Ընթացիկ մրցաշրջանում «Արարատ-Արմենիայի» հաջող մրցելույթներում իր զգալի ներդրումն ունի նաև թիմի իտալացի դարպասապահ Վալերիո Վիմերկատին, որը ԲԿՄԱ-ի հետ խաղում էլ դարպասն անառիկ պահեց: 

ԲԿՄԱ-ի հետ մրցավեճն առաջնության 6-րդ անընդմեջ հանդիպումն էր, որում Վալերիո Վիմերկատին գոլ բաց չթողեց՝ դարպասն անառիկ պահելով 582 րոպե շարունակ: Առաջնությունում վերջին գոլը Վիմերկատին բաց է թողել անցյալ տարվա նոյեմբերի 6-ին «Նորավանքի» հետ կայացած խաղի 48-րդ րոպեին Սերգեյ Օռլովի հարվածից հետո: 

Այսպիսով, Վալերիո Վիմերկատին ընդգրկվեց դարպասապահների խորհրդանշական «500-ի ակումբում»: Նա նաև գերազանցեց իր թիմակից Դմիտրի Աբակումովի ցուցանիշը, որին 2018թ. հաջողվել էր դարպասն անառիկ պահել 533 րոպե շարունակ՝ ցույց տալով լավագույն արդյունքն «Արարատ-Արմենիայում» հանդես եկած դարպասապահների մեջ: Իսկ այլազգի դարպասապահներից դարպասն անընդմեջ անառիկ պահած րոպեների քանակով առայժմ Վիմերկատիին գերազանցում է միայն Օգնյեն Չանչարևիչը (594):

Վիմերկատին դարձավ «500-ի ակումբի» 23-րդ անդամը՝ միանգամից տեղ զբաղեցնելով 12-րդ հորիզոնականում: Նշենք, որ 6 դարպասապահների՝ Ֆելիքս Հակոբյանին, Էդիկ Երիցյանին, Արթուր Հովհաննիսյանին, Ստեփան Ղազարյանին, Արսեն Բեգլարյանին և Հարություն Աբրահամյանին հաջողվել է մեկից ավելի անգամ հատել 500 րոպեի սահմանագիծը: Յուրօրինակ ռեկորդակիրը «Շիրակի» նախկին մեկ այլ դարպասապահ Արթուր Հովհաննիսյանն է, որը 4 տարբեր ցուցանիշ ունի գրանցած «500-ի ակումբում»:

Այժմ Վալերիո Վիմերկատին իր առջև նոր խնդիր պետք է դնի ու փորձի նախ հատել 600 րոպեի սահմանագիծը, ապա նաև դառնալու ՀՀ առաջնությունների բացարձակ ռեկորդակիր: Նշենք, որ ներկայումս ռեկորդակիրը «Շիրակի» նախկին դարպասապահ Ռայմոնդ Զադուրյանն է, որը 2002թ. առաջնությունում 755 րոպե շարունակ գոլ բաց չի թողել:

Առաջին խնդիրը լուծելու համար իտալացի դարպասապահին անհրաժեշտ է հաջորդ տուրում «Փյունիկի» հետ կայանալիք մրցավեճում դարպասն անառիկ պահել ընդամենը 18 րոպե:

Իսկ Զադուրյանի ռեկորդը գերազանցելու համար Վիմերկատին առաջիկա երկու հանդիպումներում պետք է 174 րոպե շարունակ դարպասն ամուր փակի տակ պահի: Պարզ է, որ ռեկորդին հավակնելու համար Վիմերկատիին առաջին հերթին անհրաժեշտ է «Փյունիկի» հետ անչափ կարևոր խաղում դարպասն անառիկ պահել:

Հուսալի խաղով և հիանալի սեյվերով աչքի ընկնող իտալացի դարպասապահը Հայաստանում հայտնվեց 2019/20թթ. առաջնության մեկնարկում: «Նոայի» կազմում VBET Հայաստանի Պրեմիեր լիգայում Վիմերկատիի նորամուտը կայացել է 2019թ. օգոստոսի 24-ին Վանաձորում «Լոռիի» հետ խաղում: Արդեն 10-րդ րոպեին Գրիգոր Աղեկյանը գրավել էր նրա պաշտպանած դարպասը:

Այդ միակ գոլն էլ վճռել էր հանդիպման ելքը: Արդեն հաջորդ տուրում, «Ուրարտուի» հետ խաղում Վիմերկատին ՀՀ առաջնություններում առաջին անգամ դարպասն անառիկ պահեց: «Նոայի» կազմում անցկացրած իր առաջին մրցաշրջանում իտալացի դարպասապահը 22 խաղում 23 գոլ բաց թողեց, 8 անգամ դարպասն անառիկ պահեց: Հաջորդ մրցաշրջանն ավելի հաջող էր Վիմերկատիի համար:

Առաջնության 21 հանդիպումներում նա ընդամենը 18 գոլ բաց թողեց, 10 անգամ դարպասն անառիկ պահեց: Ընդ որում 4 խաղ անընդմեջ Վիմերկատին դարպասն ամուր փակի տակ պահեց՝ գոլ բաց չթողնելով 436 րոպե շարունակ: Նշենք, որ դարպասն անառիկ պահած խաղերի քանակով Վիմերկատիի ցուցանիշը լավագույնն էր առաջնության մասնակից դարպասապահների մեջ:

Ընթացիկ առաջնությունում «Նոայից» տեղափոխվելով «Արարատ-Արմենիա», Վիմերկատին հենց «Ալաշկերտի» հետ կայացած մեկնարկային խաղից ստանձնեց թիմի դարպասի պաշտպանությունը: Դմիտրի Գունկոն քաջատեղյակ լինելով «Նոայում» իր նախկին սանի խաղային ունակությունների մասին, Վիմերկատիին լիովին վստահում է նաև «Արարատ-Արմենիայում»՝ պահեստայինների նստարանին թողնելով թիմի նախկին հիմնական դարպասապահ Դմիտրի Աբակումովին:

Վիմերկատին առանց փոխարինման մասնակցել է «Արարատ-Արմենիայի» անցկացրած առաջնության բոլոր 19 հանդիպումներին (ներառյալ նաև «Սևանի» հետ չեղարկված խաղը), որոնցում ընդամենը 11 գոլ է բաց թողել, 12 անգամ դարպասն անառիկ է պահել:

Այս ցուցանիշներով իտալացին ընթացիկ առաջնության ամենահուսալի դարպասապահն է: VNews.am-ը ներկայացնում է դարպասապահների խորհրդանշական «500-ի ակումբի» անդամների ցուցանիշները: