«Յուվենտուսը» բանակցություններ է վարում «Ֆիորենտինայի» հետ՝ հարձակվող Դուշան Վլահովիչի տրանսֆերի համար:
Ինչպես հայտնում է La Gazzetta dello Sport-ը, թուրինյան ակումբն առաջին առաջարկն է արել 21-ամյա հարձակվողի տրանսֆերային իրավունքները ձեռք բերելու համար։ «Յուվենտուսն» առաջարկել է 60 միլիոն եվրո։
Նշվում է, որ «Ֆիորենտինան» կարող է ընդունել առաջարկը։ Վլահովիչը «Յուվենտուսի» հետ 5 տարվա պայմանագիր է համաձայնեցրել՝ տարեկան 7 միլիոն եվրո աշխատավարձով:
Ըստ La Nazione-ի՝ գործարքը կարող է ավարտին հասցվել առաջիկա ժամերին։ Այսօր այս հարցի շուրջ բանակցություններ կկայանան «Ֆիորենտինայի» և «Յուվենտուսի» միջև։
Ավելի վաղ հաղորդվում էր, որ «Ֆիորենտինան» ցանկանում է Դուշանի համար ստանալ 70 միլիոն եվրո։
Սերբ հարձակվողն ընթացիկ մրցաշրջանում «Ֆիորենտինայի» կազմում բոլոր մրցաշարերում անցկացրել է 24 հանդիպում՝ դառնալով 20 գոլի և 2 գոլային փոխանցման հեղինակ:
