Ֆրիդան իր դրամատիկ կյանքով և հանճարեղ կտավներով շատերի սրտում է։ Իր կյանքի ամենադրամատիկ օրերերը նա անցկացրել է Մեխիկոյի Կոյոական շրջանում գտնվող հայրական տանը, որը հայտնի է որպես Կապույտ տուն (La Casa Azul)։
Տունը, որտեղ ծնվել է Ֆրիդան, որտեղ նա երկար ամիսներ տառապել է ավտովթարից հետո, որտեղ նա վերադարձավ Դիեգո Ռիվերայից բաժանվելուց հետո, որտեղ նա նոր կյանք սկսեց նրա հետ, վերամիացավ, և որտեղ էլ նա մահացավ 1954-ի հուլիսին, անվերջ պատմում է այս հանճարեղ կնոջ կյանքի մասին։
Ֆրիդայի հայրը՝ Գիլերմո Կալոն, այս տունը կառուցել է 1904 թվականին։ Հետագայում այն գնել է Ֆրիդայի ամուսինը՝ Դիեգո Ռիվերան՝ վճարելով հիփոթեքը և պարտքը, որը Ֆրիդայի հայրը կուտակել էր 18 տարեկանում դժբախտ պատահարի պատճառով տառապող Ֆրիդային բժշկական օգնություն հասցնելու համար։
Տունը սկզբնապես շատ ավելի փոքր է եղել, քան հիմա: Իրենց ամուսնության հետագա տարիների ընթացքում Ռիվերան և Կալոն մեծ աշխատանք են կատարել ճարտարապետ Ճուան Օգորմանի հետ միասին։
Տան նոր թևը ներառում էր Ֆրիդայի ստուդիան եւ ննջարանը: Ֆրիդայի մահից չորս տարի անց, La Casa Azul-ը վերածվեց թանգարանի: Այն զարդարված է մեքսիկական ժողովրդական արվեստով և պարունակում է Ֆրիդայի և Դիեգոյի անձնական իրերը, այնտեղ ապրած ժամանակից:
Թանգարանում են գտնվում նկարչուհու մի քանի գեղանկարներ, անձնական իրեր, գրքեր և նախակոլումբյան արձանիկների անձնական հավաքածուն, Դիեգո Ռիվերայի և այլ արվեստագետների աշխատանքներ, մեքսիկական ժողովրդական արվեստի գործեր, նախաիսպանական ձեռագործ աշխատանքներ, լուսանկարներ, հուշամատյաններ։
Լուսանկարներն արված են «Կապույտ տուն» թանգարանում։
Լուսանկարները՝ Արտյոմ Լևոնյանի