Էստոնիայի մայրաքաղաքում ավարտվեց գեղասահքի Եվրոպայի առաջնությունը, որին մասնակցում էին նաև Հայաստանի պատվիրակները։
Պեկինի ձմեռային Օլիմպիական խաղերին պատրաստվող Թինա Կարապետյան - Սիմոն Սենեկալ պարային զույգը եզրափակիչ անցած 20 երկյակների հաշվարկում գրավեց 13-րդ տեղը։
Կարճ և կամավոր ծրագրերի ընդհանուր արդյունքով նրանք 168,43 միավոր գրանցեցին իրենց անվան դիմաց՝ տեղեկացնում է առաջնության պաշտոնական կայքը։
Կարճ ծրագրում Հայաստանի զույգը 14-րդն էր 26 մասնակիցների հաշվարկում, իսկ կամավորում՝ 11-րդը։
Եվրոպայի չեմպիոն հռչակվեց Ռուսաստանը ներկայացնող Վիկտորիա Սինիցինա - Նիկիտա Կացալապով զույգը։ Արծաթե և բրոնզե մրցանակակիրներն են համապատասխանաբար Ալեքսանդրա Ստեպանովա - Իվան Բուկին (Ռուսաստան) ու Շառլին Գինյար - Մարկո Ֆաբրի (Իտալիա) երկյակները։
Ավելի վաղ Սլավիկ Հայրապետյանը տղամարդկանց մենասահքի 33 մասնակիցների հաշվարկում գրավել էր 24-րդ տեղը։