Ըմբշամարտի միացյալ աշխարհ անվամբ ներկայացող մարզաձևի միջազգային ֆեդերացիան Բուլղարիայում կայանալիք մինչև 23 տարեկան մարզիկների Եվրոպայի առաջնությանը նվիրված անդրադարձում գնահատել է հիմնական ֆավորիտների հնարավորությունները։ Հաղթողի կոչման հիմնական հավակնորդների շարքում նշվում են Հայաստանը ներկայացնող հունահռոմեական ոճի ըմբիշներ Սահակ Հովհաննիսյանը (67 կգ քաշային կարգ), Շանթ Խաչատրյանը (72 կգ) և Գևորգ Թադևոսյանը (87 կգ)։
Նշվում է, որ երիտասարդների աշխարհի առաջնության կրկնակի արծաթե մեդալակիր Հովհաննիսյանն իր քաշային կարգում հայտավորված այն սակավաթիվ մարզիկներից է, որը կարող է լուրջ մրցակցություն կազմել այս տարիքային խմբի Եվրոպայի անցյալ տարվա փոխչեմպիոն թուրք Կադիր Քամալին։
Վերլուծաբանը կարծում է նաև, որ երիտասարդների ու մինչև 23 տարեկանների անցյալ տարվա աշխարհի առաջնությունների բրոնզե մրցանակակիր Խաչատրյանը նույնպես օժտված է անհրաժեշտ որակներով ու կարող է լրջորեն միջամտել ոսկե մեդալի համար պայքարին։ Հենց հայ ըմբիշից պետք է ամենից առաջ զգուշանա մինչև 72 կգ քաշային կարգում երիտասարդների Եվրոպայի չեմպիոն ու աշխարհի փոխչեմպիոն Գեորգի Չխիկվաձեն՝ Վրաստանից։ Բայց վրացի և հայ ըմբիշների խաղաքարտերը կարող է խառնել Գերմանիան ներկայացնող Իդրիս Իբաևը, որը 2021 թվականին դարձել է մինչև 23 տարեկանների Եվրոպայի չեմպիոն։
Հավանական մրցանակակիրների շարքին է դասվում նաև զինծառայողների մասնակցությամբ աշխարհի անցյալ տարվա առաջնության հաղթող Գևորգ Թադևոսյանը, որը, մասնագետների կարծիքով, ունակ է մարտահրավեր նետել 87 կգ քաշային կարգի գլխավոր ֆավորիտներին։
Ազատ ոճի ըմբշամարտում հաղթողի կոչման թեկնածու է համարվում Ուկրաինան ներկայացնող 65 կգ քաշային Էրիկ Առուշանյանը։ Նա երիտասարդների Եվրոպայի չեմպիոն է, բայց այս անգամ ներկայանալու է 61 կգ քաշային կարգում։
Ազատ և հունահռոմեական ոճի ըմբշամարտի մինչև 23 տարեկանների Եվրոպայի առաջնություններն անցկացվելու են մարտի 7-13-ը Բուլղարիայի Պլովդիվ քաղաքում։
Մինչև 23 տարեկանների Եվրոպայի անցյալ տարվա առաջնությունում Հայաստանը ներկայացնող երկու ոճի ըմբիշները նվաճել էին 10 մեդալ՝ 2 ոսկե, 3 արծաթե, 5 բրոնզե։ Ազատ ոճայիններից արծաթե մեդալակիր էին դարձել Ռազմիկ Պապիկյանը (61 կգ) և Հրայր Ալիխանյանը (74 կգ), իսկ բրոնզե պարգևների էին արժանացել Արման Անդրեասյանը (70 կգ) և Արման Ավագյանը (79 կգ)։ Ավելի հաջող էր հունահռոմեացիների ելույթը. չեմպիոն էին հռչակվել Հրաչյա Պողոսյանը (63 կգ) և Մալխաս Ամոյանը (72 կգ), Դավիթ Օվասափյանը (130 կգ) նվաճել էր արծաթե, իսկ Տիգրան Մինասյանը (60 կգ), Սամվել Գրիգորյանը (77 կգ) ու Գևորգ Թադևոսյանը (87 կգ) բավարարվել էին բրոնզե պարգևներով։