«Բավարիան» այսօր պաշտոնական հարցում է կատարել «Լայպցիգին»` ակումբի գլխավոր մարզիչ Յուլիան Նագելսմանին մյունխենյան ակումբ հրավիրելու հնարավորության վերաբերյալ՝ հաղորդում է Sportbuzzer-ը:
Աղբյուրի տեղեկություններով՝ վերջին ժամերին այս հարցի վերաբերյալ մեծ թվով քննարկումներ են եղել:
«Լայպցիգը» պատրաստ է հրաժարվել իր գլխավոր մարզչի ծառայություններից՝ թույլ տալով միանալ Գերմանիայի ամենատիտղոսակիր թիմին, սակայն ակնկալում է բավական խոշոր փոխհատուցում դրա դիմաց:
Նագելսմանի ու «Լայպցիգի» պայմանագրի ժամկետը լրանում է 2023 թվականին: Եթե Նագելասմանը տեղափոխվի «Բավարիա», ամենայն հավանականությամբ, «Լայպցիգի» ղեկը կստանձնի «Զալցբուրգի» գլխավոր մարզիչ Ջեսի Մարշը:
Հիշեցնենք, որ ավելի վաղ «Բավարիայի» գլխավոր մարզիչ Հանսի Ֆլիկը հայտարարել է, որ մրցաշրջանի ավարտից հետո լքելու է գերմանական ակումբը: Մյունխենյան ակումբը պաշտոնական հաղորդագրությամբ անդրադարձել է գլխավոր մարզչի հայտարարությանը:
Ըստ մի շարք աղբյուրների՝ Ֆլիկը գլխավորելու է Գերմանիայի հավաքականը:
