Հայտնի է դարձել, թե ով կփոխարինի Յուլիան Նագելսմանին «Լայպցիգի» գլխավոր մարզիչի պաշտոնում:
Ինչպես հաղորդում է Bild պարբերականը, գերմանական ակումբը մտադիր է թիմի ղեկը վստահել ամերիկացի Ջեսի Մարշին, որն այժմ գլխավորում է ավստրիական «Ռեդ Բուլ Զալցբուրգը»:
Կողմերը, ընդհանուր առմամբ, համաձայնության են եկել: Ընդ որում, նախապես, ինչպես նշվում է, Մարշը չի եղել պաշտոնը ստանձնելու գլխավոր թեկնածուն:
47-ամյա մասնագետն ավելի վաղ արդեն աշխատել է «Լայպցիգում»՝ 2018/19թթ․ մրցաշրջանում կատարելով գլխավոր մարզիչ Ռալֆ Ռանգնիկի օգնականի պարտականությունները:
Նագելսմանը 2021 թվականի ամռանից կդառնա «Բավարիայի» գլխավոր մարզիչը: Մյունխենյան ակումբը նրա տեղափոխության համար վճարել է 25 մլն եվրո:
Մարշը «Նյու Յորք Ռեդ Բուլզի» ղեկին 2015 թվականին դարձել է ՄԼՍ-ի կանոնավոր առաջնության հաղթող: «Զալցբուրգի» գլխավոր մարզչի պաշտոնում 2019/20թթ․ մրցաշրջանում հռչակվել է Ավստրիայի չեմպիոն ու գավաթակիր, ակումբը նաև իր պատմության մեջ առաջին անգամ մտել է Չեմպիոնների լիգայի գավաթի խաղարկության խմբային փուլ:
«Ռեդ բուլը թևեր է տալիս». ինչպես հայտնի բրենդը գրավեց ֆուտբոլը