«Վալենսիայի» հեռանկարային հարձակվող Ռաֆա Միրը պաշտոնապես տեղափոխվել է անգլիական «Վուլվերհեմփթոն», որը հանդես է գալիս հզորությամբ 2-րդ լիգայում՝ Չեմպիոնշիփում:
20-ամյա ֆուտբոլիստն իր նոր ակումբի հետ ստորագրել է 4,5 տարվա պայմանագիր և կրելու է 9 համարի մարզաշապիկը: Ըստ ոչ պաշտոնական տեղեկությունների՝ Միրի տեղափոխության համար «Վուլվերհեմփթոնը» վճարել է 2 մլն եվրո:
Ավելի վաղ կային տեղեկություններ, որ տաղանդավոր ֆուտբոլիստի ծառայություններով հետաքրքրված է նաև Մադրիդի «Ռեալը», սակայն Միրն ընտրություն է կատարել հօգուտ անգլիական ակումբի, քանի որ այն մարզում է Նունո Սանտոն, ում օրոք 2015թ.-ին իր առաջին պաշտոնական խաղն էր անցկացրել «Վալենսիայի» գլխավոր թիմում:
Հավելենք, որ Միրն ընթացիկ մրցաշրջանի առաջին հատվածում «Վալենսիա Բ»-ի կազմում անցկացրել է 19 խաղ և դարձել 15 գոլի հեղինակ: