Շարմ Էլ Շեյխը մեր մոլորակի գեղեցիկ վայրերից է՝ բնության և մարդու երևակայության լավագույն դրսևորումներից: Եգիպտոսում` Սինայի հարավում, Կարմիր ծովի ու անապատի գույներն Աստծու և մարդու ճարտարապետությամբ Շարմ Էլ Շեյխը վերածել են մի տեսակ հեքիաթի, ուր երազանքի ձգողությունն է և ժամանակ, որում երբեք ուշ ժամ չի լինում…
Ջերմաստիճանն այստեղ հասնում է մինչև +45-ի, միջինը հունվարից մարտ ընկած ժամանակահատվածն է՝ +23- +25 աստիճան: Տեղումները չնչին են: Աշունը և ձմռան առաջին ամիսը Շարմ Էլ Շեյխում համարվում են թավշյա սեզոն: Հանգստի համար լավագույն ժամանակն ապրիլից հունիսն է և սեպտեմբերից մինչև դեկտեմբերի վերջը:
Լրագրողների համար «Անռիվա-տուրի» կազմակերպած մեդիա- այցը նպաստեց լիարժեք պատկերացում ունենալ հինավուրց Եգիպտոսի մասին, ականատես լինել Շարմ Էլ Շեյխի զբոսաշրջային քաղաքականությանը:
Հյուրանոցներ
Այստեղ ժամանած անխտիր բոլորը՝ անկախ ազգությունից, տարիքից և սեռից, տեղացիների համար պատվի և հյուրասիրության արժանի մարդիկ են, որոնցից յուրաքանչյուրին պետք է վերաբերվել գերհարգալից և անմիջապես լուծել նրանց հանգիստը խոչընդոտող թեկուզ ամենաչնչին խնդիրը:
Սպասարկման շատ բարձր մակարդակը, անսահման սիրալիրությունն ու հյուրերին նրանց մայրենի լեզվով ողջունելը գրավիչ պայմաններից են Շարմ Էլ Շեխում: Հյուրանոցները հիմնականում բարձրակարգ են, շքեղ, հարմարավետ, շուրջօրյա սննդի տարատեսակ ուտեստով, շատ գեղեցիկ կառուցված, տարին մեկ- երկու անգամ հանգստանալու համար՝ մատչելի:
Քաղաքը
Մինչև 1980- ականները ոչ մեծ ավան հանդիսացող Շարմ Էլ Շեյխը շատ արագ վերածվել է յուրահատուկ կառույցներով, հետաքրքիր թաղամասերով, հնի ու նորի համադրությամբ մեծ, զբոսաշրջային գրավիչ քաղաքի և շարունակում է ընդլայնվել: Ցերեկվա թե գիշերային կյանքն է առավել հետաքրքիր՝ դժվար է ասել, քանի որ օրվա 24 ժամն իր գրավչությունն ունի այստեղ: Այդուհանդերձ, Շարմ Էլ Շեյխի գիշերային գույնզգույն լույսերը, բազմազան շոուները, ակումբների երաժշտությունը, ծովի մեջ լուսնի արտացոլանքի հմայքը հակում են դեպի երեկո:
Քաղաքը բազմազգ է ու բազմակրոն. տարբեր քաղաքակրթությունների, կրոնների, մշակույթների, սովորույթների համատեղումը յուրօրինակ ազատություն է ստեղծել, որը նպաստում է համատեղ կենցաղին: Հյուրերին գրավում է թե՛ հին քրիստոնյա ղպտիների եկեղեցին, թե՛ քիչ հեռու գտնվող մզկիթը: Շնորհիվ հյուրընկալ եգիպտացիների, Շարմ Էլ Շեյխը չափազանց գրավիչ է: Ի դեպ, նրանք ակնածանքով են խոսում հայերի մասին՝ նշելով, որ գիտեն՝ իրենց պես հին ազգ ենք, ու մեր լեզուն էլ նրանց լեզվի պես դժվար է յուրացնել:
Ռոման և Ֆարեսը՝ մեզ ուղեկցող գիդերը, որպես պատվախնդիր եգիպտացիներ, հանգամանալից ներկայացրեցին իրենց երկրի պատմությունը, սովորույթները, Շարմ Էլ Շեյխի առանձնահատկությունները, պարզվեց, որ քիչ բան չգիտեն նաև հայերիս մասին:
Դայվինգ
Պոսեյդոնի զարմանահրաշ աշխարհն անդիմադրելի ուժով է ձգում դեպի Կարմիր ծով: Դելֆինների ընկերակցություն, գույնզգույն ձկների շրջապտույտ, ջրիմուռներ. անապատին հակադրվող ջրային հարուստ, անհավատալի հետաքրքիր կենսաբազմազանությունը ստիպում է երկար ընկղմված մնալ ծովի հատակում: Դայվինգը նույնքան պարտադիր է Կարմիր ծովում, որքան լողալը:
Դելֆիններից հետո հաջորդ հաճելի անակնկալը մեզ դայվինգի և ծովային զբոսանքի բերած նավապետը մատուցեց: Իմանալով, որ Հայաստանից ենք, նա ասաց՝ գիտե, որ հայերը համեղ խորոված են պատրաստում, տեղյակ է, որ նույնիսկ Խորովածի փառատոն է լինում Հայաստանում, և այդ առթիվ տարբեր ԶԼՄ- ներ ներկայացնող մեր լրագրողական խմբի համար մեր նավապետն իր ձեռքով խորոված պատրաստեց նավի վրա. տպավորիչ էր և համեղ:
«Սաֆարի դեզերտ»
Անապատը… Անծայրածիր թվացող ամայություն, ուր ավազն ու փոշին կիզիչ արևի, կապույտ-կապույտ երկնքի (այնտեղ իսպառ մոռանում ես, որ մոլորակում ամպ գոյություն ունի) ֆոնին քեզ երերերացող ստվեր են դարձնում, թվում է՝ գրավիչ ի՞նչ պետք է լինի, բայց… Հիպնոսի էֆեկտ կա անապատում, իրականությունից կտրող զգացողություն… Դժվար է բացատրել, մի փոքր համեմատելի է սպիտակի հետ, որում, իրականում, բոլոր գույներն են:
Խորհրդավոր է անապատը, և թեյ հյուրասիրող, բարեհամբույր բեդվիններն ու զարդարված ուղտերն են հիշեցնում, որ դու այս մոլորակում ես, չնայած, բեդվիններին նայելով, կարող ես դարաշրջանը խառնել:
Վերջնական իրականության են վերադարձնում կվադրացիկլները: Նրանց արագընթաց քարավանն ապահովում է էքստրիմը, դրայվը, համարձակությունը: Սաֆարին ևս պարտադիր պայման է, առանց դրա լիարժեք չի լինի հանգիստը:
«Ֆարշա»
Եգիպտոսի գույները, ջերմությունը, համն ու հոտը, դարերն ամփոփված են ծովափնյա «Ֆարշայում»: Շարմ Էլ Շեյխի հեքիաթի մասն է այդ վայրը, որին միայն սրճարան ասել՝ նշանակում է չասել ոչինչ: «Ֆարշան» զբոսաշրջիկներին հնարավորություն է տալիս ամբողջական դարձնել պատկերացումը փարավոնների, շեյխերի ու ընդհանրապես, այդ հին երկրի մասին լավագույն դրսևորմամբ՝ զգալով:
Դրան շատ է նպաստում նաև սպասարկող անձնակազմը. այնպիսի ջերմ, հոգատար վերաբերմունք է ցուցաբերվում երեխաներից մինչև ծերերին, որ թվում է՝ հարազատիդ տուն ես եկել: Աշխատակիցներից մեկր, նկատելով, որ նայում եմ տեղացիների ձեռքի՝ մանր հուլունքներով պատրաստած գեղեցիկ զարդին, վազելով եկավ, հանեց կախած տեղից ու նվիրեց՝ ասելով. «Եգիպտոսից՝ քեզ»: «Ֆարշան» նույնպես պետք է ընդգրկել Շարմ Էլ Շեյխում պարտադիր այցերի ցանկում:
«Շուքրան», Եգիպտոս
Հյուրընկալ, պատվախնդիր, ընտանեկան ամուր ավանդույթներով հնամենի ժողովուրդ են եգիպտացիները: «Շուքրան» բառը, որը եգիպտերեն նշանակում է շնորհակալություն, սրտանց ու շատ ես ուզում ասել այստեղ որպես զբոսաշրջիկ, դա ավելին է նշանակում, քան սոսկ քաղաքավարությունը: «Շուքրան» Եգիպտոսին՝ ջերմ սրտի համար: