«Ռոմայի» նախկին հարձակվող Ֆրանչեսկո Տոտին հայտարարել է, որ «Յուվենտուսի» հարձակվող Պաուլո Դիբալային կփորձի համոզել տեղափոխվել հռոմեական ակումբ։
«Տեսնենք՝ կկարողանա՞մ նրան Հռոմ հրավիրել։ Մենք երկուշաբթի կհանդիպենք, և ես նրան կփորձեմ համոզել։ Մենք Միլանում բարեգործական խաղի ենք մասնակցելու, և ես կփորձեմ նրան խորհուրդներ տալ։
Կփորձեմ ինչ-որ բան նրան հասցնել, հուսով եմ՝ կկարողանամ։ Բայց սա այն դեպքում, եթե «Ռոման» ու ես համակարծիք լինենք»,- Տոտիի խոսքն է հաղորդում Goal-ը։
Դիբալայի պայմանագրի ժամկետը թուրինյան ակումբի հետ լրանում է 2022 թվականի հունիսին։ Հաղորդվում էր, որ «Ինտերը» 28-ամյա արգենտինացուն 4 տարվա պայմանագիր է առաջարկել՝ տարեկան 6 մլն եվրո աշխատավարձով։
Ընթացիկ մրցաշրջանում Դիբալան «Յուվենտուսի» կազմում անցկացրած 36 խաղում դարձել է 15 գոլի ու 6 գոլային փոխանցման հեղինակ։