Մադրիդի «Ատլետիկոյի» և Ուրուգվայի հավաքականի հարձակվող Լուիս Սուարեսն իր ծառայություններն առաջարկել է Թուրինի «Յուվենտուսին»՝ տեղեկացնում է La Gazzetta dello Sport-ը: Աղբյուրի համաձայն՝ ուրուգվայցին ցանկանում է կարիերան շարունակել Մասիմիլիանո Ալեգրիի գլխավորած թիմում։
Նշվում է, որ «Յուվենտուսն» արդեն սկսել է ակտիվորեն ուսումնասիրել Սուարեսի հետ պայմանագիր կնքելու հնարավորությունը։ Եթե ակումբը չկարողանա համաձայնության գալ Մադրիդի «Ատլետիկոյի» հետ Ալվարո Մորատայի տրանսֆերի հարցում, ապա Սուարեսը կդառնա «Ծեր սինյորայի» գլխավոր տրանսֆերային թիրախը՝ հարձակման գիծն ուժեղացնելու համար:
Ավելի վաղ մադրիդյան գրանդը հայտարարել էր, որ 35-ամյա հարձակվողի հետ հունիսի 30-ին ավարտվող պայմանագիրը չի երկարաձգվի: