«Մանչեսթեր Յունայթեդի» հարձակվող Կրիշտիանու Ռոնալդուն և «Ռեալը» կարող են վերամիավորվել՝ հայտնում է Mirror-ը:
Աղբյուրի հաղորդմամբ՝ «Արքայական ակումբում» դիտարկում են այս տարբերակը` հաշվի առնելով, որ պորտուգալացին հերթական լավ մրցաշրջանն է անցկացնում (37 խաղ, 23 գոլ):
Ավելի վաղ նշվում էր, որ 37-ամյա ֆուտբոլիստը նույնպես դեմ չէ մադրիդյան ակումբ վերադառնալուն:
Կրիշտիանուի ակումբային գրանցումը փոխելու ևս մեկ շարժառիթ կարող է հանդիսանալ այն, որ «կարմիր սատանաներն», ամենայն հավանականությամբ, չեն մասնակցի Չեմպիոնների լիգայի հաջորդ խաղարկությանը:
Նշենք, որ Ռոնալդուի՝ «Մանչեսթեր Յունայթեդի» հետ գործող պայմանագրի ժամկետը նախատեսված է մինչև 2023 թվականը՝ ևս մեկ տարով երկարաձգելու հնարավորությամբ:
«Ոսկե գնդակի» հնգակի դափնեկիրը «սերուցքայինների» գույները պաշտպանել է 2009-2018 թվականներին և ակումբի հետ նվաճել է 15 տիտղոս: