This is Անկում. Կլոպի ժամանակը սպառվե՞լ է «Լիվերպուլում» - VNews
Բաժիններ

This is Անկում. Կլոպի ժամանակը սպառվե՞լ է «Լիվերպուլում»

Ս0Ս00Ս0Ս0Ս - This is Անկում. Կլոպի ժամանակը սպառվե՞լ է «Լիվերպուլում»

«Լիվերպուլի» անկումը բացատրելը հեշտ գործ չէ, իսկ ամիսներ առաջ դա պատկերացնելը՝ գրեթե անհնար: Անգլիայի անպարտելի չեմպիոնը օրեցօր գահավիժում է: Թիմ, որը Պրեմիեր լիգայի նախորդ խաղարկությունում 28 խաղ անպարտելի էր, մրցաշրջանի կեսից գործնականում չեմպիոն՝ «Մանչեսթեր Սիթիի» նկատմամբ ունենալով 25 միավորի առավելություն (!!!), այժմ գտնվում է Պրեմիեր լիգայի միջին դիրքերում, չի համոզում իր խաղով և ունի անհամեմատ ավելի վատ ցուցանիշներ: Տպավորություն է, որ մենք դիտում էինք հիասքանչ դրամա, որի դադարից հետո պատահաբար միացրինք բոլորովին այլ՝ սարսափ ոճի ֆիլմ:

Նախ՝ փորձենք հասկանալ՝ ինչ արդյունքներ է գրանցել «Լիվերն» այս մրցաշրջանում, հետո ուսումնասիրենք թիմի խաղային անկման պատճառները և փնտրենք լուծումներ ու պատկերացնենք, թե ինչպես մերսիսայդցիները կարող են նոր հաղթական ճանապարհ սկսել:

Խոսուն ցուցանիշներ ու տխուր վիճակագրություն

Մրցաշրջանը «Լիվերպուլի» համար ամենևին էլ վատ չէր սկսել: Թիմը լուծում էր իր առջև դրված խնդիրները՝ առաջին հորիզոնական Չեմպիոնների լիգայի խմբային փուլում, իսկ դեկտեմբերին նաև առաջատար Պրեմիեր լիգայում՝ թեև ոչ մեծ առավելությամբ, ինչպես նախորդ տարի:

Բայց ամեն ինչ գլխիվայր շրջվեց 2021-ից սկսած: Պրեմիեր լիգայի վերջին 14 տուրից «Լիվերպուլը» հաղթել է 3-ում, հնարավոր 42 միավորից վաստակել 12-ը, Կլոպի թիմը միանգամից 2 հակառեկորդ սահմանեց՝ իր պատմության մեջ առաջին անգամ 6 խաղում անընդմեջ պարտություն կրելով «Էնֆիլդ» մարզադաշտում, և դարձավ առաջին գործող չեմպիոնը, որ 6 խաղ անընդմեջ պարտություն է կրում տնային խաղերում: Նախորդ մրցաշրջանի այս հատվածում «Լիվերպուլը» վաստակել էր 34 միավոր ավելին, խփել 15 գոլ ավելին և բաց թողել 15 գոլ ավելի քիչ: «Կարմիրներն» այժմ 7-րդն են Պրեմիեր լիգայի մրցաշարային աղյուսակում, իսկ «Ռեալից» կրած վերջին պարտությունից հետո մեկ ոտքով դուրս են մնացել Չեմպիոնների լիգայից:

1311164318.0 960x640 - This is Անկում. Կլոպի ժամանակը սպառվե՞լ է «Լիվերպուլում»

«Լիվերպուլը» նախորդ 2 մրցաշրջաններում աշխարհի լավագույն թիմերից մեկն էր, 2019-ին՝ լավագույնը. նրանք հաղթում էին գրեթե բոլոր խաղերում: Կլոպի թիմը Պրեմիեր լիգայի 2018/19 խաղարկությունում վաստակեց 97 միավոր ու «մազով» չդարձավ չեմպիոն, փոխարենը հաղթեց Չեմպիոնների լիգան, իսկ 2019/20 մրցաշրջանում նույնիսկ կորոնավիրուսը չկանգնեց «Լիվերպուլի» ճանապարհին. Պրեմիեր լիգան նույնպես մերսիսայդցիներինն էր:

Այս մրցաշրջանում, սակայն, աշխարհի լավագույն ակումբը նույնիսկ լավագույնը չէ իր քաղաքում. «Էվերթոնն» ավելի բարձր դիրք է զբաղեցնում: Բայց ինչպո՞ւ և ինչպե՞ս է Կլոպի թիմը գլորվում անդունդը:

Չարաբաստիկ վնասվածքները

Անհաջողությունների ժամանակ բոլոր թոփ ակումբներին միավորում է նույն պատճառաբանությունը՝ վնասվածքներ: Արդարության առաջ չմեղանչելու համար պետք է խոստովանել, որ այս մրցաշրջանի հենց սկզբից բախտը Կլոպի թիմից իսկապես երես թեքեց: «Լիվերպուլում» վնասվածքներն այնքան շատ են, կարծես վնասվածքների պանդեմիա լինի՝ բոլորը միմյանց վարակում են. Դիոգո Ժոտան բաց է թողել 15 հանդիպում, Տիագո Ալկանտարան՝ 12, Ֆաբինյոն՝ 8… բայց ամենատխուր վիճակը պաշտպանությունում է:

Նախ՝ «Էվերթոնի» դեմ խաղում ծանր վնասվածք ստացավ այս «Լիվերպուլի» հենասյունը՝ Վիրջիլ վան Դեյկը, որի համար, կարծես, մրցաշրջանն արդեն ավարտված է: Բայց դա վերջը չէր. «կարկուտը ծեծած տեղն է ծեծում»: Վնասվածքներ ստացան նույն դիրքի մյուս ֆուտբոլիստները՝ Ջո Գոմեսն ու Ժոել Մատիպը, որոնք նույնպես երկար ժամանակով դուրս մնացին շարքից: Նրանց միացավ նաև Ջորդան Հենդերսոնը, որին Կլոպը նույնպես ճարահատյալ օգտագործում էր պաշտպանության կենտրոնում:

2917125 59936468 2560 1440 960x540 - This is Անկում. Կլոպի ժամանակը սպառվե՞լ է «Լիվերպուլում»

Այս կորուստները Կլոպին հարկադրեցին միայն այս մրցաշրջանում փորձարկել կենտրոնական պաշտպանների 10 զույգ. Վան Դեյկ-Գոմես, Վան Դեյկ-Ֆաբինյո, Ֆաբինյո-Գոմես, Ֆաբինյո-Հենդերսոն, Ֆաբինյո-Կաբակ, Կաբակ-Ֆիլիպս և այդպես շարունակ: «Լիվերպուլի» պաշտպանությունը, բառի ուղիղ իմաստով, փլուզվեց:

Իրեն սպառած տակտիկան

Հասանք «Լիվերպուլի» անհաջողությունների գլխավոր պատճառին, որի համար պետք չէ մեղադրել բախտին: Կլոպի տակտիկան ու խաղային գաղափարները շատ լավ աշխատեցին վերջին տարիներին, բայց ոչինչ անվերջ չի աշխատում, եթե չի կատարելագործվում ու որևէ փոփոխության չի ենթարկվում: Հեռահար փոխանցումներով խաղը, գեգենպրեսինգն ու չափազանց վերտիկալ ֆուտբոլն արդեն չեն վախեցնում:

Այս ամենի վառ ապացույցը Զիդանի՝ Կլոպի հանդեպ տարած տակտիկական հաղթանակն է. ֆրանսիացին արեց այնպես, որ իր թիմը խաղային բոլոր ասպեկտներով գերազանցի մրցակցին: Զիդանը շատ լավ էր ուսումնասիրել ու հասկացել էր «Լիվերպուլի» խոցելի կողմերը:

Պաշտպանության գծում Կլոպի թիմը խայտառակ տեսք ուներ: Բացի այն, որ կենտրոնում գործում էր անփորձ, ու անկեղծ լինենք, նաև այս տիպի խաղերին ոչ համապատասխան կարգ ունեցող Կաբակ-Ֆիլիպս զույգը, նաև ձախողեցին եզրայինները՝ Տրենտ-Ալեքսանդր Առնոլդն ու Էնդրյու Ռոբերտսոնը: Ռոբերտսոնն ու հատկապես Առնոլդը մոռացել էին, որ իրենց հիմնական գործառույթը պաշտպանվելն է ու ինքնամոռաց նետվում էին մրցակցի կիսադաշտ՝ թողնելով հսկայական տարածություններ: Լավ իմանալով այդ ամենը՝ Զիդանը հրաշալի օգտագործեց իր եզրայիններին՝ Վինիսիուսին ու Ասենսիոյին, որոնց էլ գնդակը հասցեագրում էր Կրոսը՝ աշխարհի ամենաճշգրիտ փոխանցումներ կատարող ֆուտբոլիստներից մեկը: «Լիվերպուլի» պաշտպանության բացակայությունն օգտագործում են նաև Պրեմիեր լիգայի թիմերը:

vinicius trent alexander arnold 960x504 - This is Անկում. Կլոպի ժամանակը սպառվե՞լ է «Լիվերպուլում»

Ի դեպ՝ Առնոլդ-Ռոբերտսոն զույգի արդյունավետությունը հարձակման գծում նույնպես առաջվանը չէ: Առնոլդը նախորդ մրցաշրջանում հայտնվեց «Գինեսի ռեկորդների» գրքում՝ խփելով 4 գոլ ու կատարելով 15 գոլային փոխանցում: Ռոբերտսոնն էլ խփել էր 3 գոլ ու կատարել 12 գոլային փոխանցում: Այս մրցաշրջանում Առնոլդը խփել է 1 գոլ ու կատարել 6 գոլային փոխանցում, իսկ Ռոբերտսոնը՝ 1 գոլ ու 5 գոլային փոխանցում:

Հարձակվելիս «Լիվերպուլը» նույնպես չի փոխել իր տակտիկան (երկար փոխանցումներ, եզրային անցումներ ու գեգենպրեսինգ), ինչի արդյունքում թիմը կորցրել է սրությունն ու վտանգն առջևում: Զիդանը լավ էր հասկացել՝ ինչպես է գրոհում «Լիվերպուլը», և կարողացավ գրեթե 100 տոկոսով վնասազերծել մրցակցին: «Լիվերպուլը» սովոր է խաղալ հեռահար փոխանցումներով՝ հույսը դնելով Մանեի ու Սալահի արագությունների, կամ էլ մրցակցի սխալների վրա: Զիդանն իր եզրայիններին (նաև՝ վինգերներին) հրահանգել էր ոչ մի վայրկյան բաց չթողնել ու տարածություն չտալ նրանց: Խնդիրը լուծվեց. ամեն ինչ պարզ էր ու կանխատեսելի: Առավել ևս, որ չկար Վան Դեյկը, որը սկսում էր թիմի գրոհները խորքից, քանի որ հրաշալի էր հեռու փոխանցումներ կատարում:

Մեր ընտրանին

Այս տակտիկայով այլևս ոչ ոքի չես զարմացնի: Կլոպի ուղղահայաց ֆուտբոլի ցուցանիշները նախորդ մրցաշրջանի համեմատ նույնպես նվազել են. ճշգրիտ փոխանցումների տոկոսն ավելի ցածր է, թիմն ավելի քիչ է գոլային պահեր ստեղծում, եզրային դիպուկ փոխանցումներն ավելի քիչ են, իսկ մրցակցի տուգանային «Լիվերպուլի» ֆուտբոլիստներն ավելի քիչ են լինում գնդակով: Այս տակտիկան չափից շատ է հիմնված ֆուտբոլիստների անհատական խաղի՝ Սալահ-Մանե զույգի արագության վրա: Ի դեպ, Մանեն ու Սալահն էլ չեն փայլում այս մրցաշրջանում: Եթե եգիպտացին գոնե պահում է արդյունավետությունը (18 գոլ Պրեմիեր լիգայում), ապա Մանեի թվերը զգալիորեն նվազել են. նա այս մրցաշրջանում խփել է 7 գոլ՝ նախորդ տարվա իր գոլերի ուղիղ կեսը (14): Ֆիրմինոն, առհասարակ, կորցրել է նույնիսկ տեղը մեկնարկային կազմում:

«Լիվերպուլի» այս միապաղաղ ֆուտբոլը փոխելու համար եկել էր Տիագո Ալկանտարան, որն իր վառ երևակայությամբ ու բարձր տեխնիկայով կարող էր գտնել խորը պաշտպանություն մտած թիմերի ճեղքերը, բայց իսպանացին չի գտնում իրեն այս թիմում. այլընտրանքային տակտիկա չկա:

Գեգենպրեսինգը Կլոպի անձը հաստատող փաստաթուղթն է եղել թե՛ «Բորուսիայում», թե՛ «Լիվերպուլում»: Բայց այն նույնպես այլևս չի վախեցնում ոչ ոքի: Մրցակիցների վրա ակտիվ ճնշում գործադրելը չի տալիս ցանկալի արդյունքները: Նախորդ մրցաշրջանի համեմատ ֆուտբոլիստներն ավելի քիչ են խլել գնդակը (168-ը՝ 199-ի դիմաց), իսկ անհատական միկրոմենամարտերում ավելի քիչ են հաղթում (1410-ը՝ 1525-ի դիմաց):

Գուցե սպառվե՞լ է Կլոպի ժամանակը. Ջերարդ՝ в студию

Իսկ գուցե ավարտվե՞լ է Կլոպի ժամանակը «Լիվերպուլում»: Այո՛, օբյեկտիվ պատճառներն ու «թարսությունները» նույնպես նպաստեցին անհաջողությունների այս շարքին, բայց, հնարավոր է, մարզչական փոփոխությունը տվյալ պահին հենց այն լուծումն է, որ պետք է «Լիվերպուլին»՝ նոր փուլ սկսելու համար: Կլոպին փոխարինելու համար արդեն նշմարվում է հստակ թեկնածու՝ Սթիվեն Ջերարդ: Ինչո՞ւ հենց Սթիվի Ջին պետք է դառնա Կլոպին փոխարինողը մոտ ապագայում:

  • Կադրերի ու կազմի առումով «Լիվերպուլը» մնում է լավագույն ակումբներից մեկն աշխարհում. թոփ դարպասապահ, հեռանկարային երիտասարդ պաշտպաններ, թոփ հարձակվողներ: Հնարավոր է՝ այս ֆուտբոլիստները «տառապում» են հաղթանակներից հագեցվածության սինդրոմով, այսինքն՝ հոգեբանորեն սպառվել են, մոտիվացիան՝ նվազել: Գուցե մարզչական փոփոխությունը նոր իմպուլս, նոր շունչ հաղորդի այս տղաներին. նոր տակտիկա, նոր մոտեցում, նոր ձեռագիր ու արդեն նոր մոտիվացիա:
  • Ջերարդը հավաքել է մարզչական որոշակի փորձ ու կարող է ավելի բարձրակարգ թիմ գլխավորել: Ջերարդի «Ռեյնջերսն» իր համարձակ ֆուտբոլով անհավանական ցուցանիշներ գրանցեց այս մրցաշրջանում. Գլասգոյի թիմը վերջ դրեց «Սելթիկի» 10 տարվա գահակալմանն ու դարձավ Շոտլանդիայի չեմպիոն՝ 20 միավորի առավելությամբ: Այս մրցաշրջանում Ջերարդի թիմը կրել է ընդամենը 2 պարտություն՝ Շոտլանդիայի գավաթում և Եվրոպայի լիգայում: Ջերարդը պատրաստ է թռիչքին:

0 GerrardWinsTheLeague - This is Անկում. Կլոպի ժամանակը սպառվե՞լ է «Լիվերպուլում»

  • Աշխարհում ոչ մի մասնագետ ավելի լավ չի ճանաչում «Լիվերպուլը», քան Ջերարդը՝ 26 տարի (1989-ից 2015 թթ.) հարազատ ակումբին ծառայելու շնորհիվ: Այստեղ նա լեգենդ է, սիրված ու գնահատված: Նրա՝ «Լիվերպուլ» ժամանումը կբարձրացնի բոլորի տրամադրությունն ու նոր ուժ կհաղորդի բոլորին:
  • Ջերարդն ունի առաջատարի բացառիկ հատկանիշներ: Սթիվենը դեռ 23 տարեկան էր, երբ 2003-ին դարձավ թիմի ավագը: Ջերարդը գիտի ոգևորել ու մոտիվացնել ֆուտբոլիստներին, առաջնորդել նրանց: Ջերարդը, որպես մարզիչ, նաև բավական հավասարակշռված է ու լավ է շփվում մեդիայի հետ: Չնայած «Ռեյնջերսի» անհավանական արդյունքներին՝ Ջերարդն իր ասուլիսների ժամանակ պահում է ոտքերը հողին ու միշտ հարգալից արտահայտվում մրցակիցների հասցեին:

Յուրգեն Կլոպն ունի նոր շանս ու ժամանակ ստանալու բոլոր իրավունքները՝ հաշվի առնելով, թե որքան բան է արել նա այս ակումբի համար բավական սուղ ժամանակում: Նույնիսկ այս մրցաշրջանում տեսականորեն «Լիվերպուլը» դեռ կարող է փոխել իրավիճակը ՉԼ-ում ու մտնել ԱՊԼ լավագույն քառյակ: Բայց մարզչական փոփոխությունը՝ հանուն նոր հաջողությունների ու նոր փուլի մեկնարկի, կարող է շատ ավելի բարենպաստ լինել «Լիվերպուլի» համար:

Սադիո Մանե. Ամենահամեստ ֆուտբոլիստի անցած անհավանական ճանապարհը (տեսանյութ)

Ամենահետաքրքիր գործակիցները ֆուտբոլային իրադարձությունների համար

Միացի՛ր հայկական ամենասպորտային Instagram-ին:


«Ալաշկերտը» պարտվեց «Շերիֆին» նաև պատասխան խաղում

«Շերիֆ» – «Ալաշկերտ». Առաջին կեսից հետո

«Ալաշկերտի» մեկնարկային կազմը «Շերիֆի» դեմ խաղում

«Յուվենտուսում» որոշում են կայացրել Կիեզայի վերաբերյալ

Ով է լինելու «Ալաշկերտի» գլխավոր մարզիչը «Շերիֆիի» դեմ խաղում

Օքսլեյդ-Չեմբերլենը հնարավոր է վերադառնա Լոնդոն

Շաքիրին հեռանում է «Լիվերպուլից»․ նա անձամբ ասել է, թե որտեղ է ուզում շարունակել կարիերան

Ջերարդ․ «Շոկի մեջ էի, երբ անունս կապվում էր այդ թիմի գլխավոր մարզչի պաշտոնի հետ»

«Լիվերպուլը» 100 մլն է առաջարկել «Յուվենտուսի» ֆուտբոլիստի տրանսֆերի համար

Դոնարումայի տրանսֆերը՝ անարգանք Նավասի՞ն․ ՊՍԺ-ն չպետք է կրկնի «Ռեալի» սխալը

Հայկական ակումբները նույն մրցակցի դեմ 7 խաղում ոչ մի գոլ չեն խփել, Արտակ Գրիգորյանի նվաճումը

ՉԼ. Առաջին խաղում «Ալաշկերտը» նվազագույն հաշվով զիջեց «Շերիֆին» (տեսանյութ)

Չեմպիոնների լիգա. «Ալաշկերտ» – «Շերիֆ». Երևանցիների կազմը

Հայաստանի չեմպիոնին Չեմպիոնների լիգայում այս անգամ կդիմակայի շատ ավելի զորեղ թիմ (տեսանյութ)

Անգլիական երկու գրանդ կպայքարի Սաուլի համար

Հայաստանի հավաքականը չգլխավորած մարզչի թիմը. ինչ գիտենք «Ալաշկերտի» մրցակցի մասին