Այսօր Սպորտի միջազգային օրն է, որը ՄԱԿ-ի Գլխավոր ասամբլեայի որոշմամբ նշվում է 2013 թվականից և պաշտոնապես կոչվում է Սպորտի միջազգային օր՝ հանուն զարգացման և խաղաղության։ Այդ առիթով VNews-ի հետ զրույցում մարզաշխարհին շնորհավորել է սպորտային մարմնամարզության օղակների վրա վարժության Աշխարհի գավաթի այս տարվա խաղարկության ընդհանուր հաշվարկի հաղթող, Եվրոպական խաղերի և Եվրոպայի փոխչեմպիոն Վահագն Դավթյանը։
«Մեր բոլոր մարզիկներին, մարզաշխարհի մարդկանց մաղթում եմ առողջություն և բազում հաղթանակներ։ Ցանկանում եմ, որ ունենանք հաղթանակներով և հաջողություններով ուրախանալու անհամար առիթներ»,- VNews-ին իր մաղթանքն է ներկայացրել Վահագն Դավթյանը։
Նա նշել է, որ այս փուլում ավելի շատ վարպետությունը կատարելագործելու և վարժությունը հղկելու խնդիր ունի։ «Հիմա մեր մարզաձևում մի փոքր մրցակցային դադար է, սակայն մարզումները շարունակվում են։ Ոգևորիչ են Աշխարհի գավաթի փուլերում մեր գրանցած լավ արդյունքները։ Հիմա պետք է շտկենք մրցումների ընթացքում նշմարված թերությունները և լավագույնս պատրաստվենք Եվրոպայի առաջնությանը։
Բոլորիս միակ նպատակն է հասնել լավ մարզավիճակի և գրանցել առավելագույնս բարձր արդյունքներ։ Ամենայն հավանականությամբ, վարժությունս էապես չեմ սրբագրի, նոր տարր չեմ ընդգրկի դրանում։ Եթե կարողանամ գեթ մի փոքր բարելավել ներկայիս ցուցանիշս, կհամարեմ, որ արդյունավետ աշխատանք եմ կատարել»,- նշեց 33-ամյա մարմնամարզիկը։
Նա հավելեց, որ մրցաշրջանն իսկապես հաջող է սկսվել, սակայն վերջնական եզրակացություն հնարավոր կլինի անել հաջորդիվ նախատեսված կարևորագույն մեկնարկներից հետո։ Դավթյանը վստահեցրեց՝ վճռական ու մարտական է տրամադրված՝ հասնելու մարզական նոր բարձունքների։
Ընթերցեք նաև՝
- Արթուր Դավթյանը շնորհավորել է Սպորտի միջազգային օրվա կապակցությամբ և ներկայացրել տարվա իր գլխավոր թիրախները (ֆոտո)
- Մալխաս Ամոյանը շնորհավորել է Սպորտի միջազգային օրվա կապակցությամբ, անդրադարձել իր հաղթանակին և գլխավոր նպատակին (ֆոտո)
- Հովհաննես Բաչկովը շնորհավորել է մարզաշխարհի մարդկանց և խոսել առաջիկա ծրագրերից
- Սիմոն Մարտիրոսյանը շնորհավորում է Սպորտի միջազգային օրվա կապակցությամբ և վստահեցնում՝ իր նպատակները չեն փոխվել
- Էլինա Դանիելյանը միացել է Սպորտի միջազգային օրվա կապակցությամբ շնորհավորանքներին և խոստացել հաղթական լուրեր ապահովել (ֆոտո)