Շաբաթվա ամփոփումը «Վիվառո նյուզի» հետ: Հաղթական ու հիասթափեցնող, տպավորիչ ու հիշարժան պահերով լի շաբաթ հայկական սպորտում:
Լեգենդի հրաժեշտը
Ամենասպասված ֆուտբոլային պատմական հանդիպումը, որի շուրջ բուռն քննարկումները սկսվել էին ու շարունակվեցին ոչ միայն նախորդ շաբաթ: Սա ընկերական խաղ էր, բայց ոչ հերթական ու սովորական: 19 տարի, 94 խաղ հավաքականի կազմում անցկացրած Ռոման Բերեզովսկու հրաժեշտի, Հենրիխ Մխիթարյանի ավագության, չհրավիրված ֆուտբոլիստների ու նոր երիտասարդ ֆուտբոլիստների նորամուտի խաղ:
Երկրպագուների ջերմ ընդունելությունը, Ռոման Բերեզովսկուն նվիրված մեծ պաստառներն ու իհարկե ամենահուզիչը՝ հրաժեշտը: Հայաստան Բելառուս հանդիպումը թեև գոլառատ չէր, բայց ամենադրամատիկ խաղերից մեկն էր: Անգամ խաղադաշտ ներխուժեց երկրպագուներից մեկը: Բայց սա էմոցիոնալ պիկը չէր:
Լեգենդի հրաժեշտը ուղեկցվեց, նաև նվերներով ու պարգևատրություններով: ՀՖՖ նախագահ Ռուբեն Հայրապետյանը Բերեզովսկուն նվիրեց Toyota Land Cruiser ավտոմեքենա, ֆուտբոլիստի՝ յուղաներկով պատրաստված նկարը, իսկ Երևանի քաղաքապետ Տարոն Մարգարյանը պարգևատրեց քաղաքապետարանի ոսկե մեդալով։
Խորհրդանշական 7 րոպե դարպասը պաշտպանելուց հետո, երկրպագուների հոտնկայս ծափահարությունների ներքո Ռոման Բերեզովսկին իր տեղը զիջեց երիտասարդ դարպասապահ Արսեն Բեգլարյանին։