Հունիսի 15-ը հոբելյանական էր Վանաձորի Հովհաննես Աբելյանի անվան պետական դրամատիկական թատրոնում։ Թատրոնի ներկայացուցիչները հավաքվել էին ՀՀ վաստակավոր արտիստ Սոկրատ Աքմաքչյանի հուշաքարի մոտ՝ նշելու ռեժիսորի 100-ամյակը:

Ներկա էին Սոկրատ Աքմաքչյանի հարազատները, թատրոնի աշխատակազմը, մտավորականներ, հյուրեր։ 

Հիշատակի և գնահատանքի խոսք ասաց թատրոնի գեղարվեստական ղեկավար, ՀՀ ժողովրդական արտիստ Վահե Շահվերդյանը։ Նա արժևորեց Ս․ Աքմաքչյանի անուրանալի վաստակը Վանաձորի թատրոնի 90-ամյա տարեգրության մեջ։ 

Երախտիքի ու գնահատանքի խոսքեր ասացին ՀՀ ժողովրդական արտիստներ Հակոբ Ազիզյանն ու Ռոզա Մխիթարյանը՝ ընդգծելով Աքմաքչյանի բեմադրությունների կարևորությունն իրենց՝ որպես դերասանի կայացման գործում։

Նույն օրը երեկոյան տեղի ունեցավ Ալեքսանդր Շիրվանզադեի «Չար ոգի» ներկայացումը։ 

Մինչ ներկայացումը, բացման խոսքով հանդես եկավ Վանաձորի դրամատիկական թատրոնի գեղարվեստական ղեկավար, ՀՀ ժողովրդական արտիստ Վահե Շահվերդյանը։ Նա ողջունեց հանդիսատեսին, խոսեց Աքմաքչյանի բեմադրությունների մասին և մաղթեց բարի դիտում։