Ինչպես արդեն տեղեկացրել ենք, «Բարսելոնան» Լա լիգայի 4-րդ տուրում սեփական հարկի տակ 5-2 հաշվով առավելության է հասել «Վալենսիայի» նկատմամբ: Մրցավեճը տեղի է ունեցել «Կամպ Նոու» ստադիոնում:
Կատալոնական թիմի հարձակվող Լուիս Սուարեսն այդ խաղում դարձել է դուբլի հեղինակ՝ մրցակցի դարպասը գրավելով 61-րդ և 82-րդ րոպեներին: Ուրուգվայցի ֆուտբոլիստն առաջին գոլը տոնել է մատները խաչելով և «X» տառը ցույց տալով: Սուարեսն այդկերպ հարգել է թիմի նախկին գլխավոր մարզիչ Լուիս Էնրիկեի դստեր հիշատակը: Այս մասին հաղորդում է RAC1-ը:
Հիշեցնենք՝ 9-ամյա Շանան 5 ամիս շարունակ ոսկորների քաղցկեղի դեմ պայքարելուց հետո կյանքից հեռացել էր օգոստոսի 29-ին: Դելֆինան՝ Սուարեսի աղջիկը, եղել է Շանայի համադասարանցին:
Էնրիկեն այս տարվա հունիսի 19-ին ընտանեկան հանգամանքների պատճառով լքել էր Իսպանիայի հավաքականի գլխավոր մարզչի պաշտոնը: Նա «Բարսելոնան» գլխավորել է 2014-2017թթ․, թիմն իսպանացի մասնագետի օրոք 2014/15թթ․ մրցաշրջանում ձևակերպել է չեմպիոնական թրեբլ: Սուարեսը կատալոնական թիմ է տեղափոխվել հենց այն ժամանակ, երբ թիմը գլխավորում էր Էնրիկեն:
Սուարես. «Նեյմարն ամեն ինչ արեց վերադառնալու համար»
