«Չելսիի» գլխավոր մարզիչ Թոմաս Տուխելն ակնկալում է այս տրանսֆերային պատուհանին իր թիմում տեսնել առնվազն 5 նոր խաղացողի՝ հայտնում է The Telegraph-ը:
«Չելսին» ցանկանում է ձեռք բերել «Սևիլիայի» և «Յուվենտուսի» կենտրոնական պաշտպաններ համապատասխանաբար Ժյուլ Կունդեին և Մատեյս դե Լիխտին, որոնք կփոխարինեն թիմից հեռացած Անտոնիո Ռյուդիգերին և Անդրեաս Քրիստենսենին:
Պաշտպանությունն ուժեղացնելու համար «թոշակառուները» մտադիր են ձեռք բերել նաև գերմանական «Շտուտգարտի» և Խորվաթիայի հավաքականի ձախեզրային պաշտպան Բորնա Սոսային: Լոնդոնյան թիմից առաջիկայում կարող է հեռանալ նաև իսպանացի ձախեզրային պաշտպան Մարկոս Ալոնսոն, որի ծառայություններով լրջորեն հետաքրքրված է կատալոնական «Բարսելոնան»:
Լոնդոնյան ակումբը նոր մրցաշրջանից առաջ մտադիր է ուժեղացնել նաև հարձակման գիծը: Տուխելը ցանկանում է «Չելսիում» տեսնել «Բարսելոնայի» և «Մանչեսթեր Սիթիի» վինգերներ համապատասխանաբար Ուսման Դեմբելեին և Ռահիմ Ստեռլինգին:
Դեմբելեի պայմանագիրը «Բարսայի» հետ գործում է մինչև հունիսի 30-ը, որի ժամկետը, ըստ տարբեր աղբյուրների, կողմերը չեն երկարաձգի: Հաղորդվում է, որ այս պահին Դեմբելեի համար տրանսֆերային պայքարում «Չելսին» ֆավորիտ է:
Ստեռլինգի պայմանագիրը «Մանչեսթեր Սիթիի» հետ գործում է մինչև 2023 թվականի ամառ: Նշվում է, որ Անգլիայի հավաքականի ֆուտբոլիստը դեմ չէ այս ամառ փոխել ակումբային գրանցումը:
