Եվրոպական տիեզերական գործակալությունը (ESA) հայտարարել է, որ դադարեցնում է գործակցությունը ռուսաստանյան Roscosmos-ի պետական կորպորացիայի հետ ExoMars ռուս-եվրոպական համատեղ նախագծում՝ Մարսը հետազոտելու նպատակով: Այդ մասին կազմակերպությունը հայտարարությունը է հրապարակել իր պաշտոնական կայքում։
Մարտի 16-17-ը Փարիզում ESA-ի Կառավարման խորհուրդը գնահատել է ExoMars-ի հետ կապված իրավիճակն ուկրաինական պատերազմի ֆոնին և միաձայն որոշել, որ այժմ անհնար է շարունակել գործակցությունը Roscosmos-ի հետ ExoMars-ի առաքելության մասով։
Նախագիծը ենթադրում էր, որ 2022-ի օգոստոս-սեպտեմբերին Բայկոնուրի տիեզերակայանից միջմոլորակային ապարատ կուղարկվի Մարս՝ «Պրոտոն-Մ» հրթիռով։ Ռովերը պետք է ապացույցներ հավաքեր Մարս մոլորակի վրա անցյալում կամ ներկայում կյանքի գոյության մասին:
«Ինտերֆաքսը» հայտնում է, որ «Ռոսկոսմոսի» մամուլի ծառայության ղեկավար Դմիտրի Ստրուգովեցը, մեկնաբանելով Եվրոպական տիեզերական գործակալության որոշումն, ասել է՝ «ցավում է, որ ESA-ի գործընկերներն իրենց հակառուսական դիրքորոշումը վեր են դասում տիեզերքի ուսումնասիրության համընդհանուր նպատակներից»:
Roscosmos-ի ղեկավար Դմիտրի Ռոգոզինն, իր հերթին, նշել է, որ Ռուսաստանն ինքն է առաքելություն ուղարկելու Մարս։
«Այո՛, մենք կկորցնենք մի քանի տարի, բայց կկրկնենք մեր վայրէջքի մոդուլը, ապահովենք այն «Անգարա» հրթիռով, և «Վոստոչնի» տիեզերակայանի նոր մեկնարկային համալիրից ինքնուրույն կանցկացնենք այդ հետազոտական արշավը»,- ասել է նա:
ESA-ի ղեկավար Յոզեֆ Աշբախերը կարծում է՝ քանի որ 2022-ի մեկնարկային պատուհանը կորել է, ExoMars-ը Մարսի մակերևույթ ուղարկելը Ֆրանսիայի կամ ԱՄՆ-ի գործընկերների հետ հնարավոր չի լինի մինչև 2026 թվականը: