Այսօր ամենածույլը նույնիսկ գիտի Քարդաշյան քույրերի և «Keeping up with the Kardashians» ամերիկյան իրապատում շոուի մասին։ Ընտանեկան հաղորդումը 14 տարի շարունակ աշխարհի տարբեր ծայրերից իր շուրջն է հավաքել միլիոնավոր դիտորդների։ Այս հաջողության ճանապարհին կարևոր է 6 երեխաների մոր՝ Քրիս Ջեների դերը։
Նա ոչ միայն հասավ փառքի, այլև «նյութականացրեց» մայրությունը՝ կյանքի հիանալի սկիզբ տալով իր 5 դուստրերին՝ Քորթնիին, Քիմին, Քլոեին, Քենդալին, Քայլիին և որդուն` Ռոբերտին:
Այսօր կանդրադառնանք ամենահայտնի ընտանիքի 66-ամյա ղեկավար-կնոջ կյանքի ճանապարհին՝
Քրիս Ջեների երիտասարդությունը
Քրիս Ջեների ազգանունը Քրիստեն Մերի Հոութոն է: Հայրն ինժեներ էր, մայրը՝ մանկական հագուստի խանութի սեփականատեր։ Դեռահաս տարիքում Քրիստենը բլիթներ է վաճառել, հետո աշխատել որպես վաճառողուհի իր մոր խանութում, այնուհետև American Airlines ավիաընկերությունում՝ որպես բորտուղեկցորդուհի։ Նրա խոսքով՝ դեռ այն ժամանակ գիտեր, որ ցանկանում է ամուսնանալ և 6 երեխա ունենալ։
Առաջին ամուսնությունը
Քրիսի առաջին ամուսինը՝ հայկական արմատներով հաջողակ փաստաբան Ռոբերտ Քարդաշյանը, նրանից մեծ էր 11 տարով։ Նրանք ամուսնացել են 1978 թվականին և մեկնել Փարիզ՝ մեղրամսի։ Հետաքրքիրն այն է, որ նույնիսկ ամուսնու հարուստ լինելը Քրիսին չխանգարեց գործնական լինել․ երկկողմանի թռիչքների համար նորապսակներն օգտագործեցին American Airlines-ի կուտակած կտրոնները։
Ամուսնության ընթացքում զույգն ունեցավ 4 երեխա՝ Քորթնի, Քիմ, Քլոե և Ռոբ։ 1991 թվականին նրանք ամուսնալուծվեցին։
Քրիս Ջեներին նույնիսկ մեծ էկրանին են մարմնավորել․ Ռոբերտ Քարդաշյանը բեյսբոլիստ Օ.Ջեյ Սիմփսոնի ընկերն ու փաստաբանն էր։ Նրա գործը հիմք հանդիսացավ «Ժողովուրդն ընդդեմ Օ. Ջեյ Սիմփսոնի. ամերիկյան հանցագործության պատմություն» սերիալի ստեղծմանը: Քրիսին մարմնավորել է Սելմա Բլերը։
Քրիսը երեխաներին սովորեցրել է, որ կարևոր է յուրաքանչյուր ժամը: Եվ հենց սա էլ հիմք է հանդիսացել նրանց փայլուն ապագայի համար:
Քիմի խոսքով` իրենց բոլոր ընկերները կիրակի օրերին քնում էին մինչև ժամը 10-ը, իսկ իրենք արթնանում էին առավոտյան 7-ից:
Երկրորդ ամուսնություն
Ռոբերտի հետ ամուսնալուծությունից ընդամենը մեկ ամիս անց Քրիսն ամուսնացավ նախկին օլիմպիական մարզիկ Բրյուս Ջեների հետ։ Նրանց ամուսնությունը տևել է ավելի քան 20 տարի։ Զույգը երկու դուստր է ունեցել՝ Քենդալ և Քայլի Ջեներները։ Քրիսը Բրյուսի ոչ պաշտոնական մենեջերն էր:
«Երբ մենք սկսեցինք զբաղվել Բրյուսի կարիերայով, ես ընդամենն ունեի աղյուսի չափի բջջային հեռախոս, գրամեքենա և այցեքարտ պատրաստող սարք»:
Քրիսը սիրում է կրկնել, որ սկզբում նրանք գումար չունեին։
«Դա շատ սարսափելի էր, քանի որ հասկանում էի, որ ես պատասխանատու եմ երեխաներիս համար։ Իհարկե, նրանք ունեին հայր՝ Ռոբերտը, բայց նրանք ապրում էին ինձ հետ, և ես ինքս պետք է այդ ամենից գլուխ հանեի»։
Ամեն տարի, ավանդույթի համաձայն, Քրիսը երեխաների հետ քննարկում էր ապագա ծրագրերը. «Ո՞րն է այս տարվա ձեր նպատակը: Ինչի՞ մասին եք երազում։ Որքա՞ն բարձր եք ցանկանում սահմանել նշաձողը»: Իր դուստրերին և որդուն տարբեր հարցեր տալով՝ Քրիսը փորձում էր հասկանալ, թե որ նպատակներն են իրատեսական, և ինչ կարող է անել, որպեսզի օգնի իր երեխաներին դրանց հասնելու ճանապարհին։
Բազմազավակ ընտանիքի մասին իրապատում շոու ստեղծելու գաղափարն առաջացել է դեռևս 2006 թվականին։ Փերիս Հիլթոնի հայտնի հիթ շոուն՝ «Պարզ կյանքը», դեռ նոր էր ավարտվել, և Քարդաշյանների ընտանիքը հեռուստատեսությամբ ցածր դիտողականություն ուներ։ Թեման Քարդաշյան-Ջեներ ընտանիքի անդամներն էին՝ շեշտը դնելով Քորթնի, Քիմ և Քլոե քույրերի վրա: Շոուն, այնուամենայնիվ, մեծ հաջողություն ունեցավ. 20 եթերաշրջան աշխատելուց հետո՝ 2021 թվականի ամռանը հեռուստաշոուն դադարեցրեց իր գոյությունը, սակայն ունեցավ բազմաթիվ սփին-օֆֆեր և շարունակություններ:
Քրիս Ջեներն այսօր
Երբ Քրիս Ջեներին հարցնում են, թե արդյոք նա իրեն համարում է նորաձևություն թելադրող, նա պատասխանում է՝ ոչ՝ ավելացնելով՝
«Բայց հավատում եմ, որ անկախ նրանից, թե քանի տարեկան է կինը, նա կարող է հրաշալի տեսք ունենալ: Տարիքի հետ օրգանիզմը փոխվում է, երբեմն կանայք հանձնվում են»։
1990-ականների սկզբին Քրիսն ուներ մեկ ամուսնություն և 4 երեխա։ Այժմ նա 66 տարեկան է, մեծացրել է 6 երեխա, իսկ հիմա նաև մասնակցում է հսկայական թվով թոռների դաստիարակությանը՝ միաժամանակ ղեկավարելով ընտանեկան բիզնես կայսրությունը։ Եվ դժվար գտնվի մեկը, ով կասի, որ Քրիսը չի խնամում իրեն։