VBET Հայաստանի գավաթի ընթացիկ խաղարկությունում հայտնի դարձան կիսաեզրափակչի մասնակիցները: Պատվավոր մրցանակի համար պայքարը կշարունակեն գործող գավաթակիր «Նոան», «Արարատը», «Արարատ-Արմենիան» և «Ալաշկերտը»: Այս քառյակից «Նոան» և «Արարատ-Արմենիան» գավաթի նախորդ մրցաշարում էլ կիսաեզրափակչի մասնակիցների թվում էին:
Քառորդ եզրափակիչ պատասխան հանդիպումների ամենաուշագրավ իրադարձությունները ներկայացնում ենք 10 փաստի տեսքով:
1․ VBET Հայաստանի գավաթի քառորդ եզրափակիչ պատասխան հանդիպումներն անցան հյուրերի առավելությամբ, որոնք տոնեցին 2 հաղթանակ, մեկ խաղ ավարտեցին ոչ-ոքի, կրեցին մեկ պարտություն: Գավաթի ընթացիկ խաղարկությունում կայացած 19 հանդիպումներում դաշտի տերերն ու հյուրերը 7-ական հաղթանակ են տոնել, 5 խաղում էլ գրանցվել է ոչ-ոքի:
Հայտնի են VBET Հայաստանի գավաթի կիսաեզրափակչի զույգերը
Պատասխան հանդիպումներն աչքի ընկան գոլերի առատությամբ. 4 խաղում խփվեց 14 գոլ (առաջին խաղերում գրանցվել էր 9 գոլ): Անցկացված 19 հանդիպումներում գրանցվել է 48 գոլ (միջինը մեկ խաղում՝ 2,52 գոլ):
2․ «Ուրարտուն» VBET Հայաստանի գավաթի վերջին 8 խաղարկություններում առաջին անգամ չհաղթահարեց քառորդ եզրափակչի արգելքը: 2-րդ տարին անընդմեջ «Ուրարտուն» գավաթային դիմակայությունում զիջեց «Նոային»: Գավաթի նախորդ խաղարկությունում «Ուրարտուն» կիսաեզրափակչի երկու հանդիպումներում էլ պարտվել էր «Նոային» (0-1, 1-2):
3․ Իր տիտղոսի պաշտպանությունը քառորդ եզրափակչից սկսած գործող գավաթակիր «Նոան» պատվավոր մրցանակի խաղարկություններում 2-րդ տարին անընդմեջ կիսաեզրափակչի ուղեգիր նվաճեց: Գավաթի մրցաշարերում «Նոան» արդեն 7 խաղ անպարտելի է՝ տոնելով 5 հաղթանակ, 2 խաղ ավարտելով ոչ-ոքի:
4․ «Արարատին» 13 տարի անց վերջապես կրկին հաջողվեց կիսաեզրափակչի ուղեգիր նվաճել՝ 5-1 հաշվով վստահ ռևանշի հասնելով «Վեստ Արմենիայից» կրած պարտության դիմաց: Վերջին անգամ արարատցիները կիսաեզրափակչի ուղեգիր էին նվաճել 2008թ.՝ Վարուժան Սուքիասյանի գլխավորությամբ քառորդ եզրափակչում հաղթահարելով «Ուլիսի» դիմադրությունը (0-1, 2-0): Ի դեպ, հենց այդ տարի էլ «Արարատը» վերջին անգամ գավաթակիր է դարձել՝ եզրափակչում 2-1 հաշվով հաղթելով «Բանանցին»:
Գավաթի ընթացիկ խաղարկությունում «Արարատը» խոշոր հաշվով 2-րդ հաղթանակը տոնեց: Առաջինը գրանցվել էր «Սևանի» հետ 1/8 եզրափակչի առաջին խաղում, որում արարատցիները 3 անպատասխան գնդակ էին խփել: «Արարատը» գավաթի ընթացիկ խաղարկության ամենաարդյունավետ թիմն է, որը 4 խաղում 11 գոլ է խփել: