«Արարատի» ավագ Հրայր Մկոյանն ավելի քան 3,5 տարվա ընդմիջումից հետո վերադարձավ ՀՀ հավաքական: Իռլանդացիների հետ հանդիպումը Մկոյանի 47-րդ խաղն էր ՀՀ հավաքականում, որի մարզաշապիկը նա վերջին անգամ կրել էր 2018թ. հոկտեմբերի 13-ին Երևանում Ջիբրալթարի ընտրանու հետ կայացած Ազգերի լիգայի մրցախաղում:
Հրայր Մկոյանն ընդգրկվեց ՀՀ հավաքականում մինչ օրս հանդես եկած ամենատարեց ֆուտբոլիստների տասնյակում՝ միանգամից զբաղեցնելով 6-րդ հորիզոնականը: Իռլանդացիների հետ մրցավեճում Մկոյանը 35 տարեկան 275 օրական էր: Նա ցանկից դուրս մղեց Երևանի «Արարատի» նախկին լավագույն ֆուտբոլիստներից մեկին՝ Երվանդ Սուքիասյանին, որն իր վերջին խաղը հավաքականում անցկացրել էր 34 տարեկան 228 օրականում՝ մասնակցելով 2001թ. սեպտեմբերի 5-ին ուկրաինացիների հետ կայացած աշխարհի առաջնության ընտրական մրցախաղին:
Հայաստանի ազգային հավաքականում Հրայր Մկոյանը նորամուտը նշել է 2009թ. սեպտեմբերի 9-ին «Հանրապետական» մարզադաշտում Բելգիայի հավաքականի հետ կայացած աշխարհի առաջնության ընտրական մրցախաղում, որում մեր ֆուտբոլիստները Վարդան Մինասյանի գլխավորությամբ 2-1 հաշվով հաղթեցին: Մկոյանը հավաքականի մեկնարկայի կազմում էր և մինչև խաղավերջ մնաց խաղադաշտում:
Իռլանդացիների հետ հանդիպումը Մկոյանի 2-րդ խաղն էր Ազգերի լիգայի մրցաշարերում: Միակ խաղն այդ մրցաշարում Մկոյանն անցկացրել էր 2018թ. հոկտեմբերի 13-ին՝ մասնակցելով Երևանում Ջիբրալթարի հավաքականի հետ կայացած հանդիպմանը: Աշխարհի առաջնությունների ընտրական մրցաշարերում Մկոյանը 15 խաղ է անցկացրել, 12 անգամ հանդես է եկել Եվրոպայի առաջնությունների ընտրական մրցաշարերում, 18 անգամ էլ մասնակցել է հավաքականի ընկերական հանդիպումներին:
VNews.am-ը ներկայացնում է ՀՀ հավաքականի ամենատարեց ֆուտբոլիստների տասնյակը:
Ֆուտբոլիստներ |
Տարիքը |
Ամսաթիվն ու մրցակիցը |
1. Ռոման Բերեզովսկի |
41 տ. 233 օր. |
25.03.2016 Բելառուս՝ 0-0 (Ը) |
2. Սարգիս Հովսեփյան |
40 տ. 12 օր. |
14.11.2012 Լիտվա՝ 4-2 (Ը) |
3. Դավիթ Յուրչենկո |
36 տ. 69 օր. |
04.06.2022 Իռլանդիա՝ 1-0 (ԱԼ) |
4. Աշոտ Խաչատրյան |
36 տ. 65 օր. |
07.10.1995 Բելգիա՝ 0-2 (ԵԱ) |
5. Գառնիկ Ավալյան |
36 տ. 38 օր. |
14.10.1998 Ուկրաինա՝ 0-2 (ԵԱ) |
6. Հրայր Մկոյան |
35 տ. 275 օր. |
04.06.2022 Իռլանդիա՝ 1-0 (ԱԼ) |
7. Գևորգ Կասպարով |
35 տ. 78 օր. |
11.10.2015 Ալբանիա՝ 0-3 (ԵԱ) |
8. Մարկոս Պիզելի |
35 տ. 9 օր. |
12.10.2019 Լիխտենշտեյն՝ 1-1 (ԵԱ) |
9. Արմեն Ավագյան |
34 տ. 296 օր. |
30.03.1997 Վրաստան՝ 0-7 (Ը) |
10. Համլետ Մխիթարյան |
34 տ. 287 օր. |
06.09.2008 Թուրքիա՝ 0-2 (ԱԱ) |