VNews-ը շարունակում է VBET Հայաստանի Պրեմիեր լիգայի հոբելյանական՝ 30-րդ առաջնության մասնակից թիմերի ելույթների ամփոփումը: Այսօր կանդրադառնանք «Ուրարտուին»:

1. VBET Հայաստանի Պրեմիեր լիգայի հոբելյանական՝ 30-րդ առաջնությունն «Ուրարտուն» ավարտեց 5-րդ հորիզոնականում: Ռոբերտ Արզումանյանի գլխավորությամբ անցկացրած 32 հանդիպումներում «Ուրարտուն» վաստակեց  40 միավոր (9 հաղթանակ, 13 ոչ-ոքի, 10 պարտություն, խփած և բաց թողած գոլեր՝ 37-32), ինչը հնարավոր միավորների 41,6 տոկոսն է:

«Սևանի» հետ չեղարկված երկու հանդիպումներում «Ուրարտուն» 4 միավոր էր վաստակել (4-1, 0-0): Փաստորեն, «Ուրարտուն» առաջնության մասնակից թիմերից բոլորից շատ տուժեց «Սևանի» լուծարումից:

Հիշեցնենք, որ նախորդ առաջնությունում «Ուրարտուն» Ռոբերտ Արզումանյանի գլխավորությամբ թիմի պատմության մեջ 7-րդ անգամ դարձել էր բրոնզե մրցանակակիր:

2. «Ուրարտուն» առաջնության աշնանային հատվածն ավարտել էր 6-րդ հորիզոնականում՝ անցկացրած 14 հանդիպումներում վաստակելով 16 միավոր (4 հաղթանակ, 4 ոչ-ոքի, 6 պարտություն, խփած և բաց թողած գոլեր՝ 15-16), ինչը հնարավոր միավորների 38,1 տոկոսն է: 

Առաջնության գարնանային հատվածում անցկացրած 18 հանդիպումներում թիմը վաստակեց 24 միավոր (5 հաղթանակ, 9 ոչ-ոքի, 4 պարտություն, խփած և բաց թողած գոլեր՝ 22-16), ինչը հնարավոր միավորների 44,4 տոկոսն է: 

---

VNews-ի ընտրանին՝

1. «Արարատ-Արմենիան» թեև չեմպիոն չդարձավ, սակայն գերազանցեց իր նախկին չեմպիոնական ցուցանիշները. թիմի ելույթների ամփոփումը՝ 10 փաստով
2. «Ալաշկերտի» պատմության մեջ ամենաանհաջող մեկնարկը չխանգարեց 3-րդ տարին անընդմեջ մրցանակակիր դառնալուն. թիմի ելույթների ամփոփումը՝ 10 փաստով
3. «Արարատը» կրկին մրցանակակիր չդարձավ, ինչը վերջին անգամ տեղի էր ունեցել 14 տարի առաջ. թիմի ելույթների ամփոփումը՝ 10 փաստով

---

3. Սեփական դաշտում անցկացրած 16 հանդիպումներում «Ուրարտուի»  օգտին 21 միավոր գրանցվեց (5 հաղթանակ, 6 ոչ-ոքի, 5 պարտություն, խփած և բաց թողած գոլեր՝ 18-12), ինչը հնարավոր միավորների 43,7 տոկոսն է: Սեփական հարկի տակ «Ուրարտուն» պարտվել է «Փյունիկին» (0-2, 0-1), «Նոային» (0-1), «Արարատին» (1-2) և «Արարատ-Արմենիային» (1-2):

Հյուրընկալվելիս անցկացրած 16 հանդիպումներում թիմի օգտին գրանցվեց հնարավոր միավորների 39,5 տոկոսը (4 հաղթանակ, 7 ոչ-ոքի, 5 պարտություն, խփած և բաց թողած գոլեր՝ 19-20): Մրցակցի հարկի տակ «Ուրարտուին» հաջողվել է հաղթանակներ տոնել ԲԿՄԱ-ի  (2-1, 4-1), «Նորավանքի» (1-0) և «Վանի» (3-0)   նկատմամբ:

4. «Ուրարտուն» առաջնությունում  7 խաղ անընդմեջ անպարտելի մնաց (2 հաղթանակ, 5 ոչ-ոքի), կրեց 3 անընդմեջ պարտություն, 4 խաղ ընթացավ առանց հաղթանակի, 340 րոպե շարունակ չգտավ մրցակիցների դարպասի բանալին:

32 հանդիպումներից 11-ում թիմի դարպասն անառիկ մնաց, 10 խաղում էլ «Ուրարտուի» ֆուտբոլիստները չկարողացան գրավել մրցակիցների դարպասը:

«Ուրարտուն» խոշոր հաշվով 4 հաղթանակ տոնեց («Նորավանք»՝  3-0, ԲԿՄԱ ՝ 5-0, 4-1, «Վան»՝ 3-0): Թիմն այդ կարգի միակ պարտությունը կրեց «Արարատ-Արմենիայից»՝ 3 անպատասխան գնդակ ընդունելով սեփական դարպասը: 

2021թ. հոկտեմբերի 21-ին «Նորավանքի»  հետ կայացած խաղը VBET ՀՊԼ-ում «Ուրարտուի» հոբելյանական՝ 650-րդ հանդիպումն էր: Իսկ նոյեմբերի 17-ին ԲԿՄԱ-ի դարպասը Ջոնել Դեսիրեի խփած առաջին գոլը VBET ՀՊԼ-ում թիմի հոբելյանական՝ 1200-րդ գնդակն էր: Այս տարվա ապրիլի 28-ին արարատցի Դավիթ Մանոյանի խփած գնդակը VBET ՀՊԼ-ում «Ուրարտուի» բաց թողած 750-րդ գոլն էր:

Առավել հաջող «Ուրարտուն» հանդես եկավ ԲԿՄԱ-ի դեմ՝ հաղթելով 4 խաղերում էլ: Իսկ ամենաանհարմար մրցակիցը երկրի չեմպիոն «Փյունիկն» էր, որի հետ խաղերում «Ուրարտուն» ընդամենը մեկ միավոր վաստակեց: Բացի ԲԿՄԱ-ից, «Ուրարտուին» հաջողվել է հաղթել նաև «Վանին» (3 անգամ) և «Նորավանքին» (2):

5. «Ուրարտուի» մասնակցությամբ հանդիպումներում նշանակվել է 11մ 11 հարված, որից իրացվել է 10-ը: «Ուրարտուի» օգտին նշանակված 11մ 7 հարվածներից իրացվել է 6-ը:

Արթուր Միրանյանը նպատակին է հասցրել բոլոր 5 հարվածներն էլ՝ խոցելով Արման Մելիքսեթյանի («Վան»), Արման Ներսեսյանի (ԲԿՄԱ), Վարդան Շահատունու («Նոա»), արարատցի Վսևոլոդ Երմակովի և Դավիթ Պապիկյանի («Վան») պաշտպանած դարպասները:

Մեկ դիպուկ հարված էլ կատարել է Ջոնել Դեսիրեն՝ գրավելով նորավանքցի Հենրի Ավագյանի պաշտպանած դարպասը: Իսկ ահա Լիվիո Միլթսը չի կարողացել հաղթող դուրս գալ «Նոայի» դարպասապահ Գրիգորի Մաթևոսյանի հետ մենամարտում:  

«Ուրարտուի» դարպասին նշանակված 11մ 4 հարվածներն էլ իրացվել են: «Արարատ-Արմենիայի» ռմբարկու Մաիլսոն Լիման մեկական անգամ խոցել է Անատոլի Այվազովի և Արսեն Բեգլարյանի պաշտպանած դարպասները: «Նոայի» հարձակվող Մաքսիմ Մայրովիչն էլ երկու անգամ հաղթող է դուրս եկել Արսեն Բեգլարյանի հետ մենամարտերում:

6. Առաջնության 32 հանդիպումներում «Ուրարտուն» 37 գոլ խփեց՝ ցույց տալով 6-րդ արդյունքը մասնակից թիմերի մեջ: Գոլերի հեղինակներ դարձան 11 ֆուտբոլիստներ: Սերգեյ Մկրտչյանը, Նարեկ Գրիգորյանը, Գոռ Լուլուկյանը, Նարեկ Աղասարյանը, Դմիտրո Խլյոբասն ու Սամվել Հակոբյանը բացեցին գոլերի հաշիվն «Ուրարտուի» կազմում:

Առաջնությունում բոլորից արդյունավետ գործեց Արթուր Միրանյանը՝ 10 գոլով առաջին անգամ ճանաչվելով թիմի լավագույն ռմբարկու: Ընդ որում բոլոր գոլերն էլ նա խփել է առաջնության գարնանային հատվածում, ինչը լավագույն արդյունքն է փյունիկցի Ուգո Ֆիրմինոյի և նորավանքցի Իբրահիմ Շուեյբուի հետ:

Միրանյանի արդյունքը լավագույնն է վերջին 6 առաջնությունների «Ուրարտուի» ռմբարկուների մեջ: Մինչ այդ նման արդյունավետությամբ աչքի էր ընկել բրազիլացի Լաերսիոն՝ 2015/16թթ. առաջնությունում ևս խփելով 10 գոլ:

 7. Ուգոչուկվու Իվուն 7 գնդակով ընդգրկվեց «Ուրարտուի» ամենաարդյունավետ լեգեոնականների տասնյակում: Իսկ Օլեգ Պոլյակովն (31 տարեկան 180 օրական) ընդգրկվեց VBET ՀՊԼ-ում «Ուրարտուի» կազմում հանդես եկած ամենատարեց լեգեոնականների տասնյակում՝ ցանկից դուրս մղելով Դու Բալային (31 տարեկան 143 օրական): 32-ամյա Պոլյակովն «Ուրարտուի» կազմում անցկացրած խաղերի քանակով (49) գերազանցեց Բորիսլավ Յովանովիչի տարիքային ռեկորդը, որն այդ տարիքում 31 խաղի էր մասնակցել:   

Նախորդ առաջնությունում 8 գոլով թիմի լավագույն ռմբարկու դարձած Ջոնել Դեսիրեն ընդամենը 4 անգամ գրավելով մրցակիցների դարպասները, 12 գնդակով եզրափակեց «Ուրարտուի» ամենաարդյունավետ լեգեոնականների հնգյակը (Բրունո Կորեա, Դու Բալա՝ 16-ական, Լաերսիո՝ 13, Բետո՝ 12 գոլ):

8. «Ուրարտուի»  դարպասը պաշտպանեցին 2 դարպասապահներ: Արսեն Բեգլարյանն անցկացրած 24 հանդիպումներում 22 գոլ բաց թողեց (միջինը մեկ խաղում՝ 0,91 գոլ), 9 անգամ դարպասն անառիկ պահեց:

Եթե հաշվենք նաև «Սևանի» հետ չեղարկված խաղը, որում գոլազուրկ ոչ-ոքի էր գրանցվել, ապա Բեգլարյանը 10 «չոր» խաղով անձնական ռեկորդ սահմանեց «Ուրարտուի» կազմում: Մինչ այդ լավագույն արդյունքը նա ցույց էր տվել նախորդ առաջնությունում՝ 18 հանդիպումներից 9-ում դարպասն անառիկ պահելով:

Անատոլի Այվազովն անցկացրած 8 հանդիպումներում 10 գոլ բաց թողեց (միջինը մեկ խաղում՝ 1,25 գոլ), 2 անգամ դարպասն անառիկ պահեց: Նա այլազգի դարպասապահների մեջ ռեկորդակիր է Բարձրագույն խմբում անցկացրած հանդիպումների (118) և դարպասն անառիկ պահած խաղերի քանակով (47): 

9. Առաջնությունում «Ուրարտուի» կազմում հանդես եկած ամենատարեց ֆուտբոլիստները 31-ամյա Օլեգ Պոլյակովն (31 տարեկան 180 օրական) ու Վադիմ Պարամոնովն էին (31 տարեկան 71 օրական): 18-ամյա Խարիտոն Այվազյանն ամենաերիտասարդ ֆուտբոլիստն էր:

Բարձրագույն խմբում անցկացրած խաղերի ընդհանուր քանակով (184) «Ուրարտուի»  ամենափորձառու ֆուտբոլիստը դարպասապահ Արսեն Բեգլարյանն էր: 

Հակոբ Հակոբյանը VBET ՀՊԼ-ում «Ուրարտուի» կազմում անցկացրած խաղերի քանակով (155) թիմի ամենափորձառու ֆուտբոլիստն էր: 25-ամյա Հակոբյանը գերազանցեց Վալտեր Պողոսյանի տարիքային ռեկորդը, որն այդ տարիքում թիմի կազմում բոլորից շատ՝ 146 խաղի էր մասնակցել:

Նոր մրցաշրջանում Հակոբ Հակոբյանը կարող է դառնալ թիմի ռեկորդակիրն «Ուրարտուի» կազմում VBET ՀՊԼ-ում անցկացրած խաղերի քանակով՝ գերազանցելով Արամ Բարեղամյանի ռեկորդային ցուցանիշը (180 խաղ): Առայժմ Հակոբյանից ավելի շատ խաղերի են մասնակցել նաև Սամվել Մելքոնյանը (172), Արարատ Առաքելյանը (171) և Գագիկ Դաղբաշյանը (163):

10. Ռոբերտ Արզումանյանն առաջնության 34 հանդիպումներում (ներառյալ նաև «Սևանի» հետ չեղարկված 2 խաղերը) ասպարեզ դուրս բերեց 30 ֆուտբոլիստների, որոնցից 13-ն այլազգի էին: 

7 ֆուտբոլիստներ՝  Նանա Կվամե Անտվին, Նարեկ Աղասարյանը, Լիվիո Միլթսը, Սերգեյ Մկրտչյանը, Դմիտրո Խլյոբասը, Արման Ղազարյանը և Սամվել Հակոբյանը նորամուտը նշեցին «Ուրարտուի» կազմում:

Առաջնության հանդիպումներում «Ուրարտուի» ֆուտբոլիստները 48 անգամ զգուշացվել են, Լիվիո Միլթսը, Նանա Կվամե Անտվին և Էդգար Գրիգորյանը մեկական անգամ հեռացվել են խաղադաշտից: Առավել հաճախ՝ 5-ական անգամ դեղին քարտի են արժանացել Ուգոչուկվու Իվուն, Պյոտր Տենը, Ջոնել Դեսիրեն և Էդգար Գրիգորյանը: 

VNews-ը ներկայացնում է «Ուրարտուի» ֆուտբոլիստների ցուցանիշները հոբելյանական առաջնությունում (ներառյալ նաև «Սևանի» հետ չեղարկված 2 խաղերը):

Ֆուտբոլիստներ	Խաղ	Գոլ	Զ (Հ)
1. Նարեկ Աղասարյան	34	1	2
2. Օլեգ Պոլյակով	32	5	-
3. Ուգոչուկվու Իվու	31	5	5
4. Կարեն Մելքոնյան	30	4	-
5. Սերգեյ Մկրտչյան	30	2	2
6. Հակոբ Հակոբյան	29	-	3
7. Նանա Կվամե Անտվի	29	-	1 (1)
8. Ջոնել Դեսիրե	27	4	5
9. Արսեն Բեգլարյան	25	-22	3
10. Էդգար Գրիգորյան	24	-	5 (1)
11. Արթուր Միրանյան	22	10	2
12. Պյոտր Տեն	20	-	5
13. Վադիմ Պարամոնով	20	-	1
14. Նարեկ Գրիգորյան	18	4	3
15. Արմեն Մանուչարյան	18	-	-
16. Անան Մենսահ	15	-	1
17. Դմիտրո Խլյոբաս	13	3	-
18. Գոռ Լուլուկյան	13	2	1
19. Սալոմոն Նիրիսարիկեն	13	-	-
20. Խարիտոն Այվազյան	13	-	2
21. Արման Ղազարյան	13	-	2
22. Լիվիո Միլթս	11	-	1 (1)
23. Ժիրայր Մարգարյան	10	-	2
24. Անատոլի Այվազով	9	-11	-
25. Էրիկ Վարդանյան	6	-	1
26. Վիտինյո	4	-	-
27. Սամվել Հակոբյան	3	1	-
28. Տիգրան Այունց	3	-	1
29. Պետեր Զիլու Մուտումուսի	2	-	-
30. Ռոբերտ Բաղրամյան	1	-	-