Երևանում ընթացող Եվրոպայի ամառային թիմային գավաթի խաղարկության երկրորդ խաղում թենիսի մինչև 14 տարեկանների Հայաստանի հավաքականը 2։1 հաշվով Սլովակիայի հասակակիցներին հաղթելուց հետո 5-6-րդ տեղերը կվիճարկի լեհ պատանիների հետ։

Հաշվետու հանդիպման ելքը վճռել են մենախաղում Միքայել Ավանեսյանի հաղթանակը Լեոն Սլոբոդայի նկատմամբ (6։1, 6։1) և զուգախաղում Ավանեսյանի ու Դավիթ Պողոսյանի հաջողությունը Շիմոն Դիոսիի ու Լեոն Սլոբոդայի հետ մրցավեճում (6։2, 6։2)։ Մինչև այդ Պողոսյանը 0։6, 1։6 հաշվով պարտվել էր Պիտեր Զավացկուն։

Առաջին խաղում Հայաստանի հավաքականը 0։3 հաշվով պարտություն էր կրել Գերմանիայի թիմից։ Մայրաքաղաքի «Ինկորտ» թենիսի ակումբում անցկացվող մրցաշարին մասնակցում է 8 հավաքական։ Ստուգատեսն ավարտվելու է հունիսի 29-ին։

Եվրոպայի ամառային թիմային գավաթի խաղարկության որակավորման մրցումները Հայաստանից բացի անցկացվում են նաև Չեխիայում, Ֆրանսիայում և Իսպանիայում: Որակավորման բոլոր չորս մրցաշարերի հաղթողները հուլիսի 1-3-ը իսպանական Վալենսիա քաղաքում մասնակցելու են եզրափակիչ փուլին: