Մեկնարկում է VBET Հայաստանի Պրեմիեր լիգայի 26-րդ տուրը: Ձեր ուշադրությանն ենք ներկայացնում կայանալիք 4 հանդիպումներին վերաբերող ամենահետաքրքիր ու ամենաուշագրավ փաստերը:
«ԱԼԱՇԿԵՐՏ» - ԲԿՄԱ
11 ապրիլի, ժ.15:00, Երևան, «Նաիրի» մարզադաշտ
2 խաղ, որոնցում հաղթել է «Ալաշկերտը», խփած և բաց թողած գոլերի հարաբերակցությունը՝ 4-1
1-ին շրջան. 27.09.2021 «Ալաշկերտ» 2-1 ԲԿՄԱ
Գոլերը՝ 1-0՝ Դավիթ Խուրցիձե 36՛, 1-1՝ Արթուր Սերոբյան 77՛, 2-1՝ Ֆոֆանա Բեկո 82՛:
2-րդ շրջան. 12.12.2021. ԲԿՄԱ 0-2 «Ալաշկերտ»
Գոլերը՝ 0-1՝ Դավիթ Խուրցիձե 19,՛ 0-2՝ Ժոզե Էմբալու 82՛:
«Ալաշկերտ»՝ 4-րդ տեղ (34 միավոր), ԲԿՄԱ՝ 9-րդ տեղ (13 միավոր):
Հետաքրքիր 5 փաստ՝ հանդիպմանն ընդառաջ
1. Առաջնության բրոնզե մեդալների և Կոնֆերենցիաների լիգայի ուղեգրի համար պայքարող «Ալաշկերտը» նախորդ տուրում վերջապես աչքի ընկավ արդյունավետ խաղով՝ 3 անպատասխան գնդակ ուղարկելով «Նորավանքի» դարպասը: Դա ընթացիկ առաջնությունում «Ալաշկերտի» տոնած խոշոր հաշվով 2-րդ հաղթանակն էր: Առաջինը գրանցվել էր «Վանի» նկատմամբ՝ 4-0:
Առաջնության գարնանային հատվածի 8 հանդիպումներում Հայաստանի գործող չեմպիոնն Արամ Ոսկանյանի գլխավորությամբ 13 միավոր է վաստակել: Այդ խաղերից 5-ում «Ալաշկերտի» դարպասն անառիկ է մնացել:
2. Նախորդ տուրը հաղթական էր նաև ԲԿՄԱ-ի համար, որը երկարատև դադարից հետո վերջապես վայելեց հաղթանակի բերկրանքը՝ 3-2 հաշվով պարտության մատնելով «Արարատին»: Դա վերջինիս նկատմամբ ԲԿՄԱ-ի առաջին հաղթանակն էր VBET ՀՊԼ-ի հանդիպումներում: Հաղթանակի համար բանակայիններից 153 օր պահանջվեց: Նախորդ հաղթանակը Ռաֆայել Նազարյանի սաները տոնել էին անցյալ տարվա նոյեմբերի 4-ին՝ նվազագույն հաշվով պարտության մատնելով «Վանին»: Առաջնության գարնանային հատվածում ԲԿՄԱ-ն բավական լավ է հանդես գալիս՝ 7 խաղում վաստակելով նույնքան միավոր:
3. Եթե «Ալաշկերտին» հաջողվի գրավել ԲԿՄԱ-ի դարպասը, ապա կնշի VBET ՀՊԼ-ում 350-րդ գոլի հոբելյանը: Ընթացիկ առաջնությունում ալաշկերտցիներից ամենաարդյունավետը Ժոզե Էմբալուն է, որի հաշվին 5 գոլ է գրանցված:
4. Հանդիպմանը մասնակցելու դեպքում «Ալաշկերտի» կիսապաշտպան Արտակ Եդիգարյանը հայկական ակումբներում և Հայաստանի ազգային ու երիտասարդական հավաքականներում անցկացրած պաշտոնական մրցումներում հոբելյանական՝ 400-րդ խաղը կանցկացնի:
5. Անդրանիկ Ոսկանյանն էլ խաղադաշտ դուրս գալու դեպքում թիմի կազմում 69-րդ խաղը կանցկացնի VBET ՀՊԼ-ում և կընդգրկվի «Ալաշկերտի» ամենափորձառու ֆուտբոլիստների տասնյակում: Այդ ցանկը գլխավորում է Արտակ Գրիգորյանը, որն «Ալաշկերտում» Բարձրագույն խմբում 164 խաղ է անցկացրել:
Դիմակայության լավագույն ռմբարկուն՝
«Ալաշկերտ»՝ Դավիթ Խուրցիձե՝ 2 գոլ:
Հանդիպմանը չի մասնակցի նախորդ տուրում խաղադաշտից հեռացված ալաշկերտցի Վանգու Գոմեն:
«ԱՐԱՐԱՏ» - «ՓՅՈՒՆԻԿ»
11 ապրիլի, ժ.18:00, Երևան, «Հանրապետական» մարզադաշտ
86 խաղ, «Արարատը» հաղթել է 22 անգամ, «Փյունիկը»՝ 44, գրանցվել է 20 ոչ-ոքի, խփած և բաց թողած գոլերի հարաբերակցությունը՝ 83-145
1-ին շրջան. 27.09.2021 «Արարատ» 0-1 «Փյունիկ»
Գոլը՝ 0-1՝ Խոսե Կառաբալլո 26՛:
2-րդ շրջան. 11.12.2021 «Փյունիկ» 2-6 «Արարատ»
Գոլերը՝ 0-1-0-3՝ Սերժ Դեբլե 11՛, 14՛, 22՛, 1-3՝ Ուգո Ֆիրմինո 33՛, 1-4՝ Դմիտրիե Պոբուլիչ 47՛, 1-5՝ Ալիկ Առաքելյան 65՛, 1-6՝ Դմիտրիե Պոբուլիչ 70՛, 2-6՝ Ուգո Ֆիրմինո 88՛, 11մ:
«Արարատ»՝ 3-րդ տեղ (38 միավոր), «Փյունիկ»՝ 2-րդ տեղ (51 միավոր):
Հետաքրքիր 5 փաստ՝ հանդիպմանն ընդառաջ
1. «Արարատն» առաջնությունում 2-րդ անընդմեջ պարտությունը կրեց՝ ավելացված ժամանակում 2-3 հաշվով զիջելով ԲԿՄԱ-ին, որի հետ հանդիպումներում դեռ միավոր չէր կորցրել: Պաշտոնական վերջին 3 հանդիպումներն արարատցիներն անհաջող անցկացրին՝ դուրս մնալով նաև ՀՀ գավաթի խաղարկությունից:
Վերջին անհաջողությունների պատճառով արարատցիները կորցրին «Ալաշկերտի» նկատմամբ ունեցած միավորների զգալի առավելությունը և այժմ նրանց դժվարին պայքար է սպասվում բրոնզե մեդալների և Կոնֆերենցիաների լիգայի ուղեգրի համար:
2. Միջազգային դադարի հետևանքով և խաղացանկի քմահաճույքով «Փյունիկը» 21 օր մնացել էր առանց պաշտոնական հանդիպման: Վերջին խաղը փյունիկցիներն անցկացրել են մարտի 20-ին՝ ավելացված ժամանակում Ժունինյոյի խփած միակ գոլի շնորհիվ կորզելով հաղթանակն «Ուրարտուի» հետ կայացած մրցավեճում: Դրանից հետո «Փյունիկն» ընդամենը մեկ ընկերական հանդիպում է անցկացրել՝ մարտի 30-ին 4-0 հաշվով հաղթելով ԲԿՄԱ-ին: Այդ խաղում գոլերի հեղինակներ են դարձել Բրունո Նասիմենտոն, Սերժ Դեբլեն, Արտակ Դաշյանը և Հիգոր Լեյտեն։
3. Չեմպիոնական մրցավազքում «Փյունիկի» մրցակից «Արարատ-Արմենիան» այս տուրում ազատ է, ուստի փյունիկցիներին հիանալի հնարավորություն է ընձեռվել միավորներով հավասարվելու առաջատարին և նրա հետ անձնական հանդիպումների արդյունքների շնորհիվ շրջանցելու «Արարատ-Արմենիային»:
Անկասկած, Եղիշե Մելիքյանի սաները ջանք ու եռանդ չեն խնայի կատարելու իրենց առջև դրված խնդիրը: Բացի այդ էլ, «Փյունիկը» ձգտելու է ռևանշի հասնել մրցակիցների նախորդ մրցավեճում «Արարատից» 2-6 անսովոր հաշվով կրած պարտության դիմաց: Այդ պարտությամբ ընդհատվել էր «Փյունիկի» 6 անընդմեջ հաղթանակների և անպարտելի 12 խաղերի տպավորիչ շարքը:
4. Առաջնության գարնանային հատվածում «Փյունիկը» պարզապես գերազանց է հանդես գալիս՝ 7 հանդիպումներում վաստակելով 19 միավոր: Միայն «Վանին» է հաջողվել մեկ միավոր վաստակել «Փյունիկի» հետ մրցավեճում: Ճիշտ է, այդ խաղում «Փյունիկը» խուսափեց պարտությունից ավելացված ժամանակում Ուգո Ֆիրմինոյի խփած գոլի շնորհիվ:
Վերջինս դարձել է գարնանային հատվածում «Փյունիկի» հաղթանակների հիմնական կերտողը: Պատահական չէ, որ Ֆիրմինոն ճանաչվել է մարտի լավագույն ֆուտբոլիստ, իսկ Եղիշե Մելիքյանն էլ արդեն 4-րդ անգամ է արժանանում ամսվա լավագույն մարզչի մրցանակին:
5. Առաջնության լավագույն ռմբարկու Սերժ Դեբլեն առաջին անգամ է խաղադաշտ դուրս գալու իր նախկին թիմակիցների դեմ: Ի դեպ, հենց Դեբլեի հեթ-տրիկը վճռորոշ եղավ «Արարատի» համար «Փյունիկին» հաղթելու գործում: Արարատցիների կազմում Դեբլեն 14 գոլի հեղինակ է դարձել և կդառնա թիմի լավագույն ռմբարկուն ընթացիկ առաջնությունում:
Իսկ «Փյունիկում» նա արդեն հասցրել է 4 գոլ խփել, որից 3-ը՝ «Ալաշկերտի» դարպասը: «Փյունիկում» ամենաարդյունավետը Ուգո Ֆիրմինոն է, որի հաշվին 11 գոլ է գրանցված: Դրանցից 5-ը նա խփել է առաջնության գարնանային հատվածում:
Դիմակայության լավագույն ռմբարկուները՝
«Արարատ»՝ Կարեն Բարսեղյան՝ 5 գոլ:
«Փյունիկ»՝ Արսեն Ավետիսյան՝ 9 գոլ:
«ՆՈՐԱՎԱՆՔ» - «ՎԱՆ»
12 ապրիլի, ժ.14:00, Երևան, «Ջունիոր սպորտ» մարզադաշտ
2 խաղ, «Նորավանքը» հաղթել է 1 անգամ, «Վանը»՝ 1, խփած և բաց թողած գոլերի հարաբերակցությունը՝ 1-2
1-ին շրջան. 28.09.2021 «Նորավանք» 1-0 «Վան»
Գոլը՝ 1-0` Սերգեյ Օռլով 23՛:
2-րդ շրջան. 10.12.2021 «Վան» 2-0 «Նորավանք»
Գոլերը՝ 1-0-2-0` Ջոսուե Գաբա 78՛, 80՛:
«Նորավանք»՝ 8-րդ տեղ (14 միավոր), «Վան»՝ 7-րդ տեղ (17 միավոր):
Հետաքրքիր 5 փաստ՝ հանդիպմանն ընդառաջ
1. VBET Հայաստանի գավաթի եզրափակչի ուղեգիր նվաճելուց հետո «Նորավանքին» չհաջողվեց առաջնության հերթական խաղում լուրջ դիմադրություն ցույց տալ «Ալաշկերտին»՝ պարտվելով 0-3 հաշվով: Իսկ մինչ այդ «Նորավանքն» առաջնությունում երկար ընդմիջումից հետո վերջապես վայելել էր հաղթանակի բերկրանքը՝ 3-1 հաշվով պարտության մատնելով «Նոային», որով ընդհատել էր առանց հաղթանակների 14 խաղերի շարքը:
2. Իսկ ահա «Վանը» դուրս մնալով Հայաստանի գավաթի մրցաշարից, առաջնության նախորդ տուրում կարողացավ միավոր վաստակել՝ «Նոայի» հետ մրցավեճն ավարտելով գոլազուրկ ոչ-ոքի: Առաջնության վերջին 4 հանդիպումներում Սևադա Արզումանյանի սաներն անպարտելի են՝ վաստակելով 6 միավոր, հաղթելով «Արարատ-Արմենիային»:
3. Մինչև «Նորավանքի» հետ կայացած 2-րդ շրջանի հանդիպումը «Վանի» ֆուտբոլիստները նախորդ 7 հանդիպումներում չէին գտել մրցակիցների դարպասի բանալին: Եվ ահա «Նորավանքի» հետ խաղում Ջոսուե Գաբան վերջապես գրավեց դարպասը՝ դառնալով դուբլի հեղինակ և ընդհատելով 785 րոպե տևած գոլային երաշտը: Դա ինչպես ընթացիկ առաջնության, այնպես էլ «Վանի» պատմության մեջ գրանցած վատագույն արդյունքն էր:
Իսկ մինչև VBET ՀՊԼ-ում մրցավեճի բռնվելը, մրցակիցները մրցել էին ՀՀ գավաթի նախորդ խաղարկությունում: 2020թ. աշնանը Չարենցավանում կայացած 1/8 եզրափակիչ երկու հանդիպումների ընդհանուր արդյունքով (0-0, 2-0) առավելության էր հասել «Վանը»:
4. Այս խաղում մրցելու են առաջնությունում ամենացածր արդյունավետություն ունեցող թիմերը: «Վանը» 22 խաղում ընդամենը 13 գոլ է խփել («Սևանի» դարպասը խփած 2 գոլերը չեղարկվել են): Թիմում ամենաարդյունավետը Զավեն Բադոյանն է, որի խփած 5 գոլերից մեկը չեղարկվել է:
«Նորավանքի» խփած 16 գոլերից 4-ը բաժին է ընկնում Սերգեյ Օռլովին: Հետաքրքիր է, որ նա Բարձրագույն խմբում իր գոլերի հաշիվը բացել էր հենց «Վանի» հետ կայացած առաջին շրջանի խաղում:
5. Հանդիպմանը մասնակցելու դեպքում «Նորավանքի» հարձակվող Անդրանիկ Քոչարյանը VBET ՀՊԼ-ում հոբելյանական՝ 150-րդ խաղը կանցկացնի: Առաջնության գարնանային հատվածում նա կորցրել է իր տեղը թիմի մեկնարկային կազմում և առայժմ ընդամենը 3 անգամ է փոխարինման մտել: Մինչդեռ առաջնության աշնանային հատվածում Քոչարյանը միայն մեկ խաղ էր բաց թողել՝ մասնակցելով 16 հանդիպման:
Դիմակայության լավագույն ռմբարկուն՝
«Վան»՝ Ջոսուե Գաբա՝ 2 գոլ:
«ՈՒՐԱՐՏՈՒ» - «ՆՈԱ»
12 ապրիլի, ժ.17:00, Երևան, «Ուրարտու-1» մարզադաշտ
11 խաղ, «Ուրարտուն» հաղթել է 3 անգամ, «Նոան»՝ 4, գրանցվել է 4 ոչ-ոքի, խփած և բաց թողած գոլերի հարաբերակցությունը՝ 9-11
1-ին շրջան. 29.09.2021 «Ուրարտու» 0-1 «Նոա»
Գոլը՝ 0-1՝ Վադիմ Պայռելի 90՛:
52-րդ րոպեին Լիվիո Միլթսը («Ուրարտու») չիրացրեց 11մ հարվածը (Գրիգորի Մաթևոսյանը հետ մղեց գնդակը):
2-րդ շրջան. 10.12.2021 «Նոա» 1-1 «Ուրարտու»
Գոլերը՝ 0-1՝ Օլեգ Պոլյակով 73՛, 1-1՝ Յարոսլավ Մատվիենկո 85՛:
«Ուրարտու»՝ 6-րդ տեղ (26 միավոր), «Նոա»՝ 5-րդ տեղ (28 միավոր):
Հետաքրքիր 5 փաստ՝ հանդիպմանն ընդառաջ
1. «Ուրարտուն» հաջողությամբ լուծելով գավաթի եզրափակիչ մտնելու խնդիրը, իսկական ճակատամարտ տվեց «Արարատ-Արմենիային»՝ խաղն ավարտելով մարտական ոչ-ոքիով: Առաջնության վերջին 9 հանդիպումներում «Ուրարտուն» ընդամենը մեկ պարտություն է կրել՝ նվազագույն հաշվով զիջելով «Փյունիկին»: Այդ խաղերում «Ուրարտուն» 11 միավոր է վաստակել:
2. Իգոր Պիկուշչակի գլխավորությամբ «Նոան» առաջնությունում 2-րդ հանդիպումն անցկացրեց՝ գոլազուրկ ոչ-ոքի խաղալով «Վանի» հետ: Իսկ նախորդ խաղում Պիկուշչակն իր վերադարձը թիմ նշանավորել էր «Ալաշկերտի» նկատմամբ նվազագույն հաշվով տոնած հաղթանակով:
3. Վարդան Շահատունու նորամուտը «Նոայում» շատ հաջող ստացվեց: «Ալաշկերտի» և «Վանի» հետ անցկացրած երկու խաղերում էլ նա դարպասն անառիկ պահեց: Հետաքրքիր է, որ մինչ «Նոա» տեղափոխվելը VBET ՀՊԼ-ում վերջին խաղը Շահատունին անցկացրել էր 2020թ. հունիսի 20-ին իր ներկայիս թիմի հետ խաղում՝ պաշտպանելով «Լոռիի» դարպասը: Այդ խաղում նրա դարպասը գրավել էին Դանու Սպատառուն և Ռոկաս Կրուշնաուսկասը:
4. «Ուրարտուի» կազմում 5 գնդակով լավագույն ռմբարկուն Օլեգ Պոլյակովն է: Ընդ որում գոլերից 2-ը նա խփել է «Սևանի» հետ չեղարկված խաղում: Առաջնության գարնանային հատվածում նա դեռ աչքի չի ընկել: Այս հատվածում առավել արդյունավետ է գործում Արթուր Միրանյանը, որն արդեն 3 գոլ է խփել, որից երկուսը՝ 11մ հարվածով:
«Նոայի» լավագույն ռմբարկուն թիմից հեռացած Պավել Կիրիենկոն է, որը 5 գոլի հեղինակ է դարձել: Ներկայիս կազմի ֆուտբոլիստներից ամենաարդյունավետը 3 գոլ խփած Գեղամ Հարությունյանն է: Նա ընթացիկ առաջնության մասնակիցներից VBET ՀՊԼ-ում բոլորից շատ՝ 56 գոլ է խփել:
5. Եթե Արսեն Բեգլարյանին հաջողվի անառիկ պահել դարպասը, ապա VBET ՀՊԼ-ում 70-րդ «չոր» խաղը կանցկացնի:
Դիմակայության լավագույն ռմբարկուները՝
«Ուրարտու»՝ Ալեքսանդր Գլիշիչ, Եվգենի Կոբզար՝ 2-ական գոլ:
«Նոա»՝ Սանա Գոմեշ, Մաքսիմ Մայրովիչ՝ 2-ական գոլ: