Տիգրան Պետրոսյանի անվան շախմատի տանն ընթացող Հայաստանի Բարձրագույն խմբի տղամարդկանց առաջնությունը մոտենում է վերջնագծին: Նախավերջին՝ 10-րդ տուրը կարող էր անվանել նոր չեմպիոնին: Սակայն չեմպիոնության համար պայքարը չափից դուրս սրվեց ու հասավ իր գագաթնակետին:
Այդ ամենի պատճառը Տիգրան Պետրոսյանն էր, որը պարտության մատնելով մրցաշարի միանձնյա առաջատար Մանուել Պետրոսյանին, խառնեց չեմպիոնի տիտղոսի հավակնորդների խաղաքարտերը:
Մանուել Պետրոսյանը մրցաշարում առաջին պարտությունը կրեց, ինչը կարող է շատ թանկ նստել երիտասարդ գրոսմայստերի վրա: Ճիշտ է, Մանուելին հետապնդող շախմատիստներից ոչ մեկին չհաջողվեց միավորներով հավասարվել նրան, սակայն ընդհուպ մոտեցան առաջատարին:
Եվ այսպես, վաղը կայանալիք ավարտական տուրից առաջ Մանուել Պետրոսյանը 7 միավորով շարունակում է գլխավորել մրցաշարային աղյուսակը: 6,5-ական միավորով նրան հետապնդում են Հայկ Մարտիրոսյանն ու Շանթ Սարգսյանը:
Մարտիրոսյանը հաղթեց Հովհաննես Գաբուզյանին, Սարգսյանը հաշտություն կնքեց Արման Փաշիկյանի հետ:
6 միավոր ունեցող Սամվել Տեր-Սահակյանը պարտվեց Մամիկոն Ղարիբյանին: Տիգրան Հարությունյանը հաղթեց Արման Միքայելյանին, Դավիթ Շահինյանի հաշվին հաղթանակ գրանցվեց Զավեն Անդրիասյանի հետ չկայացած մրցախաղում:
Ավարտական տուրում չեմպիոնության համար պայքարում վճռորոշ կլինեն Արման Միքայելյան-Մանուել Պետրոսյան, Սամվել Տեր-Սահակյան-Տիգրան Հարությունյան, Արման Փաշիկյան-Հայկ Մարտիրոսյան, Տիգրան Պետրոսյան-Շանթ Սարգսյան մրցախաղերը: