Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ:
Ձեր ուշադրությանն ենք ներկայացնում հուլիսի 5-ի իրադարձությունների քրոնիկոնը:
Հայկական թիմերի խաղացանկը եվրոգավաթներում հուլիսի 6-ին. Եվրոպա լիգայի որակավորման 1-ին փուլ, պատասխան հանդիպումներ՝ «Գանձասար-Կապան» – «Մլադոստ» (Չեռնոգորիա) (մեկնարկը՝ 20:00-ին, առաջին խաղում՝ 0-1), «Սլովան» (Սլովակիա) – «Փյունիկ» (մեկնարկը՝ 21:00-ին, առաջին խաղում՝ 4-1), «Գորիցա» (Սլովենիա) – «Շիրակ» (մեկնարկը՝ 22:30-ին, առաջին խաղում՝ 2-0):
Աշոտ Բարսեղյան. «1-0 հաշիվը լավ առավելություն է տալիս մրցակցին, բայց այն 2-0 կամ 3-0 չէ: Նաև հաշվի առնենք, որ պատասխան խաղը մեր հարկի տակ է կայանալու: 1-0 են հաղթել, մենք էլ պետք է 2-0 հաղթենք և անցնենք հաջորդ փուլ: Առաջին խաղում գլխավոր մրցավարը սխալմամբ էր 11-մետրանոց նշանակել: Մրցավեճից հետո զգացի, որ նա զղջում է իր որոշման համար»:
Իրանական «Փադիդեի» նախկին պաշտպան Վարազդատ Հարոյանը ներկայացվել է որպես «Ուրալի» ֆուտբոլիստ: 24-ամյա ֆուտբոլիստը ռուսական ակումբին էր միացել սլովենական հավաքի առաջին օրվանից և մասնակցել ընկերական բոլոր հանդիպումներին: Եկատերինբուրգի թիմում է հանդես գալիս նաև Էդգար Մանուչարյանը:
Պաշտպան Տարոն Ոսկանյանը և կիսապաշտպան Դավիթ Մանոյանը պաշտոնապես ներկայացվել են որպես Կիպրոսի «ՆԵԱ Սալամիսի» ֆուտբոլիստներ: Երկու խաղացողների հետ էլ կնքվել է մեկ տարվա պայմանագիր՝ ևս մեկ տարով երկարաձգելու հնարավորությամբ: «ՆԵԱ Սալամիսը» երկրի նախորդ առաջնությունում զբաղեցրել է 8-րդ հորիզոնականը:
Ամերիկյան ՄԼՍ-ի Արևմտյան Կոնֆերենցիայում «Ռեալ Սոլթ Լեյքը» հյուրընկալվելիս 6-2 հաշվով առավելության է հասել «Լոս-Անջելես Գելեքսիի» նկատմամբ: Յուրա Մովսիսյանը եղել է հիմնական կազմում, 62-րդ րոպեին դարձել գոլի հեղինակ՝ հաշիվը դարձնելով 3-1, և փոխարինվել 71-րդ րոպեին: «Ռեալ Սոլթ Լեյքն» ընթանում է 9-րդ հորիզոնականում:
«Փյունիկը» Բրատիսլավայում նախախաղային մարզում է անցկացրել՝ նախապատրաստվելով Եվրոպա լիգայի որակավորման 1-ին փուլի՝ տեղի «Սլովանի» հետ պատասխան հանդիպմանը: Վերջինս Երևանում առավելության էր հասել 4-1 հաշվով:
«Կրասնոդարն» իր առաջին թիմում նոր մրցաշրջանի համար հայտավորել է հայազգի երկու ֆուտբոլիստների՝ կիսապաշտպան Լևոն Բայրամյանին և հարձակվող Հարություն Գրիգորյանին:
Հայաստանի հավաքականի նախկին դարպասապահ Արսեն Պետրոսյանը մարզվում է «Արարատի» կազմում:
Մոսկվայի «Արարատ-2»-ը Ռուսաստանի 3-րդ դիվիզիոնի «Մոսկվա» շրջանի 14-րդ տուրում հյուրընկալվելիս 3-6 հաշվով պարտություն է կրել «Զելենոգրադից»: «Արարատից» հաջողության են հասել Արթուր Օրդինյանը, Եվգենի Ստուկանովը և Սերգեյ Վասիլենկոն: «Արարատ-2»-ն ընթանում է 15-րդ հորիզոնականում:
Ղազախական «Աստանայի» հայազգի հարձակվող Գևորգ Նաջարյանը պաշտոնապես տեղափոխվել է Կարագանդայի «Շախտյոր», որի կազմում հանդես կգա վարձավճարով:
«Անժին» ընկերական մրցավեճում 1-0 հաշվով հաղթանակ է տոնել Բուխարեստի «Դինամոյի» նկատմամբ: Մախաչկալայի թիմի գլխավոր մարզիչն է Ալեքսանդր Գրիգորյանը:
«Վորսկլան» ընկերական խաղ է անցկացրել «Իստրայի» հետ և գրանցել ոչ-ոքի՝ 1-1: Գեղամ Կադիմյանը եղել է հիմնական կազմում և փոխարինվել 65-րդ րոպեին:
