VBET Հայաստանի գավաթի 31-րդ խաղարկության եզրափակչում երկու թիմերի մարզիչներն էլ՝ Ռոբերտ Արզումանյանն ու Վահե Գևորգյանը մարզչական կարիերայում առաջին անգամ էին պատվավոր մրցանակի համար վճռորոշ խաղում իրենց սաների գործողությունները ղեկավարում:
Ավելի հաջողակ գտնվեց Վահե Գևորգյանը, որը մարզչական կարճատև կարիերայի ընթացքում իր սաների հետ առաջին տիտղոսը նվաճեց՝ «Նորավանքին» դարձնելով Հայաստանի գավաթակիր:
Վահե Գևորգյանը «Նորավանքի» ղեկը ստանձնել էր թիմի կազմավորման օրից: Հետաքրքիր է, որ Բարձրագույն խմբում նա նորամուտը նշել էր հենց «Ուրարտուի» հետ անցյալ տարվա օգոստոսի 1-ին կայացած խաղում, որում մրցակիցը հաղթել էր 3-0 հաշվով:
Վահե Գևորգյանը դարձավ գավաթակիր թիմ պատրաստած 21-րդ մարզիչը: Նա նման հաջողության հասած ամենաերիտասարդ 2-րդ մարզիչն է: Եզրափակիչ խաղի օրը Գևորգյանը 34 տարեկան 229 օրական էր: Ռեկորդակիրը Վարդան Բիչախչյանն է, որը 2012թ. «Շիրակին» գավաթակիր էր դարձրել 34 տարեկան 203 օրականում:
Գավաթի մրցաշարերի ամենատիտղոսակիր մարզիչը Վարուժան Սուքիասյանն է, որի գլխավորած թիմերն առավել հաճախ՝ 6 անգամ հանդես են եկել գավաթի եզրափակչում ու 4 անգամ նվաճել են պատվավոր մրցանակը: Ընդ որում Սուքիասյանը գավաթային բարձունքի է հասցրել 3 թիմի (1992թ.` «Բանանց», 1998-1999թթ.` «Ցեմենտ», 2008թ.` «Արարատ»):
Անցյալ տարի Վարուժան Սուքիասյանից հետո Վարդան Բիչախչյանը դարձավ մեկից ավելի թիմերի գավաթակրի տիտղոսին արժանացրած երկրորդ մարզիչը: Նրա գլխավորությամբ «Արարատը» 13 տարի անց կրկին նվաճեց Հայաստանի գավաթը: Եվ հատկանշական է, որ մինչ այդ վերջին հաջողությանն արարատցիները հասել էին հենց Վարուժան Սուքիասյանի օրոք:
Գավաթակիր թիմ պատրաստած 21 մարզիչներից 5-ն այլազգի մասնագետներ են: Գավաթի նվաճման բերկրանքն իրենց սաների հետ կիսել են արգենտինացի Օսկար Լոպեսը, ռումինացի Միխայ Ստոյկիցան, չեխ Յան Պոշտուլկան, իսպանացի Տիտո Ռամալյոն և մոլդովացի Իգոր Պիկուշչակը:
VNews.am-ը ներկայացնում է այն 21 մարզիչների ցանկը, որոնց բախտ է վիճակվել իրենց սաների հետ Հայաստանի գավաթով պատվո շրջան կատարել մարզադաշտում:
Մարզիչներ |
Գավաթ |
Ակումբներ |
Մրցաշրջան |
1.Վարուժան Սուքիասյան |
4 |
«Բանանց», «Ցեմենտ», «Արարատ» |
1992, 1998-1999, 2008 |
2.Վարդան Բիչախչյան |
3 |
«Շիրակ», «Արարատ» |
2012, 2016/17, 2020/21 |
3.Արմեն Սարգսյան |
2 |
«Արարատ» |
1993-1994 |
4.Էդուարդ Մարգարով |
2 |
«Միկա» |
2000-2001 |
5.Արմեն Ադամյան |
2 |
«Միկա» |
2005-2006 |
6.Վարդան Մինասյան |
2 |
«Փյունիկ» |
2009-2010 |
7.Սարգիս Հովսեփյան |
2 |
«Փյունիկ» |
2013/14, 2014/15 |
8.Սամվել Դարբինյան |
1 |
«Արարատ» |
1995 |
9.Խորեն Հովհաննիսյան |
1 |
«Փյունիկ» |
1996 |
10.Արկադի Անդրեասյան |
1 |
«Արարատ» |
1997 |
11.Օսկար Լոպես |
1 |
«Փյունիկ» |
2002 |
12.Սուրեն Բարսեղյան |
1 |
«Միկա» |
2003 |
13.Միխայ Ստոյկիցա |
1 |
«Փյունիկ» |
2004 |
14.Յան Պոշտուլկա |
1 |
«Բանանց» |
2007 |
15.Արմեն Շահգելդյան |
1 |
«Միկա» |
2011 |
16.Ռաֆայել Նազարյան |
1 |
«Փյունիկ» |
2012/13 |
17.Տիտո Ռամալյո |
1 |
«Բանանց» |
2015/16 |
18.Աշոտ Բարսեղյան |
1 |
«Գանձասար-Կապան» |
2017/18 |
19.Աբրահամ Խաշմանյան |
1 |
«Ալաշկերտ» |
2018/19 |
20.Իգոր Պիկուշչակ |
1 |
«Նոա» |
2019/20 |
21.Վահե Գևորգյան |
1 |
«Նորավանք» |
2021/22 |