Կարեն Փեյնի՝ «Մտածիր ինչ ես հագնում. նորաձության հոգեբանություն» գիրքը կարևորում է հոգեբան Ադամ Գելինսկու այն հետազոտությունը, որտեղ նա առաջին անգամ օգտագործել է «փակ ճանաչողություն» եզրույթը. մենք դառնում ենք այն, ինչ կրում ենք:
Գույնը կարող է առաջացնել ցանկացած զգացողություն. կանացիությունից ու առնականությունից մինչև հույզեր ու ցանկություններ: Այն կարող է լիովին փոխանցել անձի կարգավիճակը և հուզական մակարդակը: Գույնն ազդում է ոչ միայն այն բանի վրա, թե ինչպես են ուրիշները տեսնում ձեզ, այլ թե ինչպես ես դու քեզ տեսնում: Հետևաբար, նորաձևության գույների հիմքում ընկած են որոշակի հոգեբանական փոխազդեցություններ:
Նորաձևության գույների և գունային համադրությունների մասին VNews-ը զրուցել է ոճաբան Մարիամ Մելիք-Բախշյանի հետ:
Մարիամ, կա՞ն արդյոք թրենդային և ոչ թրենդային գույներ: Ո՞րն է այս տարվա գույնը:
Նորաձևության մեջ իրերի ձևվածքը, երկարությունը, կտորները, նախշերը մշտապես ենթարկվում են փոփոխությունների: Նույնը չենք կարող ասել գույնի մասին: Չկան ակտուալ և ոչ ակտուալ գույներ: Իհարկե, կոնկրետ տարվա համար կան ավելի տարածված ու արտահայտված գույներ նորաձևության տների հավաքածուներում և նորաձևություն թելադրող անձանց կերպարներում: Կա նաև Պանտոն գույնի ինստիտուտ, որը կանխատեսում է մոտակա երկու տարիների յուրաքանչյուր սեզոնի նորաձև գույները: Նորաձևության տներն առաջնորդվում են այդ կանխատեսումներով։ Սա ամենևին չի նշանակում, որ այս կամ այն գույնը թրենդային է, իսկ մյուսը՝ ոչ: Օրինակ այս ամռանն ավելի շատ կտեսնենք պիստակի գույնի կանաչ, երկնագույն, հագեցած կարմիր, վառ դեղին, նարնջագույն ու վարդագույն:
Ո՞ր գույնն է առավելապես արտահայտված այս տարի:
Առավել ակցենտային է կանաչը՝ իր բոլոր երանգներով: Բոտտեգա Վենետա նորաձևության տունը առաջին բրենդերից է, որ իր հավաքածուում ներկայացրել է վառ կանաչ գույնը որպես հիմնական ակցենտ։ Երանգը ակտուալ է թե մոնոխրոմ աութֆիթում, թե որպես ակցենտ:
Կարծում եմ՝ գարունը խոտի, ծաղիկների ու տերևների պայծառ կանաչ կրելու լավագույն ժամանակն է: Բնության վերածննդի գույնը` կանաչը մեզ կապում է բնության և ազատության հետ:
Ինչպե՞ս համադրել գույները, ինչի՞ն ուշադրություն դարձնել:
Գույների համադրության տարբեր սկզբունքներ կան։ Գույները կարելի է հեշտությամբ համադրել ըստ իրենց հագեցվածության՝
Կան տաք գույներ, որտեղ առկա է դեղին պիգմենտ, և սառը գույներ, որտեղ առկա է կապույտ պիգմենտ: Ըստ այդմ՝ գույները կարելի է նաև համադրել ըստ տաքության:
Գույների ճիշտ համամասնությունները կերպարում պահպանելը ևս մեծ նշանակություն ունի։ Կերպարում երեք գույն օգտագործելիս ցանկալի է դրանք բաշխել 60/30/10, իսկ երկու գույն օգտագործելու դեպքում՝ 60/40 կամ 70/30 հարաբերակցությամբ՝ կերպարի ներդաշնակությունն ապահովելու նպատակով:
Ավելորդ կգ և տարիք չավելացնելու դեպքում չարժի օգտագործել 50/50 և 30/30/30 համամասնությունները:
Եթե դեռ պատրաստ չեք գունային համարձակ համադրությունների, կարելի է օգտագործել ախրոմատ + գույն համադրելու եղանակը, որը ենթադրում է գունային պիգմենտից զուրկ սևի, մոխրագույնի և սպիտակի հետ ցանկացած գույնի համադրություն:
Իտենի անիվը օգտագործվում է նաև նորաձևության մեջ։ Անիվում ներկայացված են բոլոր գույները, որոնք դասակարգված են հետևյալ կերպ՝ առաջնային, երկրորդական և երրորդական։
Իտենի անիվի օգնությամբ գունային ամենատարածված համադրությունների եղանակներն են՝
Մոնոխրոմ՝ միևնույն գույնի տարբեր երանգների համադրություն
Անալոգային՝ հարակից գույների համադրություն
Կոմպլիմենտար՝ հանդիպակած երկու գույների համադրություն
Ասում են սևը մշտապես թրենդային է և համադրվում է յուրաքանչյուր գույնի հետ, իրո՞ք այսպես է:
Սևը՝ գունային պիգմենտից զուրկ լինելով, համարվում է նեյտրալ և իսկապես հեշտությամբ համադրվում է ցանկացած գույնի հետ:
Կա այսպիսի միֆ կամ իրականություն, որ սև գույնը, կերպարը չծանրացնելու նպատակով, պետք է կերպարում ունենա կրկնություն: Նույնիսկ սև ակնոցն ու փոքրիկ կոճակը կարող են խնդիրը լուծել: Այսպիսով, հավասարակշռելով սև գույնի բաշխումը մարմնի տարբեր հատվածումներում, կերպարին թեթևություն ենք հաղորդում:
Պարտադի՞ր է պայուսակ- կոշիկի համադրությունը պահպանելը:
Որոշ ժամանակ առաջ կոշիկի և պայուսակի գունային համադրությունը «պարտադիր» էր: Հիմա պատկերը փոխվել է: Տարբեր գույների կոշիկ և պայուսակ կրելը ոչ միայն թույլատրելի է, այլ նաև ցանկալի: Նույնիսկ նույն երանգի համադրություններ անելու մեծ ցանկության դեպքում պետք է նախապատվությունը տալ տարբեր ֆակտուրաներին կամ նույն գույնի տարբեր երանգներին: Օրինակ՝ մուգ մանուշակագույն կոշիկ և բաց մանուշակագույն պայուսակ:
Կերպարում թույլատրվում է ունենալ կոշիկի կամ պայուսակի երանգից մեկ այլ իր:
Ո՞վքեր են որոշում թե որ իրը, գույնն ու ձևվածքն են առավել ակտուալ:
Նորաձևության մեջ կան նորաձևություն թելադրող բրենդեր, որոնք ժամանակի ընթացքում փոփոխվում են: Կոնկրետ պահին հաճախորդի զարկերակը ճիշտ բռնելու կարողությունը, հաճախորդի պահանջներն ու ցանկությունները ճիշտ հասկացող բրենդն էլ դառնում է նորաձևություն թելադրող: Նորաձևության ցուցադրություններից հետո սելեբրիթիները և նորաձևություն թելադրող անձիք սկսում են կրել նորաձևության տների առաջարկած թրենդերն իրենց լուքերում, և այդպիսով դրանք հասանելի դարձնում ավելի լայն հասարակությանը։