Health Connect-ն առողջության և ֆիթնես տվյալների միասնական պատուհան է:
Google-ը և Samsung-ը միավորվել են՝ ստեղծելու Health Connect հարթակը, որը մշակողներին տրամադրում է մի շարք գործիքներ օգտատերերի առողջության տվյալներն Android հավելվածների և սարքերի միջև սինքրոնացնելու համար: Դա պետք է հեշտացնի օգտվողների գործը՝ հետևել իրենց առողջության և ֆիթնեսի տվյալներին մի քանի տարբեր հարթակներում:
Երբ օգտատերը համաձայնի, ծրագրավորողները կարող են հավաքել նրա առողջական տվյալները: Google-ն ասում է, որ օգտատերերը լիովին կվերահսկեն տվյալների տրամադրման գործընթացը։ Health Connect-ն աջակցում է տվյալների ավելի քան 50 տեսակի՝ ներառյալ օրգանիզմի ակտիվությունը, մարմնի չափումները, սնուցումը, քունը և կենսական այլ նշաններ:
«Մենք աշխատում ենք Google-ի և այլ գործընկերների հետ Health Connect-ի օգուտներն ու ներուժն ամբողջությամբ իրացնելու համար»,- հայտարարել է Samsung-ի գործադիր փոխնախագահ Թայոնգ Ջեյ Յանգը։- «Ուրախ եմ հաստատել, որ Samsung Health-ը նույնպես կտեղափոխվի Health Connect այս տարվա վերջին: Օգտատերերի թույլտվությամբ դա կնպաստի, որ հավելվածներ մշակողները Samsung Health-ի համար օգտագործեն Galaxy Watch-ի վրա չափված ճշգրիտ և օպտիմիզացված տվյալներ»:
Health Connect-ը ներկայում բաց բետա տարբերակի փուլում է գտնվում, որը հասանելի է բոլոր Android-մշակողների համար: Բացի Samsung-ից, Google-ը նաև աշխատում է MyFitnessPal, Leap Fitness և Withings մշակողների հետ վաղ հասանելիության ծրագրի շրջանակում: Google Fit-ը և Google-ին պատկանող Fitbit-ը նույնպես պատրաստվում են ներդնել Health Connect-ը, ինչը նշանակում է, որ տեխնոլոգիան հասանելի կլինի Pixel Watch-ում այս տարեվերջին:
Ի տարբերություն Samsung-ի և Apple-ի՝ Google-ը հակված չէ օգտատերերին ստիպել (կամ հորդորել) դեպի իր էկոհամակարգը, սակայն Pixel Watch-ի և Android պլանշետի հայտնվելով Google-ը կարող է ստիպված լինել նրբանկատորեն օգտատերերին մղել դեպի իր արտադրանքը, եթե ցանկանում է, որ նրանք գնեն իր Pixel սարքերի ընդլայնվող շարքը:
