Արդեն մոտ 20 օր Արցախի հիվանդանոցներից մեկում բուժում ստացող ռազմագերի Նուրադդին Յոլչիև Բախտիյարօղլուն, ով Ադրբեջանի Եվլախի շրջանի Մարզիլլի գյուղից է, պատմել է, որ իրենց խմբի հիմնական մասն ադրբեջանցիներ չէին:
Բախտիյարօղլուն հայտնել է, որ իրենց ուղարկել էին Թալիշ գյուղը գրավելու համար և այնտեղ ծանր մարտեր են տեղի ունեցել:
«Փոխհրաձգության ժամանակ եմ վիրավորվել, ինձ հետ շատերն են վիրավորվել, ոտքս ու ձեռքս չէի զգում: Օգնություն եմ խնդրել զինվորներից ու հրամանատարներից, սակայն ինձ չեն հանել մարտի դաշտից: Համարյա ոչ ոքի չէի ճանաչում, մեր խմբի անդամների հիմնական մասն ազգությամբ ադրբեջանցիներ չէին, այլ լեզվով էին խոսում»,- նշել է ադրբեջանցի ռազմագերին:
Նրա խոսքով՝ մի օր մնացել է ձորում, ինչից հետո հայ զինվորները եկել են ու նրան տարել իրենց տեղակայման վայրը, ապա շտապօգնության մեքենայով տեղափոխվել է հիվանդանոց:
«Իմ նկատմամբ որևէ ճնշում չի եղել, լավ վերաբերմունք է դրսևորվել: Մոտ 20 օր է, ինչ հիվանդանոցում եմ, առաջին օրերին ցավեր ունեի, հիմա բժիշկների շնորհիվ ապաքինվում եմ: Բժիշկները, անձնակազմը՝ լավ են վերաբերվում: Սննդից շատ գոհ եմ»,- ասել է Նուրադդին Յոլչիև Բախտիյարօղլուն:
Օրեր առաջ մեկ այլ ռազմագերի՝ Էմին Բախշալին Ջահիր Օղլուն, պատմել է, թե ինչպես են Թուրքիայից ժամանած զինվորական մասնագետները ղեկավարում Արցախի դեմ Ադրբեջանի ծավալած ռազմական ագրեսիան:
