Այսօր Սպորտի միջազգային օրն է, որը ՄԱԿ-ի Գլխավոր ասամբլեայի որոշմամբ նշվում է 2013 թվականից և պաշտոնապես կոչվում է Սպորտի միջազգային օր՝ հանուն զարգացման և խաղաղության։ Այդ առիթով VNews-ի հետ զրույցում մարզաշխարհին շնորհավորել է Օլիմպիական խաղերի կրկնակի արծաթե մեդալակիր, աշխարհի ու Եվրոպայի կրկնակի չեմպիոն, ռեկորդակիր, ծանրորդ Սիմոն Մարտիրոսյանը։
«Այսօր լավ օր է։ Բոլոր մարզիկներին առաջին հերթին մաղթում եմ առողջություն և հաջողություն կյանքում ու սպորտում։ Համախմբվե՛նք ընդհանուր գաղափարի շուրջ և միահամուռ ջանքերով զարգացնենք հայրենի սպորտը»,- VNews-ի թղթակցին ասաց Սիմոն Մարտիրոսյանը։
Նա նշեց, որ իր անձնական նպատակները մնում են անփոփոխ. «Պայքարելու եմ աշխարհի չեմպիոնի կոչման համար և, իհարկե, մտադիր եմ լավագույնս ներկայանալ առաջիկա Օլիմպիական խաղերին։ Ամեն ինչ դեռ առջևում է։ Օլիմպիական քաշային կարգերի փոփոխությունը որևէ կերպ չի խախտել իմ ծրագրերը. շարունակելու եմ հետամուտ լինել նպատակիս իրականացմանը։ Վստահ եմ, որ ամեն ինչ լավ է լինելու»։
25-ամյա մարզիկը նշեց նաև, որ արդեն բուժել է վնասվածքները և հագեցած ու որակյալ մարզումներ է անցկացնում։ Նա վստահեցրեց, որ միանշանակ լավ մարզավիճակում է մոտենալու Եվրոպայի առաջնությանը։
Ընթերցեք նաև՝
- Արթուր Դավթյանը շնորհավորել է Սպորտի միջազգային օրվա կապակցությամբ և ներկայացրել տարվա իր գլխավոր թիրախները (ֆոտո)
- Մալխաս Ամոյանը շնորհավորել է Սպորտի միջազգային օրվա կապակցությամբ, անդրադարձել իր հաղթանակին և գլխավոր նպատակին (ֆոտո)
- Էլինա Դանիելյանը միացել է Սպորտի միջազգային օրվա կապակցությամբ շնորհավորանքներին և խոստացել հաղթական լուրեր ապահովել (ֆոտո)
- Հովհաննես Բաչկովը շնորհավորել է մարզաշխարհի մարդկանց և խոսել առաջիկա ծրագրերից