Արդեն որոշ ժամանակ շարունակվում են խոսակցությունները, թե «Պարի Սեն-Ժերմենը» նախատեսում է այս մրցաշրջանի ավարտին նոր մարզիչ հրավիրել Մաուրիսիո Պոչետինոյի փոխարեն, որի աշխատանքից ակումբում դժգոհ են։
Le10sport-ի հաղորդմամբ՝ արգենտինացու հավանական փոխարինողների թվում է նրա հայրենակից Դիեգո Սիմեոնեն, որի պայմանագիրը Մադրիդի «Ատլետիկոյի» հետ շարունակելու է գործել մինչև 2024 թվականի ամառ։ Նշվում է, որ իսպանական ակումբի ղեկավարությունը դժգոհ է 51-ամյա հարավամերիկացու աշխատանքից, որի արդյունքներն այս մրցաշրջանում չեն տպավորում։
Ավելի վաղ տեղեկություններ էին հայտնվել, որ ՊՍԺ-ի գլխավոր մարզչի պաշտոնի հիմնական թեկնածուն է Զինեդին Զիդանը, որը, սակայն, չի շտապում հստակեցնել իր դիրքորոշումը։