Պրոֆեսիոնալ բռնցքամարտի աշխարհի 9-ակի չեմպիոն Վախթանգ Դարչինյանը ՀԲՖ-ի մամուլի ծառայության հետ զրույցում մեկնաբանել է այսօրվա ցերեկային մրցահերթում մեր մարզիկների ելույթները, գնահատել է առաջնության կազմակերպումը և ստուգատեսի հետագիծը։

Լեգենդար մարզիկը նշել է, որ թեպետ այսօր ցերեկը մեր երկու մարզիկները պարտված հեռացան ռինգից, սակայն զիջեցին գրեթե հավասար պայքարում։ Դարչինյանը կարծում է, որ Ջանիկ Սահակյանի (54 կգ) և Նարեկ Զախարյանի (71 կգ) մրցակիցները հաղթեցին աննշան առավելությամբ։

Անդրադառնալով առաջնության կազմակերպչական կողմին՝ Վիկը նկատել է. «Ակնհայտ է, որ մրցաշարը շատ լավ է կազմակերպված, հետևում եմ. մրցավարները լավ են դատում, մարտերն էլ լավ են ընթանում»:

Վանաձորցին վստահ է, որ այս առաջնությունը մեծ նշանակություն է ունենալու Հայաստանի համար, դրա արձագանքը զգացվելու է հատկապես տուրիզմի ոլորտում։

Այսօր՝ ցերեկային մրցահերթում, Ջանիկ Սահակյանը 1/8 եզրափակիչում պարտվեց Ուկրաինան ներկայացնող Ելմիր Նաբիևին, իսկ Նարեկ Զախարյանը 1/16 եզրափակիչում զիջեց սլովակ Միխալ Թաքակսին։

Երեկոյան Համբարձում Հակոբյանը (80 կգ) 1/8 եզրափակիչում կպայքարի մոլդովացի Դմիտրի Կոսցյուկի հետ։

Նախօրեին 75 կգ քաշային Վախթանգ Հարությունյանը 1/16 եզրափակիչում հաղթել էր լեհ Բարտոշ Գոլեբիևսկիին։ Նա վաղը՝ ցերեկը, կմրցի գերմանացի Բոկայ Կևին Շչումանի հետ։

Առաջնության մենամարտերը կարող եք դիտել  «Վիվառո սպորտ պլուս»  և  «Վիվառո Արենա»  հեռուստաալիքներով:

Մեզ կարող եք հետևել նաև Telegram-ում