Աշխարհի գավաթակիր Վազգեն Թևանյանը (65 կգ) դուրս եկավ Խորվաթիայի մայրաքաղաք Զագրեբում մեկնարկած ազատ ոճի ըմբշամարտի Եվրոպայի առաջնության եզրափակիչ, որտեղ ապրիլի 18-ին կգոտեմարտի Բուլղարիայի ներկայացուցիչ Միկյայ Սալիմ Նաիմի հետ:
Կիսաեզրափակիչում Հայաստանի ներկայացուցիչը 12-4 հաշվով հաղթեց Ուկրաինան ներկայացնող հայ ըմբիշ Էրիկ Առուշանյանին:
Վազգեն Թևանյանը պայքարը սկսել էր 1/8 եզրափակիչից՝ 10-0 հաշվով պարտության մատնելով Իսրայելը ներկայացնող Ջոշուա Սթյուարտին: Քառորդ եզրափակիչում հայ ըմբիշը 4-1 հաշվով առավելության էր հասել ադրբեջանցի Ալի Ռահիմեադայի նկատմամբ:
Եզրափակիչում Վազգեն Թևանյանի մրցակից Միկյայ Սալիմ Նաիմը նույնպես մեկնարկել է 1/8 եզրափակիչից՝ 10-3 հաշվով առավելության հասնելով շվեյցարացի Նինո Լեուտերտի նկատմամբ: Քառորդ եզրափակիչում բուլղարացին 6-2 հաշվով հաղթել է վրացի Էդեմի Բոլկվաձեին, իսկ կիսաեզրափակիում՝ ռումինացի Ստեֆան Իոնուտ Կոմանին (7-0):
Հիշեցնենք, որ կիսաեզրափակիչ է դուրս եկել նաև Արման Ավագյանը (79 կգ): Առաջին օրը պայքարը սկսած Հայաստանի մյուս երեք ըմբիշները պարտվել են և դուրս մնացել հետագա պայքարից։
1/8 եզրափակիչից մեկնարկած Մանվել Խնձրցյանը (57 կգ) 5-8 հաշվով պարտվել է Բուլղարիան ներկայացնող Գեորգի Վանգելովին։
Արման Անդրեասյանը (70 կգ) պայքարը սկսել է քառորդ եզրափակիչից, որտեղ 1-2 հաշվով պարտվել է մոլդովացի Վասիլ Դյակոնին։
Սերգեյ Սարգսյանը (97 կգ) նույնպես պարտվել է մեկնարկային գոտեմարտում: Հայաստանի ներկայացուցիչը 1/8 եզրափակիչում 0-8 հաշվով պարտություն է կրել գերմանացի Էրիկ Թիլից։
Հաբեթնակ Կուրղինյանի գլխավորած թիմի կազմում մրցավայր են մեկնել նաև Արսեն Հարությունյանը (61 կգ), Հրայր Ալիխանյանը (74 կգ) և Մուշեղ Մկրտչյանը (86 կգ), որոնք պայքարի մեջ կմտնեն ապրիլի 18-ին։
Մեդալների սպասումով. Հայաստանի ըմբիշների հնարավորություններն ու գլխավոր մրցակիցները ԵԱ-ում