականի 37-ամյա հարձակվող Կրիշտիանու Ռոնալդուն:
Գերմանական գրանդը Լևանդովսկիի հեռանալու դեպքում մտադիր է ձեռք բերել Ռոնալդուի տրանսֆերային իրավունքը: Ավելի վաղ հաղորդվում էր, որ Ռոնալդուն կարող է վերադառնալ Թուրինի «Յուվենտուս»:
2021/2022 մրցաշրջանում Կրիշտիանուն «Մանչեսթեր Յունայթեդի» կազմում բոլոր մրցաշարերում անցկացրած 39 խաղում խփել է 24 գոլ և կատարել 3 արդյունավետ փոխանցում։ Պորտուգալացու պայմանագիրն անգլիական ակումբի հետ գործում է մինչև 2023 թվականի ամառ: