«ՎԵՍՏ ԱՐՄԵՆԻԱ» – «ԱՐԱՐԱՏ»
11 մարտի, ժ.14:00, Էջմիածին, Ֆուտբոլի ակադեմիայի մարզադաշտ
Գավաթի մրցաշարում մրցակիցներն առաջին անգամ են հանդիպելու
Հետաքրքիր 5 փաստ՝ հանդիպմանն ընդառաջ
1․ «Վեստ Արմենիան» VBET Հայաստանի գավաթի քառորդ եզրափակչի ուղեգիր է նվաճել «Գանձասար-Կապանի» հետ մրցավեճում: Անցյալ տարվա սեպտեմբերի 18-ին Էջմիածնում կայացած գավաթի 1/8 եզրափակչում «Վեստ Արմենիան» հաղթել էր 3-2 հաշվով: Գոլերի հեղինակներ էին դարձել Սարգիս Բալոյանը, Եվգենի Կասյանովն ու Չարլզ Մարկ Իկեչուկվոն, գանձասարցիներից դուբլ էր ձևակերպել Դավիթ Մինասյանը: Պատասխան հանդիպումը չկայացավ, քանի որ «Գանձասար-Կապանը» հրաժարվել էր առաջնության և գավաթի մրցաշարի հետագա մասնակցությունից:
2․ Գավաթի վիճակահանությունն առայժմ բարեհաճ է գտնվել «Արարատի» հանդեպ, որին մրցաշարի 2-րդ փուլում էլ բաժին է ընկել Առաջին խմբի առաջնության ներկայացուցիչ: 1/8 եզրափակչում արարատցիներն առանց մեծ ջանքերի հաղթահարեցին «Սևանի» արգելքը՝ վստահ հաղթանակներ տոնելով երկու խաղերում էլ (3-0, 3-1):
Այդ հանդիպումներում արդյունավետությամբ աչքի ընկավ Մորի Կոնեն՝ խփելով 4 գնդակ, ինչը նրան հնարավորություն ընձեռեց միանձնյա գլխավորելու գավաթի ընթացիկ խաղարկության լավագույն ռմբարկուների ցանկը: Մեկական անգամ էլ աչքի ընկան Դավիթ Խուրցիձեն ու Էդգար Մալաքյանը:
3․ «Վեստ Արմենիան» հաջողությամբ պայքարում է Բարձրագույն խմբի ուղեգրի համար: Անցկացրած 15 հանդիպումներում վաստակած 34 միավորով Հայկ Հովհաննիսյանի սաներն ընթանում են 2-րդ տեղում: Առաջատարը ԲԿՄԱ-ն է, որը ևս ունի 34 միավոր, սակայն մեկ խաղ պակաս է անցկացրել: Բայց բանակայինները Բարձրագույն խմբում հանդես գալու իրավունք չունեն, ուստի «Վեստ Արմենիայի» հիմնական մրցակիցները «Սևանն» (32 միավոր 15 խաղում) ու «Նորավանքն» են (29 միավոր 17 խաղում):
Մարտի 7-ին անցկացրած առաջնության վերջին խաղում «Վեստ Արմենիան» սեփական հարկի տակ 3-1 հաշվով հաղթել է «Ուրարտու-2-ին»: «Վեստ Արմենիայում» արդյունավետությամբ աչքի է ընկնում Սերգեյ Օռլովը, որը 16 գոլ է խփել: Նա ընդամենը 2 գոլով է զիջում առաջնության լավագույն ռմբարկու, ԲԿՄԱ-ի հարձակվող Ժիրայր Շաղոյանին:
4․ Գավաթի մրցաշարերում «Վեստ Արմենիան» ընդամենը 4-րդ հանդիպումն է անցկացնելու: Նախորդ մրցաշրջանում «Վեստ Արմենիայի» նորամուտը VBET Հայաստանի գավաթի խաղարկությունում տպավորիչ էր: 1/16 եզրափակչում Արմեն Շահգելդյանի սաները 7-1 հաշվով ջախջախեցին «Անիին»: Այդ խաղում Ստեփան Հարությունյանը հեթ-տրիկի հեղինակ դարձավ: Իսկ ահա հաջորդ փուլում «Վեստ Արմենիան» չկարողացավ լուրջ դիմադրություն ցույց տալ «Արարատ-Արմենիային»՝ 5 անպատասխան գնդակ ընդունելով սեփական դարպասը:
5․ Իսկ ահա բազմափորձ «Արարատի» համար հերթական հանդիպումը կինի 103-րդը գավաթի մրցաշարերում: Արարատցիները 54 հաղթանակ են տոնել, 19 խաղ ավարտել են ոչ-ոքի, կրել են 29 պարտություն, խփել են 191 գնդակ, բաց են թողել 103 գոլ: Սակայն վերջին 9 խաղարկություններում արարատցիներին շատ դժվարությամբ են հաղթանակները տրվել: Անցկացրած 19 խաղերում միայն 4 անգամ է «Արարատը» հաղթել, որից երկու հաղթանակը գրանցվել է գավաթի ընթացիկ մրցաշարում: